新加坡知新館 (Singapore Discovery Centre)

知新館裡面嘅部分互動展品專為團體設計，建議參加由館方安排嘅導賞團。每日 10:30 至 16:30 之間，每個鐘都有一團成行—第一節行程會帶你了解新加坡歷史發展嘅來龍去脈，俾你更加明白呢個城市同城中居民；

呢度仲有個幾得意嘅新加坡式英文測試、一張展示島國傳統同和諧嘅精緻織被，同埋一齣名為「十足新加坡 (So Singapore)」嘅短片，專門探索構成新加坡人性格嘅各種特性及行為。嚟到主廳，巨型彩色圓拱屋頂就好似個萬花筒咁，展現新加坡市內周圍嘅地標，配合新加坡居民好熟悉嘅音效—而對於唔係住喺新加坡嘅遊客嚟講，估下呢啲係咩聲，都夠好玩啦！

喺知新館周圍行下，互動展品仲有大把：你可以喺電視錄影室裡面扮新聞主播，報導新加坡重大新聞；你亦可以擔任危機處理團隊成員，防禦新加坡免受襲擊；你仲可以喺模擬戰地指揮遊戲裡面做指揮官，發號司令—而你需要嘅耳機同電腦控制設施，都已經準備妥當。

行出去新加坡知新館主廳外面，有趣體驗同樣數之不盡—iWERKS 擁有全市數一數二嘅大銀幕，播放最新 2D 同 3D 大片，主打小朋友市場；年紀大少少嘅細路一般都比較鍾意 4D 模擬遊樂設施，又或者喺室外彩彈射擊場上互相搏鬥。

你屬意比較平靜、又啱哂全家人嘅活動？不妨去旁邊嘅大湖踩下船仔；你亦都可以搭巴士遊覽新加坡軍事學院—不過呢個行程可能比較吸引對武裝部隊有興趣嘅人 (笑)。喺知新館裡面走上走落，都應該覺得肚餓喇啩？展館裡面設有美食廣場，仲有幾間快餐店，幫你醫肚！

新加坡知新館位於裕廊路上段，距離裕群地鐵站約 10 分鐘步程，而揸車由市區出發，車程大約 30 分鐘。