新加坡牛車水 9 大購物好去處

想了解牛車水市集，最快嘅方法就係行下寶塔街、丁加奴街、西谷巷、史密斯街同廟街等街道嘅商舖同檔攤。呢啲繁忙嘅街道佈滿咗符合遊客期望嘅靚景，幾百個攤位售賣各種貨品、由絲綢長袍到招財貓等等，應有盡有。

除咗購物之外，區內到處都係各式各樣嘅街頭美食車，有新鮮點心同脆皮烤鴨等你品嚐。如果想用最優惠價錢買晒所有嘢，記住要面帶笑容，殺價一番！牛車水市場日頭會營業，黃昏果時亮起燈，就更加璀璨，而小販嘅叫賣聲肯定會引誘你行過去，睇下商品嘅真面目。

喺牛車水購物之後，呢條開滿咗古老店舖嘅迷人街道就係另一個好去處！安祥路有唔少精品小店；同新加坡出晒名嘅大型購物中心相比，呢度嘅貨品更加與別不同，

又以服裝店最多—其中，Umbrella 售賣世界各地嘅時尚女裝品牌產品；部分精品店專賣嚟自亞洲地區嘅彩色派對禮服同獨立品牌出品，等你發掘；想訂製醒神嘅男裝恤衫同西裝，去 Aston Blake 行番轉就啱啦！

呢座奶油色嘅建築外觀睇落一般，但如果你想搵平嘢，呢度就係你嘅最好選擇！丹戎巴葛廣場 (Tanjong Pagar Plaza) 設有 130 間商舖，入口果度被美容院、美甲店同理髮店「霸佔」，其他位置就係買電子產品、文具甚至紡織品嘅好地方。

如果你自認係「美食達人」，不妨去多姿多彩嘅二樓美食廣場，品嚐下特色菜之一：魚湯 (場內五個攤檔都有賣架)！丹戎巴葛廣場以當地人為主要客路，由貨品價錢可以睇得出—如果你預算有限，但又鍾意購物，呢度一定會畀到你難忘嘅體驗。

BooksActually 肯定係新加坡最正嘅獨立書城，書本種類超多，仲有同新加坡新晉作家合作，出版自家讀物。由小說、歷史書、詩集、兒童圖書，到學科補充練習等等，種類超多嘅「書海」一定會令你眼前一亮！

呢間書店除咗藏書豐富，仲有賣周邊商品同文具，你會不知不覺咁陶醉喺呢度。成個書城，每本圖書、每件商品都經過店主精心挑選，難怪咁受歡迎！

裕華國貨喺正一座瑰麗嘅中式立面建築裡面，呢座建築喺本世紀初興建，稱得上係新加坡出名地標；裡面嘅商品嘜都有，包括咗茶業、草本中藥、絲綢、旗袍、手工藝品同古董等正宗中式產品，

質素肯定比市面上搵到嘅其他商品好，而價錢亦只係多少少，相當合理。另一方面，裕華國貨成日都有節日推廣優惠，尤其喺農曆新年等佳節前夕，總有月餅、專運進口海鮮等數唔晒嘅美食，任你選購！裕華國貨佔地七層，每層都有專賣嘅商品，一眼睇晒。

牛車水大廈係新加坡牛車水區內最大型嘅時尚購物熱點，裡面有市場、熟食中心，仲有好多間特色小店。

裡面嘅街市以售賣新鮮食品出名；熟食中心裡面嘅街頭小食款式超多，而且大多數好平。

OG 百貨公司聳立喺牛車水地鐵站上蓋，裡面售賣新加坡家傳戶曉嘅時尚、珠寶、化妝品、腕錶同玩具品牌商品，充滿現代化國際特色，亦吸引咗體育用品、韓國化妝品同進口商品品牌進駐。

OG 百貨公司鄰近經過翻新嘅人民公園中心 (People’s Park Centre)，當地人經常嚟呢度買衫、針織衣料、電器同電子產品、街頭服飾、盥洗用品同行李箱，款款商品都係價錢實惠。呢座購物商場嘅內部裝潢雖然有啲殘舊，但貨品都好平，亦屬「吸客」賣點之一；佢喺正公寓大樓裡面，你可以跟住指示牌，搭電梯到 3 樓就到啦。如果你想搵個地方調劑一下，購物中心裡面仲有好多按摩店，任君選擇。