烏節路 (Orchard Road) 16 大購物好去處

愛雍．烏節 (ION Orchard) 喺烏節路盡頭，建築風格時尚，充滿未來主義，好似燈塔咁閃閃生輝，吸引咗超多型格達人同奢侈品愛好者嚟到呢度消費。這座由玻璃、大理石和鋼鐵建成的藝術品號稱新加坡最迷人的購物中心，甚至更有為高消費顧客和名人開設專用廁所！

愛雍．烏節樓高 8 層，由管家式禮賓服務、以至星級名廚主理的高檔餐飲場所均一應俱全。另一方面，場內亦雲集咗啱啱喺世界各地「花生騷」亮相嘅奢華時裝，同埋藝術展覽等，而且仲提供雲端瀏覽服務，難怪吸引咗大批「潮人」光臨！

烏節中央城 (Orchard Central) 坐落喺烏節路，傲視其他購物商場；場內設有 6 座超級自動扶手電梯，畀你可以到處暢遊。一般嚟講，你只要喺烏節中央城嘅禮賓部出示護照，就可以獲贈購物折扣卡，你可以把握度假客尊享嘅推廣優惠，以低至 75 折價錢買到精選品牌產品！

烏節中央城喺烏節路同基里尼路交界，地點便利，而且距離薩默塞特地鐵站只有大約 5 分鐘路程。

義安城 (Ngee Ann City) 係烏節路嘅購物地標，過去幾十年以來一直開設咗名牌商舖、書店、美容院同餐廳，滿足「血拚客」需要。呢間購物中心仲設有藝術同創意區，同埋佔地超過 7 層嘅高島屋百貨店 (Takashimaya Department Store)，

除咗設計品牌同餐飲場所，呢度亦呈獻其他精彩體驗。其中，高島屋廣場有時會架設起市集風格嘅市場，仲舉辦購物活動；而市民廣場 (Civic Plaza) 外面嘅活動場地仲可以容納多到 3,000 人—呢度寬敞嘅空間會定期舉行音樂會、時裝表演同嘉年華會，絕對係義安城嘅特色之一。

詩家董 (Tangs) 係烏節路歷史最悠久嘅百貨商店之一，早喺 1932 年就進駐呢度；佢出面嘅建築極具獨一無二嘅中國設計風格，宜家就轉型成為更加有亞洲時尚生活風格嘅百貨公司，難怪吸引咗世界各地嘅旅客慕名而嚟！

詩家董嘅「美容中心 (Beauty Hall)」專售知名品牌商品；家品部搜羅咗亞洲特選精品、禮品同裝飾品，正係遊客挑選獨特手信嘅好去處；「時裝達人」仲可以到 2 樓嘅 Island Shop 買清涼舒適嘅棉質休閒服，同好朋友到海灘 BBQ。

喺烏節路嘅遠東廣場 (Far East Plaza) 係新加坡歷史比較悠久嘅購物中心之一，但成日都吸引咗年輕潮人嚟呢度，物色比較「唔出名」設計師特價發售嘅衣飾。

差唔多有 800 間零售舖遍佈喺商場 6 個樓層，對於鍾意獨特商品嘅年輕學生同旅客嚟講，正係唔可以錯過嘅好去處！潮流商舖未必係你「杯茶」？但唔緊要！旅客仲可以選擇嚟呢度買相機同手提電腦等特價商品，同樣可以買得好盡興；而時尚配飾亦係唔錯嘅選擇，特別係度身剪裁嘅手袋、腰帶同珠寶，更係別樹一格。

文華購物廊 (Mandarin Gallery) 閃閃生輝，將各路國際頂尖設計師出品同個人化訂製產品統統雲集喺烏節路呢度！呢間購物中心鄰近出名嘅文華大酒舖 (Mandarin Orchard)，雖然佔地唔多，但有 Michael Kors 同 Max Mara 等高級品牌進駐呢度，應有盡有。

喺 3 層高嘅優雅購買熱點裡面，仲有水準一流嘅餐廳；而個別首飾同國際時尚品牌就係購物中心嘅主打商舖，目標客路係有錢消費階層。

百麗宮購物中心 (Paragon Shopping Centre) 坐落喺新加坡烏節路度，氣派奢華，專賣奢侈品，亦有世界各地嘅時尚品牌進駐。6 個樓層分佈咗各種時裝舖頭、餐廳、設計師品牌同運動用品專門店，

裡面包括咗 Jimmy Choo、奉行簡約主義嘅 Muji (無印良品) 日式零售店，同埋 Nike 概念店。如果你已經為人父母，Armani Junior、Petit Bateau 同 GUESS Kids 等好多品牌一定能滿足你嘅需要！百麗宮設計典雅別緻，專門以「時尚潮人」同觸覺敏銳嘅遊客為客路，全方位迎合消費者需要。

