濱海灣花園 (Gardens by the Bay)

濱海灣花園嘅擎天樹

濱海灣花園 (Gardens by the Bay) 佔地 250 英畝，喺正海濱地區；由正對面嘅濱海灣金沙 (Marina Bay Sands) 頂樓望過去，你會一眼睇晒呢片公園嘅廣闊。沿住酒店行人路向前行，你可以輕鬆咁嚟到濱海灣花園，居高臨下欣賞到沿途景色；你亦可以行到路程比較長啲嘅河邊長廊，由 2 個圓頂附近行入公園。

喺公園四周散步完全免費；但如果你想走入恆溫溫室，或喺擎天樹之間散步，就要另外比錢先得。「樹態」鋼架聳立喺濱海灣花園裡面，肯定係成個花園嘅矚目亮點；中央樹林裡面仲有 12 棵大型金屬「鋼樹」，而園內其他地方仲有另外 6 棵「鋼樹」，壯觀宏偉。

花園外面就覆蓋咗超過 200 種植物同花卉，綠意盎然。每晚 19:45 同 20:45，園內會有燈光同音樂表演，光芒四射，一定會畀到你有種置身喺現代童話故事嘅感覺。

鍾意睇風景嘅你，點解唔去全長 25 米、連接 3 棵大樹嘅壯麗行人路行下？園裡面中央嘅 50 米巨樹就將花園到濱海灣全景 360 度睇晒，都係唔可以錯過。

濱海灣花園嘅溫室

如果你需要降降溫，雲霧森林 (Cloud Forest) 就係唔錯嘅選擇—呢座貝殼形建築規模比較細，裡面有 35 米高嘅山丘，到處覆蓋咗熱帶高原常見嘅植物。唔想一步步行上山？有一條電梯可以帶你飛入雲霧裡面，由高向下欣賞由植物同蘭花組成嘅花牆。

花穹 (Flower Dome) 亦比出面涼爽，重現咗加州同地中海等地區嘅乾燥氣候。企喺呢間巨型溫室裡面，你就會好似環遊世界一樣，可以一次過睇晒嚟自非洲嘅猴麵包樹、嚟自西班牙嘅橄欖樹，同埋嚟自澳洲嘅袋鼠爪花。

參觀兩間溫室嘅入場費係成人 SGD28，小童 SGD15。行到肚餓點算？花穹裡面嘅 Pollen 地中海餐廳採用溫室種植嘅香草同蔬菜烹調菜式，令人流晒口水！

花園其他區域

如果你選擇搭地鐵，又喺海灣舫站落車，就要先行過蜻蜓湖 (Dragonfly Lake) 同翠鳥湖 (Kingfisher Lake)。時間充裕嘅話，你可以沿住木板路一直咁行，沿途搵下喺度棲息嘅鳥類同昆蟲身影。

為咗向多年嚟喺新加坡定居嘅唔同國籍人士致敬，園裡面四個相連嘅花園種植咗嚟自印度、中國、馬來西亞同殖民地嘅各種植物同樹木。

除咗 Pollen，以下休閒餐廳亦都值得一試：Cafe Crema 供應三文治同小食，Satay By The Bay 專售沙嗲同各種燒烤食品，另外亦有 Supertree Food Hall 可供選擇。

濱海灣花園位置優越，自然成為遊客暫離新加坡繁忙交通同摩天大樓嘅避世勝地，亦會畀到你一個好玩嘅空間，可以探索世界各地嘅園藝文化。更「抵讚」嘅係擎天樹、雲霧森林同花穹統統都係你前所未見嘅，將植物融入生活裡面，為都市增添綠意！