首爾 18 大出色餐廳

首爾新羅大酒店嘅羅宴 (La Yeon) 餐廳以高級餐飲形式供應韓國傳統美食，主廚金成一屢獲殊榮，擅長用最優質嘅當地時令食材，炮製出各種各樣嘅高級韓式料理。

餐廳位於 23 樓，可以俯瞰首爾繁華市中心，而且內部裝潢高檔精緻，配襯白色傢俱以及木製擺設，相當賞心悅目。羅宴餐廳備有 4 款套餐菜單，按季節供應，每款都包含主菜、甜品以及韓國茶；而食客亦可以選配葡萄酒。

定食 (Jungsik) 餐廳位於江南區，對韓國料理有獨特嘅演繹，服務無微不至，私人空間十足，所以絕對係浪漫晚餐嘅熱門場所。店內試菜餐牌嘅價格由 KRW150,000 起，

你可以食到海膽韓式拌飯 (bibimbap；即傳統肉類以及蔬菜拌飯)、燒五花肉 (samgyeopsal；即香脆五花肉配各式泡菜以及小蘑菇) 以及濟州脆皮鯛魚，各種美食等你嚟試！至於甜品方面，定食餐廳嘅招牌朱古力慕斯絕對不容錯過。呢款甜品放喺傳統嘅小泡菜罐中奉客，配上蛋糕屑以及可食用花卉，既好味又好睇。

Pierre Gagnaire a Seoul 餐廳位於首爾樂天酒店 35 樓，係間頂級法國餐館，坐擁北漢山以及首爾市中心嘅壯麗景色，有 4 間私隱十足、風格時尚嘅用餐室，而餐區裝潢就參考凡爾賽宮嘅秘密花園嚟設計，瑰麗堂皇。

食物方面，Pierre Gagnaire a Seoul 供應別富藝術感嘅法國菜，其中又以醃鱸魚配芹菜以及豆芽、豬腰肉配奶油梨、蜂蜜香醋雪葩絕對不容錯過。餐廳另備有嚟自勃艮第 (Bourgogne)、盧瓦爾 (Loire) 以及阿爾薩斯 (Alsace) 地區嘅 250 多種法國葡萄酒，任你品嚐。

Ryunique 餐廳主打融合了法國、日本、西班牙以及意大利風格嘅韓式美食，選擇多樣，令人口水直流！呢間屢獲殊榮嘅餐廳以淺色木桌配襯鮮花裝潢，自然光線充足，處處散發住樸實不華嘅高級餐飲風格。

店內嘅五道菜午餐以及晚餐菜單價格喺 KRW38,000 到 KRW120,000 之間，菜式採用現代化方式烹製，擺盤別具先鋒派藝術感，精選菜式包括大豆醬醃蝦 (配綠芥末葉乾與炸甘露子) 以及烤豬腩肉配真空低溫煮大蝦。

豆豆 (Congdu) 餐廳喺傳統韓式料理中加入現代化口味，引人入勝！呢間餐廳位於德壽宮 (Deoksugung Palace) 後方嘅首爾歷史博物館內，由於無告示牌嘅關係，所以都幾難搵到。不妨留意美國以及英國大使館之間嘅傳統韓式建築，正係博物館嘅所在之處。

豆豆餐廳嘅美食風味精妙，擺盤無可挑剔，值得一試嘅菜式包括慢烤 48 小時嘅濟州黑豬肉、大麥韓式拌飯 (bibimbap) 配棕豆醬，以及豬腩肉配醃蠔以及羽衣甘藍捲。甜品方面，豆豆餐廳嘅豆腐忌廉提拉米蘇配濃縮咖啡以及松子醬可謂不容錯過！

土俗村 (Tosokchon) 嘅招牌菜人參雞湯 (samgyetang) 屬韓國數一數二，同時亦正係韓國人夏季最常食嘅菜式之一。由景福宮站行 10 分鐘就會搵到呢間餐廳，而佢亦都係韓國已故總統盧武鉉最喜愛嘅食店，難怪會成為首爾地標。

土俗村嘅人參雞湯全部都係用慢火熬製幾個鐘而煮成，帶有甜味以及堅果香氣；湯內有一隻雞齡不超過 49 日嘅春雞，裡面塞滿栗子、大蒜、乾棗、人參、糯米以及銀杏果仁，味道相當有層次。土俗村仲提供烤雞 (tongdak)、海鮮蔥餅 (hae-mool pajeon) 以及紅燒香辣安康魚 (agu-jjim) 等菜式。

炸雞係首爾嘅傳統「收工小食」，而位於江南區嘅한추 (Han Chu) 韓式炸雞餐廳正係品嚐呢款酥脆美食嘅最佳去處！呢間平實嘅餐廳位於狎鷗亭站附近嘅街路樹街高檔時裝專區，

店內嘅招牌炸雞 (價格從 KRW17,000 起) 肉汁豐富，外層嘅薄身炸粉令每一啖都同樣鬆脆美味，配埋冰凍啤酒就更加滋味！其他大熱菜式包括炸釀豬肉青椒及惹味蜆肉麵。

N Grill 餐廳位於地標 N 首爾塔入面，係一間旋轉餐廳，食客可喺店內一邊品嚐全套晚餐，一邊欣賞首爾都市璀璨景色。餐廳位於頂層，氣氛獨特，私隱十足，有唔少夫妻情侶都會嚟享用浪漫晚餐，尤以大時大節更特別受歡迎。

