大邱 14 大最好玩嘅活動
大邱最出名嘅係啲嘜嘢？
1. 不老洞古墳公園 (Bullo-dong Ancient Tomb Park)
推介： 伴侶, 家庭
不老洞古墳公園 (Bullo-dong Ancient Tomb Park) 係一片大型古墳遺址，位於大邱市北面大約 5 公里外，佔地 330,000 平方米，橫跨山谷裡面嘅 200 幾個草丘—呢啲草丘又叫做「墓丘」，歷史可以追溯到 2 世紀同 6 世紀，專為韓國三國時期嘅貴族同平民而建造。
位置： 韓國大邱東區不老洞山 1-17
不老洞古墳公園 (Bullo-dong Ancient Tomb Park)
2. 頭流公園 (Duryu Park)
推介： 伴侶, 家庭
頭流公園 (Duryu Park) 既係韓國最高嘅天文台之一—大邱塔 (Daegu Tower) 所在之處，亦係熱門嘅休閒同文化景點，園內嘅五色噴泉不容錯過，泉水據聞具有治療功效架！參觀公園途中，你仲可以順道探索園內嘅頭流圖書館、大聖寺 (Daeseongsa Temple) 同金蓉寺 (Geumyongsa Temple)。
春天正值櫻花盛放，頭流公園通常都最熱鬧，望落去林木葱鬱，有 133 種樹木同植物散發綠意。公園裡面嘅設施包括柔道中心、溜冰場、泳池同網球場。
位置： 韓國大邱達西區公園順環路 36 號
電話： +82-53-625-1949
頭流公園 (Duryu Park)
3. 大邱國立博物館
推介： 伴侶, 家庭, 歷史文化
大邱國立博物館係市內最大型嘅博物館之一，展示大邱嘅獨特歷史遺產，仲有慶尚北道嘅佛教文化。館內珍藏咗大約 30,000 件源自新石器時代同朝鮮王朝嘅文物，同埋佛教工藝品、雕塑同雕像；
而館外就有一片造景花園，屹立咗幾個石碑，全都由大邱考古遺址出土。大邱國立博物館嘅必睇景點仲包括歷史追溯到高麗王朝嘅 5 層高石塔、青銅時代住宅遺址，以及源於三國時期、經過修復嘅窯。
位置： 韓國大邱壽城區青湖路 321 號
開放時間： 星期二至五 09:00 至 18:00；星期六至日 09:00 至 19:00 (逢星期一休息)
電話： +82-53-768-6051
大邱國立博物館
4. 桐華寺 (Donghwasa Temple)
推介： 歷史文化, 經濟實惠
桐華寺 (Donghwasa Temple；意思係冬天有桐花盛開嘅寺廟) 係八公山南側嘅一座古刹，歷史可以追溯到公元 493 年，係由叫做「極達」嘅僧人喺炤知王統治期間嘅第 15 年建造，
以寺內所種嘅開花梧桐樹而命名。桐華寺嘅誦經殿堂同亭閣都有神話動物同佛教神靈嘅石像作為裝飾；而 17 米高嘅藥師如來佛石像就由信衆所建，目的係向神明祈求國家統一，絕對不容錯過！
位置： 韓國大邱東區桐華寺 1 街 1 號
電話： +82-53-980-7900
桐華寺 (Donghwasa Temple)
5. 禪本寺 (Seonbosa Temple)
推介： 歷史文化, 經濟實惠
禪本寺 (Seonbosa Temple) 建於 9 世紀，位處大邱市東北大約 20 公里嘅八公山山頂，好多當地人都會行足 3 個鐘嚟參拜—適逢佛教慶典期間、以及每個月嘅第 1 天，親臨寺廟嘅信衆就為數更多。
要數禪本寺最受歡迎嘅地標之一，笠岩佛祖定必榜上有 名，佢嘅歷史可以追溯到 9 世紀，據聞仲會幫你實現至少一個願望添！
位置： 韓國慶尚北道慶山市江鶴街 35 號
禪本寺 (Seonbosa Temple)
6. 桂山天主教堂 (Gyesan Catholic Church)
推介： 歷史文化, 經濟實惠
