新加坡 S.E.A. 海洋館

新加坡 S.E.A. 海洋館有咩睇

新加坡 S.E.A. 海洋館除咗極富娛樂性，亦同時教導訪客正確嘅觀念，令大家明白到人類嘅細微動作亦可能會對世界構成重大影響。館內展覽設有互動式展板，俾你更深切了解眼前嘅景象。

你可以一路步行穿過隧道，一路觀賞喺你身邊同頭頂游過嘅公牛鯊魚同巨型魔鬼魚；其他有趣展品包括喺珊瑚花園裡面玩嘅可愛海馬，同埋一系列造型奇特嘅深海水母；鯊魚區仲有 200 幾種唔同類型嘅鯊魚，包括鎚頭鯊等瀕危物種。

嚟到新加坡 S.E.A. 海洋館，點可以唔去超廣闊嘅「深海奧秘生態區」，讚嘆海洋世界嘅奧妙？成千上萬嘅各式生物喺深藍色海水裡面盤旋穿插，你會覺得自己好似喺陸地上面潛水咁。行到餓餓哋，想食啲嘢補充體力，又或者買啲潮爆手信？呢度仲有間望到海洋館展品嘅餐廳，同埋連住海洋館嘅紀念品店，一次過滿足你兩個願望！

由新加坡市中心去海洋館，可以喺怡豐城 (VivoCity) 購物中心搭聖淘沙特快列車 (Sentosa Express)，坐一個站喺海濱站落車就到。