N Grill 主打種類繁多嘅葡萄酒及優質法國菜，招牌菜式包括炸醃羊扒配熟芝麻菜及小茴香原汁、鱸魚配櫛瓜及茴香沙律，以及烤原隻龍蝦配新鮮意粉及蔬菜沙律。

楓樹屋係韓式燒烤餐館，喺首爾設有多間分店，而梨泰院 (Itaewon) 門市就以肉汁豐富嘅烤肉馳名，大受歡迎。餐廳採用酒吧風格設計，配上和暖燈光、木製傢俱、質樸裝飾以及落地玻璃窗，

菜式包括正宗韓式料理，例如朝鮮冷面 (naengmyeon) 以及泡菜燉鍋 (kimchi jjigae)、烤牛肉、豬肉以及海鮮，而招牌菜天夾 (cheongyeop) 更加係必食推介。將豬肉用炭火燒烤，然後再以發酵芝麻葉包裹，洋溢住地道風味！

娜麗食堂 (Na Ri Sik Dang) 位於梨泰院 (Itaewon)，以廉價而正宗嘅韓國燒烤菜式大受當地人歡迎！呢間小區食肆距離漢江鎮 (Hangangjin) 火車站 2 分鐘步程，位置相當隱蔽，因此食客大多係梨泰院附近嘅居民。

與首爾大多數燒烤餐廳相比，娜麗食堂價錢相當實惠，招牌燒烤豬腩肉價格約為 KRW11,000；大醬燉肉就索價僅 KRW7,000。

가온 (Gaon) 係首爾最高級嘅餐廳之一，樓高 3 層，經過精心設計，每層樓都有唔同嘅圖案以及設計風格，一面牆身用彩色光棒拼成，另一面用舊報紙鋪製，第三面就以裝滿豆子嘅透明膠盒拼砌，別樹一格。

菜式方面，店內餐牌羅列韓國最優質嘅經典佳餚，招牌菜係朝野蘿蔔泡菜配蠔，以及海鮮煎餅 (hae-mool pajun；即加入滿滿嘅扇貝、魷魚以及章魚嘅厚煎餅)。餐廳另有提供各款葡萄酒以及傳統韓式飲品。

廣藏市場 (Gwangjang Market) 係韓國首批常設街頭市場之一，鄰近鐘路街 (Jogno-ga) 站 8 號出口，以場內多不勝數嘅傳統韓式美食而聞名。

除了購物之外，你仲可到一樓嘅數十個小食檔以及餐廳，享用正宗韓式料理；而二樓設有多間裁縫店，令你可以用合理嘅價格購買民族服裝。

弘益碳烤排骨 (Hongik Sootbul Kalbi) 係鄰近弘益大學嘅韓國燒烤餐廳，食品價格經濟實惠，以優質牛肋骨 (galbi) 為招牌菜。餐廳用炭火而非電爐來燒烤，風味十足，

店員通常都會為你完成大部分烹調工序，但其實烤肉方法很簡單，只須將肉片放在灼熱炭爐上，煮熟後用生菜包裹，配以自選配菜品嚐，一口咬落去，即刻美味無窮！離開餐廳嘅時候，你一定會成身烤肉味，足以證明啲烤肉有幾香！

南大門市場 (Namdaemun Market) 嘅刀切麵巷 (Kalguksu Noodle Alley) 有好多食檔出售韓式刀切湯麵 (kalguksu)、燉太刀魚 (galchi-jorim) 以及蔥餅 (pajeon)。呢條狹窄嘅小巷成立於 1988 年，係首爾最繁忙嘅美食街之一，上午以及下午都會擠滿肚餓嘅旅客，建議你早啲前往。

明洞咸興麵屋 (Myeongdong Hamheung Myeonok) 餐廳係喺首爾享用便餐嘅好地方，歷史可以追溯到 1980 年代，位於明洞大教堂附近，以北韓風格朝鮮冷面 (naengmyeon；即冷蕎麥麵) 為招牌菜；你亦可以喺辛辣嘅麵上加入薄切生肉片，一同享用。

想享用佛廟風格嘅素菜？山村 (Sanchon) 餐廳正係你嘅不二之選！呢間簡樸嘅餐廳由前佛教僧侶創建，飾有佛教藝術品、傳統陶器以及紙燈籠，裝修得唔似食肆，反而比較似係佛舍。

店內設有單點菜單，而 16 道菜午餐以及晚餐菜單亦都非常受歡迎，菜式會隨季節而變化。每晚 20:00，餐廳仲會有韓國舞蹈表演助興，等你邊食邊睇，帶嚟雙重享受。

Smokey Saloon 餐廳係梨泰院站 (Itaewon Station) 2 號出口附近嘅美式漢堡店，非常受旅客歡迎，為喺首爾旅途中掛念多汁漢堡包嘅食客「止止癮」！餐廳喺首爾嘅狎鷗亭 (Apgujeong)、大峙 (Daechi) 以及二村 (Ichon) 地區設有多間分店，菜式種類繁多，基本上都採用以鹽以及胡椒調味嘅厚牛肉餅製作，

招牌漢堡「Smoky Burger」喺兩塊漢堡包之間放有 2 塊煙肉、燒烤醬、醃菜以及車打芝士；另一款必試之選就係「Ambulance Burger」，包裡夾有煎蛋、薯餅、3 塊煙肉、美式芝士以及蛋黃醬，滋味無窮。