桂山天主教堂 (Gyesan Catholic Church) 建於 1900 年，係嗰段時間唯一留存落嚟嘅建築，揉合羅馬式同歌德式風格，配有彩色玻璃窗同尖塔。
呢座教堂係大邱嘅主要天主教堂區，神父寓所裡面展出咗教堂創始人嘅幾尊雕像，另外仲設有紀念館，擺放 65 位天主教殉道烈士嘅遺骸。大邱桂山天主教堂係嶺南地區第 1 座歌德式教堂，亦係全韓國第 3 座歌德式教堂。
位置： 韓國大邱中區西城路 10 號
桂山天主教堂 (Gyesan Catholic Church)
7. 把溪寺 (Pagyesa Temple)
推介： 歷史文化, 經濟實惠
把溪寺 (Pagyesa Temple) 由新羅王朝嘅興德王於公元 804 年創建，位於大邱市東北大約 20 公里嘅八公山西麓。當地人認為朝鮮王朝嘅英祖特別鍾意把溪寺；而韓國民間故事就相傳：英祖係喺寺內一位佛教法師誦禱咗 100 日之後，先至出世！
呢座寺廟為大邱嘅佛教社區提供服務，寧靜幽麗，周圍環繞住鬱鬱蔥蔥嘅樹木。行入把溪寺嘅主要建築群之前，你會先經過鎮洞樓 (Jindong-nu Hall)，大樓裡面全年都有重要嘅佛教儀式舉辦；另一個不容錯過的景點則是鐘樓，內裡展出的傳統敲擊樂器定會讓你眼界大開！
位置： 韓國大邱東區中大洞 7 號
把溪寺 (Pagyesa Temple)
8. 符仁寺 (Buinsa Temple)
推介： 歷史文化, 經濟實惠
大邱符仁寺 (Buinsa Temple) 嘅歷史可以追溯到 7 世紀，係桐華寺嘅附屬寺廟，亦稱為「新羅王朝善德女王紀念寺廟」，裡面有一座專為女王而建造嘅祠堂，每逢農曆 3 月都會舉辦紀念儀式。
符仁寺內最受歡迎嘅景點之一係西寶塔，相傳佢喺國家統一嘅新羅時代建造。符仁寺全年免費入場，亦都歡迎你酌量捐啲香油錢。
位置： 韓國大邱東區八公山路 967-28
符仁寺 (Buinsa Temple)
9. 大邱溫泉谷 (Daegu Spa Valley)
推介： 伴侶, 家庭
嚟到大邱溫泉谷 (Daegu Spa Valley)，你可以放鬆身心，享受溫泉體驗。呢座綜合建築群嘅室內大樓一樓設有健身俱樂部同手信店，二樓配置咗好多個溫泉池、蒸汽浴室、草藥浴池、兒童泳池同汗蒸幕 (jjimjilbang；韓式桑拿房)；
而室外嘅水上樂園就由青年泳池、水球池、波浪池、滑水道同 跳水池所組成。大邱溫泉谷成日都吸引希望試下韓國傳統水療護理嘅旅客湧至—無他，皆因桑拿式汗蒸幕一向都以改善血液循環同肌膚氣色而聞名！
位置： 韓國大邱達城郡嘉昌面嘉昌路 891 號
開放時間： 營業時間因應季節而異
電話： +82-1688-8511
大邱溫泉谷 (Daegu Spa Valley)
10. 八公山自然公園 (Palgonsan Natural Park)
推介： 伴侶, 家庭, 經濟實惠
八公山風光不殊，而八公山自然公園 (Palgonsan Natural Park) 喺正山上，鬱鬱蔥蔥，園內有壯麗嘅花崗岩石堆、交織嘅岩層、茂密嘅森林同秀麗嘅山谷。呢片公園坐落於大邱市東北 20 公里，有風景怡人嘅步行徑蜿蜒其中，吸引無數登山客湧至，漫步行去桐華寺 (Donghwasa Temple)、禪本寺 (Seonbosa Temple) 同把溪寺 (Pagyesa Temple) 等佛教聖地。
八公山自然公園一年四季都值得遊覽—春風送暖，你會欣賞到杜鵑花盛開；秋意漸濃，你就可以沿住園內全長 15 公里嘅小路靜賞秋葉；隆冬及至，你仲可以沉醉於純淨雪景之中。
位置： 韓國大邱東區笠岩路 229 號
八公山自然公園 (Palgonsan Natural Park)
