首爾市內交通

首爾地鐵系統係周遊市內嘅便捷之選，各條地鐵線以不同顏色代表，更配有全面地圖，以及韓文、英文以及中文指示標誌。首爾地鐵由 1 號線至 9 號線、中央線 (Jungang Line)、盆唐線 (Bundang Line) 以及京義線 (Gyeongui Line) 組成，從 05:30 至 00:00 幾乎不間斷運行。

A'REX 就係首爾嘅機場鐵路線，連接仁川國際機場 (Incheon International Airport)、金浦國際機場 (Gimpo International Airport) 同首爾市中心。從仁川國際機場出發，乘坐特快列車前往首爾站，全程唔洗 50 分鐘。

地鐵票價根據年齡範圍而有所不同，遊客可以選擇單程交通卡或多程交通卡，前者收取按金，而你可以喺目嘅地將車票放進按金退款裝置，取回按金。單程交通卡嘅價格分別約為 KRW1,150 (成人)、KRW1,000 (青少年) 以及 KRW500 (小童)；多程交通卡嘅費用分別約為 KRW1,050、KRW900 以及 KRW450。

首爾地鐵站仲備有唔少設施服務，包括旅遊資訊中心、外幣兌換店、自助儲物櫃以及電話充電站等；另有便利店、餐廳以及商店，滿足你嘅購物同餐飲需要。

一如地鐵系統，首爾巴士路線亦都係以不同顏色代表：藍色巴士喺首爾主要道路上行駛；綠色巴士行駛較短距離，同埋接載乘客往來轉車站 (例如地鐵站)；黃色巴士喺市內中央地區按循環路線行駛；而紅色巴士就係由首爾市中心開往城郊地區。

乘客可以選擇喺上車時支付現金，或使用 T-Money。呢種預付交通卡會喺刷卡時自動扣款，你亦都可以透過自動增值機增值，儲值金額為 KRW1,000 到 KRW50,000。

首爾市內幾乎到處都可搵到的士！呢啲的士主要分為 3 種，全都設有咪錶，按照距離以及時間決定車費。喺首爾經營嘅的士大都接受現金、信用卡以及預付公共交通卡 (T-money 卡) 付款。

適逢高峰時段，又或當地鐵以及巴士於午夜過後停駛，你仍然可以喺主要景點、購物區及夜生活區一帶尋找的士站，搭車返屋企。溫馨提示：喺上述時段內，的士車費會調升 20％，所以記得要提前規劃深夜行程。喺首爾你唔一定要比小費，但強烈建議支付整數車資，找嘅錢就可以當係小費。

普通的士

首爾嘅普通或者標準的士車身係橙色，車費最平。首 2 公里車資只需 KRW3,000，其後每 142 米另加 KRW100。身處首爾街頭，你可輕鬆截得的士。

豪華的士

豪華的士通常喺知名酒店以及旅遊勝地附近營運，車費比普通的士高出 40% 至 50%，優點在於司機會講英文、座位更寬敞、服務更安全，同埋不設深夜附加費。首爾嘅豪華的士易於識別，黑色車身帶有金色條紋，兩側應會印有「豪華的士 (Deluxe Taxi)」標誌。

國際的士

首爾設有特殊嘅國際的士服務，由精通英文、日文或中文嘅司機駕駛，同豪華的士相似，車身同為黑色，但兩側標有「國際 (International)」標誌。國際的士通常須提前預約，但亦都可以喺街上截到；呢種的士設有咪錶，但係由仁川國際機場去首爾市中心嘅行程就劃一收取 KRW65,000。

大多數便利店、地鐵站以及旅遊資訊中心都有售首爾旅遊通行卡，比你輕鬆喺首爾到處遊覽，避免常見嘅旅行麻煩，例如「排長龍」以及零錢不夠等。呢啲通行卡嘅價格由 KRW3,000 起，可以用嚟支付地鐵、巴士以及的士車費，以及喺便利店購物時付款。首爾旅遊通行卡分為 3 種：T-Money、T-Money Mypass 以及 Seoul Citypass Plus。

T-Money 卡

T-Money 卡係標準交通卡，可用於首爾任何公共巴士、地鐵、的士以及多間便利店，同埋提供適用於巴士以及地鐵嘅 KRW100 折扣優惠，以及巴士地鐵轉乘折扣。喺轉乘交通工具之間嘅 30 分鐘內，只需要喺地鐵或巴士上、落車時喺感應器上拍一下 T-Money 卡，你嘅總票價就會當做連續乘坐交通工具計算。

T-Money 卡不設到期日，任何未使用嘅餘額將會保留，直到下次使用為止。如果餘額少於 KRW20,000，你可以喺便利店退款，但須支付附加費；超過該金額嘅餘額就只能喺首爾城市大廈嘅 T-Money 總部退款。

T-Money Mpass

如要多次乘坐交通工具，最好嘅選擇係 T-Money Pass。呢張卡可喺仁川國際機場嘅旅遊資訊中心、明洞嘅首爾全球文化旅遊中心以及江南旅遊中心購買，每日用於地鐵以及巴士最多 20 次。

Seoul Citypass Plus

Seoul Citypass Plus 同 T-Money 卡功能相似，但附帶額外嘅旅遊優惠。有咗呢張卡，旅客唔單止可以每日乘坐首爾公共交通工具多達 20 次，仲可以喺景福宮 (Gyeongbokgung)、昌德宮 (Changdeokgung)、昌慶宮 (Changgyeonggung)、德壽宮 (Deoksugung)、宗廟 (Jongmyo Shrine) 以及好多便利店付款，同埋喺幾十個主要景點、餐廳、展覽以及美容院享受折扣優惠。