新加坡農曆新年

新加坡春到河畔

想慶祝農曆新年，好去處又點止牛車水？每年一度嘅新加坡春到河畔活動喺濱海灣岸邊走廊 (Marina Promenade) 舉行，同樣值得一到！呢個巨型慶典熱鬧非凡，活動上嘅美食琳瑯滿目，仲有好多傳統藝術，同埋流傳自中國古代嘅民間習俗，統統呈現喺你眼前。

現場到處都有吹氣神獸、傳說英雄、神像、佛塔同桃花，仲邀請到由中國個別省份專誠前嚟嘅演出嘉賓、工藝大師同工匠，上演夜間文化節目，展示各種精湛才藝，由雜技表演、手指繪畫到中式書法都有。

你仲可以睇下掌相，問下生肖運程—舉個例，好似小編咁屬蛇嘅人機靈明慧，對自己嘅頭腦信心十足，肯貫徹始終，財運通常都唔錯 (？)！

徒步遊覽牛車水

講到農曆新年嘅活動中心，當然非牛車水莫屬！年近歲晚，丁加奴街同寶塔街兩邊會開滿七彩攤檔，令呢個歷史城區雀躍氣氛滿瀉。

不妨嚟呢度選購傳統新年餅乾，例如蛋卷之類；又或者買啲柳絮、紅紙飾品、桔籃等等，求個好意頭。如果你結咗婚，又想秉承中國優良傳統，不妨封幾封利是，派俾單身後輩丫！

妝藝大遊行盛大上演！

妝藝大遊行係新加坡最大型嘅巡遊匯演活動，原意係慶祝農曆新年，之後慢慢發展成國際盛會，呈獻台灣雜技同莎莎舞等等嘅精彩表演，

仲邀請到嚟自世界各地數以百計嘅表演嘉賓添！遊行前一日，通常就會有綵排，遊客可以先睹為快。巡遊隊伍一般喺市政廳出發，兜兜轉轉咁去到市政區嘅新達城 (Suntec City)，除咗展現中華傳統舞龍舞獅同雜技外，仲係新加坡多元族群同國際化嘅標誌。

過去幾年，澳洲、日本、台灣、印尼同韓國等地嘅著名表演團體都專誠嚟呢度大顯身手！妝藝大遊行嘅另一個傳統賣點，就係陣容鼎盛嘅花車巡遊，由最靚嘅蘭花到最新嘅電腦技術，統統一應俱全，絕對會將新加坡嘅農曆新年節慶氣氛推到最高點，你又點可以錯過？