首爾 9 大購物商場

明洞樂天百貨 (Lotte Department Store Myeongdong) 係首爾最大嘅購物商場之一，商品琳瑯滿目，由服裝、飾品、珠寶、美容產品、傢俱、電子產品到運動器材都應有盡有，而且更設有免稅店同埋畫廊，仲有供應各式地道同埋國際美食嘅美食廣場。

你甚至可以安排將買到嘅戰利品直送機場，極之方便！樂天百貨仲同首爾樂天酒店 (Lotte Hotel Seoul) 直接相連，方便住客購物一整日後好好休息。

Starfield COEX Mall 擁有超過 300 間商店，出售服裝、化妝品、電子產品、珠寶等，書迷一一定唔可以錯過場內嘅 Starfield 圖書館 (Starfield Library) 。身處館中，13 米高嘅書架上擺放住超過 50,000 本刊物，極具書卷味！

小朋友可以喺 Bricklive 中心盡玩五顏六色嘅 Lego，每位兒童 (1 歲及以上) 嘅入場費為 WRN10,000，每位成人為 WRW5,000。

Mecenatpolis 購物商場毗鄰合井 (Hapjeong) 車站，係一個露天購物商場。呢度有活力十足嘅公共空間、層級陽台、玻璃橋、獨特嘅水景同天台花園，難怪會成為人氣攝影勝地！

行到餓嘅話，購物商場內仲開設咗幾十間快餐連鎖店、Cafe、同埋高檔至親民風格嘅餐廳，並提供露天餐飲選擇。露天花園一年四季都會舉辦各種精彩活動，包括藝術展覽、文化慶祝活動同埋音樂表演。

時代廣場購物商場 (Times Square Mall) 內有新世界百貨 (Shinsegae Department Store)、戲院、書店、多功能表演中心同埋遊戲中心，仲有好多 Cafe、餐廳同酒吧，供應種類繁多嘅美食。

商場樓高 5 層，國際品牌眾多，包括 Zara、Adidas、Onitsuka Tiger、Timberland 同埋 Swarovski 等都有！鍾意電影嘅話就唔一定可以錯過 CGV Starium 戲院，呢間戲院內有世上數一數二最大嘅影院，俾你盡情欣賞最新大熱電影。血拚一整日後，一於到時代廣場購物商場嘅戶外空間生態公園 (Ecology Park)，好好放鬆一下！

都塔購物商場 (Doota Mall) 位於斗山塔 (Doosan Tower) 內，喺東大門歷史文化公園 (Dongdaemun History & Culture Park) 西北方向約 300 米外，內有 600 幾間商店，營業至凌晨 05:00，售賣至潮時裝商品、紀念品同埋奢華古董。

除咗 Calvin Klein、Reebok、Boy London 等國際品牌外，仲有近 40 位當地設計師進駐。呢啲設計師都係通過一年一度嘅「都塔新晉設計師大會 (Doota Venture Designer Conference)」選拔出嚟嘅精英。都塔仲為外國旅客提供改衫同退稅服務，非常貼心周到！

Noon Square 購物商場內嘅環球時裝品牌數之不盡，包括 Mango、Steve Madden、Jessica Simpson、H&M 同 ZARA 都有。呢度亦係選購當地品牌服飾、鞋具、首飾、珠寶、手袋、化妝品同護膚品嘅熱門勝地。

呢座商場位於明洞 (Myeongdong)，距離明洞亂打劇場 (Myeongdong Nanta Theatre) 同明洞大教堂 (Myeongdong Cathedral) 等人氣景點只有 10 分鐘步程。Noon Square 更設有全首爾第一部室外電梯，等遊人飽覽購物區嘅繁華街景。

I'Park Mall 購物商場分為 3 個主要區域：I'Park 百貨公司 (I’Park Department Store)、數碼購物中心 (Digital Shopping Centre) 同活動公園 (Event Park)。呢座 11 層高嘅購物商場同龍山站 (Yongsan Station) 同韓國高速鐵道 (KTX) 車站相連，去首爾市區及其他地區都非常方便。I'Park Mall 佔地極廣，正因為咁，商場貼心為遊客提供免費導賞團，向大家介紹商場嘅主要特色、商店同活動。

呢度無論係運動器材、傢俱、時裝，定係家用同數碼電器，種類都非常之多。除此之外，商場內仲開設咗 100 幾間餐廳、Cafe、酒吧同巨型美食廣場，俾你隨時大飽口福！商場仲設有書店、遊戲機中心、露天花園、數碼戲院同埋 E-mart (南韓最大嘅折扣購物商場之一)，設施豐富多元化。

D-Cube City 購物商場同新道林 (Sindorim) 站相連，可直達首爾地鐵 (1 號線同 2 號線)，搭地鐵前往首爾嘅衛星城市安山 (Ansan)、水原 (Suwon)、仁川 (Incheon) 同埋富川 (Bucheon)。D-Cube City 嘅「韓國市場街」係仿照韓屋 (韓國傳統民房) 設計嘅食肆，供應韓式美食。

除咗購物之外，你仲可以喺 D-Cube 劇院同 Space Sindorim 劇院欣賞戲劇、音樂劇同展覽，小朋友更可以喺 Pororo 主題公園玩盡各種有趣嘅遊樂設施同遊戲。

美利來購物商場 (Migliore Mall) 係東大門專賣時尚服飾嘅商場，內有幾百間批發店、價格相宜嘅服裝精品店、專賣店，仲有間 Cafe。呢度嘅商品價錢平，由正裝、休閒服、孕婦裝、玩具、鞋具、手袋背嚢同紀念品都一應俱全。

商場嘅顧客主要係青少年同年輕人，代表商品嘅尺寸範圍可能頗為有限。但往好嘅方面睇，呢度嘅價格比首爾大多數購物商場低 40% 左右，而且仲可以同商販講價，用更低價錢買到心水之選！