小印度 7 大最好玩活動

維拉瑪卡里亞曼興都廟 (Sri Veeramakaliamman Temple) 係小印度最瑰麗熱鬧嘅寺廟之一，建於 19 世紀，位處實龍崗路，可以用嚟做婚禮場地同埋多功能展廳。

寺外結構滿佈幾百個迷你彩色雕像，正好打造出一處攝影熱點；寺院本身同樣引人入勝，每逢星期二、五、日都有大批善信嚟到敬拜。維拉瑪卡里亞曼興都廟免費開放，但係入場人士必須穿著端莊，同埋要除鞋，先可以走入廟內。

陳東齡故居係一座兩層高嘅別墅，外牆設計色彩奪目，歷史可以追溯到 1900 年。呢座故居位於加寶路，係新加坡殖民時期建於小印度區嘅少數中式樓房之一。

當地社區重新粉飾陳東齡故居，髹上彩虹色彩，並且用心翻新保養，致使呢座建築聞名遠近。喺故居影相「打卡」之後，你仲可以去附近嘅庭院享用特色印度菜 (biryani)，喺如畫美景嘅襯托下，感受戶外用餐體驗。

驟眼望落去，斯里尼瓦沙柏魯馬廟 (Sri Srinivasa Perumal Temple) 同埋街口嘅維拉瑪卡里亞曼興都廟 (Sri Veeramakaliamman) 外型相似，外牆佈滿密密麻麻嘅印度教文物，紛紛懸吊喺建築主體嘅塔門 (Gopuram) 上面，而全座寺廟都色彩奪目。

斯里尼瓦沙柏魯馬廟供奉奎師那，據聞佢係毘濕奴嘅化身之一；行入寺內，你仲會見到其他印度教諸神嘅雕像，包括吉祥天女、室建陀同哈奴曼。斯里尼瓦沙柏魯馬廟每日朝早同黃昏都會舉行印度教供奉儀式「Pooja」，俾當地人參與。

慕斯達發中心 (Mustafa Centre) 係 24 小時營業嘅購物商場，以低廉價格售賣設計師品牌產品，場內格局有啲似室內市集，狹窄嘅通道上面，擺滿各式各樣嘅貨色。

慕斯達發中心的確係有啲雜亂無章，而且日日都人頭湧湧；不過，如果你想買嘅嘢喺第二度都「遍尋不獲」，嚟到呢度話唔定賣到「成行成市」！

釋迦牟尼菩提迦耶寺 (Sakya Muni Buddha Gaya Temple) 由一位泰國僧人於 1927 年興建，滿載泰式風情，又以 15 米高、重約 300 噸嘅佛像為主要特色。

雕像周圍嘅燈火串連一線，亦都為寺廟冠上「千燈寺」嘅美名。釋迦牟尼菩提迦耶寺位於小印度同法拉爾公園地鐵站之間，免費開放，但係入場訪客必須穿著端莊，以示對其他善信嘅尊重。

阿督卡夫回教堂 (Abdul Gafoor Mosque) 原身嘅歷史可以追溯至 1859 年，當時嘅宗旨係服務南印度穆斯林商人，同埋任職於花拉公園舊馬場嘅工人。經過歷年翻新，呢間回教堂集南印度、摩爾同維多利亞建築風格於一身，別樹一幟，

擁有阿拉伯式玻璃穹頂，又以羅馬式樑柱支撐。一如世界各地嘅好多宗教場所，如果你打算去阿督卡夫回教堂參觀，記住要穿著端莊。

龍山寺專為讚頌慈悲為懷嘅觀音菩薩而興建，成日都迫滿哂一家大細，而善信通常都係祈求仔囡孝順、學業有成；每逢農曆嘅重要節日，寺內仲會免費供應齋菜添！

龍山寺主體結構同中式宮殿相似，成座建築都以鮮紅色同金色點綴，橫樑同埋直柱上面都有好多宗教聖物嘅精細雕刻。