獅城 68 喺 1974 年開業，係新加坡第一間多層購物中心，亦經歷過消費領域嘅各種興衰。

呢座一站式生活品味嘅購物商場喺多美歌地鐵站，進駐嘅舖頭包括咗 Carrefour、John Little、Marks & Spencer、Best Denki 同 Spotlight 等，集齊電影、時尚、音樂、家居用品喺一身，當然唔少得五花八門嘅餐飲店舖。

313@Somerset 購物中心正迅速發展為烏節路最受歡迎嘅「一站式商舖」，擁有超多國際年輕時尚品牌嘅商舖同餐飲場所，當中包括咗頂樓令人食過返尋味嘅美食廣場。

呢座購物商場喺正索美塞地鐵站嘅上面，散發咗青春型格嘅氣氛，囊括咗實惠品牌，當然會喺咁多購物熱點裡面脫穎而出。另外，313@Somerset 購物中心活動豐富，成日舉辦現場時裝發佈會、現場音樂表現，仲有得意古怪嘅酒吧活動，絕對係烏節路嘅遊覽好去處！

DFS 旗下新加坡 T 廣場 (T Galleria) 鄰近史各士皇族酒店 (Royal Plaza on Scotts)，上方標有猩紅色嘅 DFS 標誌，係新加坡最大型嘅時裝同化妝品集中地，提供世界出名嘅奢侈品牌免稅優惠，賣嘅商品都有 DFS 100% 環球保證。另外，呢度亦係畀你搜羅手信嘅好地方，貨品包裝好靚，帶返屋企最得體！

騎士橋購物中心 (Knightsbridge Mall) 正正係新加坡君樂酒店 (Grand Park Orchard Hotel) 嘅一部分，引領住潮流，設計非常前衛，設有雙重出入口，仲直通到街出面，呢度嘅零售店為銷售空間注入咗超正嘅個人風格。呢座高 4 層嘅購物中心由各式各樣嘅旗艦店主導，專賣時尚用品同精美珠寶；

而以玻璃建成、同購物中心同樣時尚奪目嘅 5 星級酒店就喺正旁邊，各類餐飲服務任君選擇。騎士橋購物中心絕對係烏節街上面最引人注目嘅購物中心之一，你可以喺呢度搜羅心愛嘅品牌產品。雖然場內商舖選擇有限，但商舖設計統統展現超正嘅風格，令人賞心悅目！

文藝復興廣場 (Palais Renaissance) 鄰近泰國大使館，喺正烏節路嘅希爾頓酒店 (Hilton Hotel) 對面，建築優雅，坐擁咗名設計師嘅精品店，例如 DKNY、Gianni Versace、Prada、The Link 同 Jim Thompson。

如果你對印度時裝興趣濃厚，可以到訪喺正文藝復興廣場 2 樓、開創新加坡先河嘅高級印度時裝店—置身喺店裡面，你會搵到印度頂級設計師嘅時尚作品，件件衫都色彩奪目，而且點綴咗水晶珠片裝飾！行到攰啦點算好？係時候喺 Marmalade Pantry 同 PS.Café 等時尚咖啡廳坐一坐，自在咁享用美食。

先得坊 (The Centrepoint) 係新加坡最宏偉、最受歡迎嘅購物中心之一，裡面有國內歷史最悠久嘅百貨公司 Robinsons＆Co，同埋英國連鎖店 Marks and Spencers 進駐。

除此之外，呢度仲開咗古典音樂、休閒服裝、光學設備、電子產品、傢俱、東方地毯、體育用品、美術、亞洲古董、手工藝品同書籍專門店，仲唔少得各類餐廳同 Cafe 選擇。

麒麟大廈 (The Heeren) 喺烏節路同經禧路交界，本來以坐擁東南亞最大型嘅 HMW 音樂旗艦店而出晒名，之後佢仲越嚟越出名，又加咗更加多「尖端風格」。Camper、Quick Silver、Levis、Fossil l，同埋 77th St 等當地街頭服飾品牌遍佈喺商場 5 樓，由時髦到經典商品、街頭到嘻哈衣著，都可以喺呢裡買齊！

麒麟大廈好比東京原宿或者香港金百利中心，商舖全都係賣時尚破格服飾，可以配搭獨特配飾、眼鏡同鞋類，盡顯個人本色。行到肚仔餓點算好？喺底層嘅 Spinelli Cafe 就深受購物客鍾意，而地庫嘅一部分亦被打造成專門賣日式流行食品嘅「食堂街」，就好似「迷你版日本」。

威士馬廣場 (Wisma Atria) 位置正到不得了，喺正史各士街同烏節路交界嘅十字路口，正正坐落喺地鐵站上蓋。呢座鈷藍色嘅綜合建築大樓裡面有 ALDO、Bebe、Cotton On、Dorothy Perkins、GAP、Lacoste、La Senza、Miss Selfridge、Nine West、Seafolly 同 Tag Heuer 等等好多高級時尚品牌嘅門市，同當地舖頭 GG<5、Charles & Keith 同 Lee Hwa Jewellery 互相襯托。

而喺正 4 樓嘅大食代美食廣場就有超受歡迎嘅街頭美食，裝修畀到人回味 70 年代嘅新加坡風情。