首爾 5 大街頭市場

南大門市場 (Namdaemun Market) 創於 1400 年代初，係韓國最繁華嘅市集之一，滿載傳統風尚，以首爾南大門命名，而南大門正是古代人出入城區的主要門戶。身處市場內，你可用實惠價格買到優質皮具、服裝、工藝品、進口商品、餐具、電子產品以及傳統東方藥品；

而當地人日間更會嚟到呢度購買雜貨以及家居用品，為呢個名勝增添「貼地」特色！南大門市場嘅批發手工藝品以及食品特別出名；每逢 23:00 至 04:00，呢度就會化身成充滿活力嘅夜市，相當好行。

東大門市場設有約 26 間商場、30,000 間專賣店以及 50,000 間製造商，係韓國最大型嘅批發零售購物區之一，貨色從紡織品、服裝、鞋具、珠寶，以至皮革製品、玩具、電子產品以及辦公用品等，都應有盡有。

另一方面，東大門市場都係個美食天堂，入面有條「吃巷子 (Mukja Golmok)」美食街，專門售賣韓國街頭小吃以及零食。夜幕低垂，購物區依舊人頭湧湧，全年更有慶典、時裝表演、音樂以及舞蹈節目等精彩活動上演，樂趣紛呈。

廣藏市場嘅歷史可以追溯到 1905 年，係韓國首批常設街頭市場之一，雖然呢度以布料以及紡織品選擇眾多而聞名，但你都可以喺場入面搵到廚具、進口產品、蔬果及乾貨。好多當地人都會嚟到廣藏市場，購買韓國典儀用品以及傳統婚禮用品，例如韓服 (hanbok；即韓國傳統服裝) 以及幣帛 (pyebaek；即準新娘為未來夫家準備嘅婚禮食物)。

市場地面樓層設有數十個小食檔以及餐廳，比你喺購物之餘，可以享用到正宗韓式料理；而一樓就開設了好多裁縫店，你可以用合理價格購得民族服裝。

由首爾火車站乘搭火車，15 分鐘即可抵達鷺梁津水產批發市場 (Noryangjin Fisheries Wholesale Market)！要數參觀市場嘅最佳時份，非日出之際莫屬。到時，入面將會進行海鮮拍賣，而場入面約有 800 個商販，皆以極其實惠嘅價格出售新鮮捕獲嘅海產；市場上層尚設幾間供應韓國菜以及日本料理嘅餐廳，比你大快朵頤。

京東市場 (Gyeongdong Market) 入面有 1,000 多個攤位，出售自製藥品、根莖植物、香草以及香料，別具特色！呢個街頭市場位於東大門 (Dongdaemun)，因以合理價格專售亞洲草藥以及藥品，所以特別受中國以及日本遊客歡迎。

行入市場，你就會感受到濃郁嘅草藥香氣；而呢度最受歡迎嘅商品包括回復血氣嘅紅參、改善血壓問題嘅梅實，以及可沖製清涼飲料嘅菊花。