宜蘭 12 大最好玩嘅活動

羅東夜市位於中山公園區，係宜蘭最具活力嘅地方之一，不單止提供極佳嘅購物體驗，而且仲有街頭小販同咖啡廳，供應令你流曬口水嘅台灣地道美食。呢個市集儘管名為「夜市」，卻於清晨「開檔」，營業至夜深。

如果你只係想隨便行吓，盡情吃喝，唔想煩惱諗行程，羅東夜市正係你嘅必遊之地，場內最受歡迎嘅小食包括當歸羊肉湯、米粉湯同埋冰鎮粉圓，仲有宜蘭糕點、熏鴨肉同鴨賞等等嘅著名美食，你豈能錯過？

龜山島係宜蘭嘅主要景點之一，因歷年火山活動頻繁而呈現海龜形狀，並順理成章以此命名。要到呢個偏遠景點參觀，你必須先申請許可，而通常獲准登島嘅旅客人數都會受到一定限制。身處島上，你既可觀鯨，亦可以由全台灣數一數二嘅有利方位細賞日出美景。

安農溪以景色壯麗嘅激浪漂流熱點而聞名，另外仲有許多規模較小嘅名勝，故極受遊客歡迎，亦令區內唔少廉價酒店同高級酒店應運而生。除咗超卓激浪漂流勝地之外，呢度嘅歷史古跡、以至未經人工破壞嘅天然景點同樣值得一遊！

太平山國家森林遊樂區位於大同鄉內，整片「休憩帶」皆圍繞著海拔約 2,000 米高嘅太平山而建—雖然呢座山一年四季都被霧氣籠罩，但只要立足山峰，即可遠眺周邊地區嘅壯麗景色，亦係台灣少數嘅賞雪勝地之一。山峰下面嘅森林物種繁多，舉凡柏樹、鐵杉等植物統統引人入勝。熱愛大自然嘅你，嚟到宜蘭點可以唔去太平山地區一遊？

呢區核心地域嘅溫泉據說具有療癒功效；而大名鼎鼎嘅「蹦蹦車小徑」亦喺區內—呢條小徑過往曾用作運輸原木同木材，如今開放遊客參觀，乘搭蹦蹦車沿徑漫遊，絕對係難忘體驗！太平山地區嘅有趣景點多不勝數，建議預留充裕時間觀光，方可將地道風情盡覽無遺。

顧名思義，宜蘭酒廠甲子蘭酒文物館主打同美酒相關嘅收藏品同紀念品，獨一無二。呢間文物館位於台灣其中一間最古老嘅釀酒廠之內，想一睹古法釀製醇酒過程嘅你，絕對不容錯過；而館內仲開咗一間手信小店，你就可以將遊覽回憶帶返屋企啦！

宜蘭縣史館展出日治時代嘅古老文物和紀念品，引領你親身體驗宜蘭嘅豐富文化遺產；館內大部分展區免費開放，惟縣長府展區酌量收取成人約 NT$30 入場費。

國立傳統藝術中心係台灣數一數二嘅傳統美術殿堂，位於五結，以推廣台灣藝術文化為己任。身處館中，你仲可以沿住修建自舊城一隅嘅「老街」選購手信，定必滿載而歸！本館成人入場費為 NT$150。

冬山河親水公園妙趣好玩，俾你暫離宜蘭夏季嘅悶熱。園內活動型格十足，而且經常有播放節拍強勁嘅電子舞曲音樂，你可以沉醉其中，雀躍不已！要數冬山河親水公園最具人氣嘅景點，滑梯同噴水池絕對榜上有名。

台灣東北海岸面迎太平洋滾滾而嚟嘅巨浪，因而獲譽為「滑浪聖地」；而宜蘭則坐擁「酷炫」十足嘅滑浪熱點，蘇澳港口市鎮正係例子之一，浪況極具挑戰性，難怪聞名於世！