新加坡 CE LA VI 酒吧

濱海灣金沙酒店富麗堂皇，如果你覺得好似有啲壓迫感、唔想打擾到俾錢入住嘅顧客，其實都係人之常情 (笑)！酒吧由 18:00 起會實行穿著規定：顧客唔可以著背心、短褲或者拖鞋入場。CE LA VI 分成兩部分，一邊係 Sky Deck 酒吧同 Club Lounge 酒廊，另一邊係 CE LA VI 餐廳同 Sky Bar 酒吧。

室外區採用木平台同玻璃設計，特別有格調；枱凳座位好多，隔嚟仲放咗紅色太陽遮，非常體貼。大多數人都會想霸返吧檯最邊嘅位，欣賞最佳景觀。另一方面，酒吧仲可以望到樓下泳池—由呢度影落去，濱海灣金沙酒店寬闊嘅船形屋頂一機影哂，絕對係一流「打卡」位！

日落時份，酒吧會愈嚟愈多人，因為呢段時間可以一次過睇盡新加坡日景同夜景，滿足兩個願望。到咗夜晚，DJ 會開始大播勁歌，而 Club Lounge 酒廊仲會開放舞池，俾大家盡歡一番！呢度不時有微風吹送，唔會太熱，仲有一閃一閃嘅繁華城市燈光喺你腳下，點綴你嘅最強舞姿。

CE LA VI 有推出唔少極具創意嘅雞尾酒，貴少少都值得一試，而小編誠意推介 Singapore Sawa—呢款雞尾酒混合咗粉紅香檳、熱情果味梅酒、薑、箭葉橙同香茅，千祈唔好錯過！仲有 Urban Breeze 呢款雞尾酒，配搭伏特加、熱情果，蔓越莓同西柚梳打，味道清新。

CE LA VI 酒吧融合新加坡最迷人嘅天際線、一流嘅雞尾酒同至潮嘅音樂，鍾意夜蒲跳舞狂歡嘅話，呢度一定啱晒你！要去濱海灣金沙，最簡單嘅方法係乘坐地鐵，喺海灣舫站下車。穿過豪華商場之後，就可以直接入到去酒店嘅巨型大堂。CE LA VI 酒吧的入口位於 3 號塔樓最底。