烏節路 (Orchard Road) 10 大最佳夜生活體驗

翡翠山 (Emerald Hill) 係暫時逃離烏節路各大購物中心嘅好地方，位於烏節中央城 (Orchard Central) 後面，係市內最具吸引力嘅街道之一，街上大多數樓房喺 1900 至 1920 年間落成，封存住舊日時空，值得你到此一遊！

而最佳遊覽時間就係夜晚，暢飲幾杯寫意不過，區內好多間人氣夜店都會營業至深夜。其中，翡翠山 5 號 (No. 5 Emerald Hill Bar) 酒吧就以翡翠山命名，店內雞尾酒份量非常充足，更將 20:00 至 01:00 劃為「Martini Happy Hour」，超極吸引！無論你想搵款式多樣嘅樽裝啤酒同生啤，定係想一試地道小食做宵夜，嚟呢度都一定唔會錯！

Harry's @ 安哥烈園店地理位置優越，位於烏節路 (Orchard Road) 上，就喺偉樂坊 (Wheelock Place)、邵氏樓 (Shaw Centre) 同埋新開嘅愛雍 (ION) 購物中心等眾多商場附近，絕對係你「血拚」途中飲返杯「充電」嘅好去處！

Harry's Singapore 喺新加坡嘅主要購物同餐飲區都設有多間分店，而安哥烈園店就喺烏節路中心地區嘅遠東購物中心裡面—呢個購物商場歷史悠久，除咗時尚品牌名店之外，仲有一系列餐飲場所，等你隨時休息用餐。

Alley Bar 太受大眾歡迎，已經唔再係「隱世秘店」；不過，由於呢間酒吧位於烏節路 (Orchard Road) 附近嘅巷仔入面，所以都仲有少少神秘感嘅。而且，酒吧外觀與眾不同，以極高樓底配搭 L 形吧檯，絕對稱得上「別樹一格」！店內有售各種超值飲品，啤酒、葡萄酒同埋特飲都好抵，梗有一款啱你口味。

Alley Bar 座位充足，愈夜愈熱鬧—到咗差唔多收舖果陣，店內音樂已經如雷貫耳，Party 氣氛無與倫比，啱哂鍾意勁歌熱舞嘅賓客！如果你想靜靜哋飲酒傾偈，場內亦有唔少安靜嘅角落，可以選擇。

新加坡嘅 Hard Rock Café 無人不識，小編都應該唔使多作介紹啦 (笑)！Hard Rock Café 於 1990 年開店，主打美國搖滾精神同埋美式佳餚拼盤，每日營業至深夜，工作人員同埋場內顧客都非常友善，一定會陪你度過美好時光！而且，店內每晚都有 Live Band 表演，當地樂手、以至親臨新加坡巡迴演唱嘅國際樂隊都會喺度唱返轉。

就算冇樂隊登台，美式音樂依然響徹全場，Party 氣氛一啲都唔輸蝕！自問唔係「Rocker」？唔緊要！呢間酒吧安裝咗大型電視，隨時直播各大足球比賽，期間仲會提供多款啤酒同埋特飲優惠，你又點可以錯過？

如界你想搵新加坡全城 No. 1 嘅 Martini，就一定要嚟 Martini Bar！Martini Bar 位於新加坡君悅酒店 (Grand Hyatt Singapore) Mezza9 餐廳入面，酒牌上有多達 30 種飲品選擇，全部只售 SGD19 起，仲有唔少獨創款式—一場嚟到，點可以唔試？店內主打嘅特飲包括亞洲風味十足、果香濃厚又甜絲絲嘅荔枝 Martini，同埋由咖啡加可可粉混合而成嘅 Tiramisu Martini。

除此之外，椰子、楊桃、熱情果同火龍果口味都相當唔錯，一杯入口，欲罷不能！店家嘅 Happy Hour 有半價優惠，9 杯 Martini 只需 USD9 (17:00 至 21:00)，盡情豪飲都唔驚「荷包出血」啦！Martini Bar 人氣爆燈，週末更加全場爆滿—如果你想坐低飲返杯，就記得要早啲嚟喇。

位於新加坡索美塞路嘅 Oriole Café ＆ Bar 全日營業，係休閒暢飲嘅好去處，店內嘅酒館小食價格實惠，大部分索價唔超過 SGD15，仲有各款優質咖啡同埋雞尾酒任你揀。

嚟到 Oriole Café ＆ Bar，你可以享受到頂級咖啡體驗，一邊放鬆身心，一邊喺露天區域俯瞰喧囂熱鬧嘅烏節路 (Orchard Road) 街景，都咪話唔寫意！不妨入嚟食個全日早餐，又或者喺烏節路盡情「血拚」，行到餓就試下材料充足嘅三文治。只要由烏節路穿過格蘭芝路步行 5 分鐘，就可以到達呢間 Café。