新加坡怡豐城 (VivoCity)

直銷店分佈喺場內 7 個樓層，囊括你諗得到、諗唔到嘅各大品牌—如果你想搵 Levi's 等等嘅西方牌子，嚟呢度就搵啱地方喇；企喺潮流尖端嘅後生者都好鍾意 Warehouse、Ted Baker 同 Tommy Hilfiger 嘅進口商品；

都市儷人就會喺 T.M. Lewin、Zara 或者 Marks＆Spencer 物色 Smart Casual 返工衫，襯埋靚靚首飾，低調得嚟都可以「Hold 住」全場！爸爸媽媽想買手信俾仔女？喺全新加坡最大型嘅玩具反斗城，就一定搵到心水禮物！怡豐城仲有唔少童裝店，包括 Mothercare 同幾間孕婦裝舖頭，就連準爸媽嘅需要都照顧到。

除咗時裝店，你都可以行下書店、家居用品店、音樂音響店、藥店、珠寶店同運動精品店，而呢度嘅鞋舖都唔少，你話唔定會搵到想儲好耐嘅絕版鞋。另外，知名百貨公司 Tangs 喺怡豐城開咗間精品店，售賣多個高端品牌時裝、名牌傢俱、高級美容產品同化妝品，女士今次一定大出血喇！

怡豐城嘅賣點梗係唔止購物—呢度都係繽紛夢幻嘅娛樂場所，仲一下子晉身「新加坡必到景點」行列添。商場裡面嘅大型多功能戲院擁有 15 個銀幕同 2,172 個座位，就連全亞洲其中一個最大嘅電影銀幕都喺呢度，總長度有成 22.4 米！

大人行得開心，小朋友都一樣玩得盡興—商場設有露天遊樂場，頂樓就係天空公園同露天劇場所在之處，仲可以俯瞰聖淘沙 (Sentosa) 嘅壯麗景色。怡豐城有娛樂生活相關嘅設施服務，一年四季又會舉辦各種慶典活動，你仲唔嚟玩返轉？