大邱 7 大最正購物商場

鳳德市場 (Bongdeok Market) 係位於鳳德洞嘅傳統市集，以相宜價格售賣衫褲、小食同新鮮農產品。同大邱嘅其他市場相比，鳳德市場規模比較細；但係如果你肯抽啲時間行下場內攤檔，就一定會買到價廉物美嘅各式韓國商品！

七星市場 (Chilseong Market) 由大邱太平路區內 7 個小型市集組成，歷史可以追溯到日據時代，一向都係韓國漁民同農夫大力推崇嘅交易場地。

另一方面，呢度亦係購買農產品嘅好地方，因為大邱水果蔬菜市場、蘋果市場、北門市場 (Buk-Mun market)、三星市場 (Samsung market) 同景明市場 (Kyeonghyeong market) 都喺附近！七星市場仲會以實惠價格拍賣優質蘋果，你又點可以錯過？

大邱藥令批發市場 (Daegu Herb Wholesale Market) 早於 1658 年建成，設有唔少茶品店、草藥店同診所，而部分診所仲請到專研朝鮮王朝東方醫學嘅醫師駐診！

望勻市場各處，亞洲遊客絡繹不絕，大家都專誠嚟買人參、枸杞、菇菌同銀杏等等嘅優質草藥；每年五月，藥令市場就會舉辦醫學節，活動多采多姿，包括民間音樂會、藥草展覽同切藥草比賽。

大邱時尚珠寶專區係一條專售「潮爆」珠寶首飾嘅購物大道，位於桂洞街，由幾十家商舖同小型工場組成，歷史可以追溯到 1970 年，

又以「時尚珠寶中心」為必到景點—呢座 8 層高嘅綜合大樓開滿哂批發商店、珠寶加工場、手作體驗室同設計研究中心，樂趣紛呈！

西門市場 (Seomun Market) 創於朝鮮王朝年代，係大邱最古老嘅傳統市集之一，裡面有超過 3,500 間商舖，銷售各種商品，當中包括優質紡織品、手工藝品、銀器同海味。

無論日夜，西門市場都繁華擠迫，尤其是夜晚特別熱鬧—太陽落山之後，市場就會「變身」成為食品市集，必試名物包括牛直腸 (makchang) 同辣炒年糕 (tteokbokki)。

美狐街 (Yasi Golmok Street) 設有幾十間精品店，專賣時裝同鞋類，啱哂後生女！你可以用相宜價格買到至潮商品，當中唔少貨色仲係嚟自首爾嘅東大門同南大門市場添！溫馨提示：呢度嘅衫褲採用亞洲尺碼製造，或者同國際尺寸有啲差異。

與此同時，美狐街亦係市內年輕人嘅熱門「蒲點」，設有卡拉 OK 吧、酒吧同 Café，「血拚」到攰喇，可以入去抖返下。