濱海灣金沙購物商城 (The Shoppes at Marina Bay Sands)

商場裡面嘅大型玻璃窗、寬敞開放式中庭同中央水景統統令人賞心悅目，盡顯貴氣；貫流其中嘅室內運河特別令人印象深刻，你可以預約坐仿古舢舨船，喺商場裡面兜一圈。舢舨上有專屬船夫，都幾似威尼斯嘅貢多拉船架！

夠鐘開餐？呢度嘅餐廳選擇琳瑯滿目，環球美食包羅萬有，由粵式點心到印度咖哩、意大利 Pizza、日式壽司以至現代法式美食，都一應俱全，明顯主打國際客路。

而且，世界各地嘅星級名廚都有喺商城裡面開設分店，當中包括英國名廚 Gordon Ramsey 主理嘅 Bread Street Kitchen，為客人送上經典英國菜式；而 David Thompson 係倫敦同曼谷知名品牌 Nahm 嘅始創人，都喺度開設咗 Long Chim 泰國餐廳。

濱海灣金沙購物商城同綜合建築內嘅其他部分相連，你可以順道行勻賭場、SkyPark 觀景台同天台酒吧等等奢華景點。濱海灣金沙酒店直通海灣舫站，搭地鐵就可以嚟到。