新加坡兒童職業體驗館 (Kidzania)

新加坡兒童職業體驗館最大賣點，就嘅深入淺出咁介紹環球經濟概念，細路仔可以試下賺人工 (用體驗館嘅官方貨幣「kidZos」出糧)，然後俾錢買商品同服務，甚至開銀行戶口。兒童職業體驗館喺墨西哥、泰國、印尼同菲律賓等全球十幾個國家都有分館，搞得有聲有色；而新加坡館嘅「寓學習於玩樂」概念，亦都係借鏡姊妹館嘅成功經歷。

小朋友可以選擇唔同嘅職業，試勻哂建築工人、警察、醫生同護士等工作，自食其力，再學習下環球經濟學嘅基本概念，從而提高信心、建立團隊同溝通技巧，同時亦培養邏輯同創造性思維。

另一方面，新加坡兒童職業體驗嘅「人類更美好生活六大基本權利」亦值得一提，呢六大權利分別係：「擔當」、「知情」、「關懷」、「玩樂」、「創造」、「分享」，都幾好記，而且仲有各自嘅「權利守護者 (RightZkeepers)」代表卡通人物，叫做 Urbano、Vita、Cheeka、Beebop 同 Bache，細路哥就更易「入腦」啦！下次嚟到新加坡兒童職業體驗館果陣，不妨深入了解每個角色。

就算你唔係住喺聖淘沙，都可以輕鬆嚟到位於島上嘅兒童職業體驗館—只要搭地鐵到怡豐城站，然後轉搭島上嘅聖淘沙捷運就到，又方便又平；島上亦都有免費接駁巴士服務，乘客喺巴拉望海灘落車，即刻可以搵到體驗館。