11. 瑜伽寺 (Yugasa Temple)
推介： 歷史文化, 經濟實惠
瑜伽寺 (Yugasa Temple) 位於琵瑟山嘅西麓山谷，係大邱最隱秘嘅景點之一，由叫做「道成國師」嘅佛教法師於公元 827 年建成，因為位處鄉間，所以深受鍾意冥想靜修嘅人士歡迎。
寺廟四周圍都係岩石峭壁同埋山峰，風光不殊；附近嘅石佛塔歷史就可以追溯到朝鮮王朝；仲有道成庵 (Doseongam) 同修道庵 (Sudoam) 兩座佛教庵院，喺正寺廟後邊。
位置： 韓國大邱達城郡瑜伽面陽里 144 號
瑜伽寺 (Yugasa Temple)
12. 大邱方字古銅器皿博物館 (Daegu Bangjja Brassware Museum)
推介： 伴侶, 家庭, 歷史文化
大邱方字古銅器皿博物館 (Daegu Bangjja Brassware Museum) 展出方字 (bangjja；手工鍛造) 古銅器；而呢種器皿往日曾經用嚟盛載韓國宮廷食品，歷史可以追溯到青銅器時代，延至全段高麗同朝鮮王朝年間，都廣為使用。
博物館裡面有兩層專門舉辦展覽、文化體驗同數據研究—喺古銅器文化大廳度，你可以細賞方字古銅器真品，透過資訊豐富嘅展品，更加深入了解韓國嘅銅器歷史；嚟到古銅器製作重現室，裡面嘅展品就重現咗第一次生產同交易銅器嘅地方，令人眼界大開！
位置： 韓國大邱東區道藏街 29 號
開放時間： 4 至 10 月：星期二至日 10:00 至 19:0011 月至 3 月：星期二至日 10:00 至 18:00 (逢星期一休息)
電話： +82-53-606-6171
大邱方字古銅器皿博物館 (Daegu Bangjja Brassware Museum)
13. 大邱文化藝術中心 (Daegu Culture and Arts Center)
推介： 家庭, 歷史文化
大邱文化藝術中心 (Daegu Culture and Arts Center) 全年都有各類現場節目上演，為戶外舞台、展覽廳同 2 座表演劇院添賦精彩！其中，主劇院會用嚟舉辦歌劇、音樂會同舞蹈活動；另一個劇院就主要舉辦戲劇表演同個人演奏會；
戶外舞台可以容納超過 25,000 位觀衆，規模屬全韓國數一數二。大邱文化藝術中心嘅世界級音樂劇、戲劇、音樂會同歌劇節目年中無休 ，如果你鍾意藝術同音樂，呢度就係你嘅必遊之地，記得提前訂飛啊！
位置： 韓國大邱達西區公園順環路 201 號
開放時間： 開放時間因應表演及展覽而異
電話： +82-53-606-6114
大邱文化藝術中心 (Daegu Culture and Arts Center)
14. 琵瑟山自然休養林 (Biseulsan Recreational Forest)
推介： 伴侶, 家庭, 經濟實惠
琵瑟山自然休養林 (Biseulsan Recreational Forest) 廣納著名嘅奇岩結構、純淨嘅溪流同埋壯麗嘅懸崖峭壁，位處達城郡嘅兩座山峰之間，設有兒童水上遊樂場，仲有露營場地同森林小屋可以租用，絕對算得上係「合家歡旅遊勝地」。
每年春天，遊客都可以喺呢度欣賞粉紅色嘅杜鵑花絢麗盛開；到咗冬季，琵瑟山自然休養林旋即化身戶外主題公園，有冰柱山、雪橇、冰園同冰窟，樂趣紛呈！
位置： 韓國大邱達城郡瑜伽面休養林街 230 號
電話： +82-53-659-4400
琵瑟山自然休養林 (Biseulsan Recreational Forest)
此文章含有 Go Guides 編輯團隊的個人意見。Hotels.com 會向於本網站上撰文的作者付費，其中或包括旅遊及其他費用。