台南 6 大最正購物好去處

台南係得意嘅購物熱點，佔地相對細，各種平靚正嘅夜市同高級百貨商店都喺左近，部分主要街道同區域更係購物天堂，而且幾乎每座建築物裡面都開咗舖頭或商場。如果某座建築物唔係直銷零售店，咁通常就係餐廳啦—購物狂歡果時，你可以喺餐廳大樓裡面休息一下，回復體力之後再「血拚」過！

台南市內每區都有獨特嘅氣氛，地道風情到奢華格調嘜都有齊，傳統同現代結合埋一齊，古樸同優雅集於一身。身處喺台南，你未必可以搵到台北有嘅各種商品，市內最繁榮嘅商場都比唔上台北果啲，但就勝在價錢平好多。

台南酒店

1. 中央商圈

推介： 伴侶, 家庭, 購物

中央商圈係火車站附近嘅小型購物區，位於衛民街同民族路二段附近一帶，設有新光三越台南中山店等大型百貨公司，以及無數小商店，專售電子產品、時裝、體育用品，部分甚至主打小眾興趣。

區內仲有名為「南方公園」嘅開放式食品市場，且週末常常舉辦現場音樂表演。如果你想搵比較正式嘅餐廳「食餐好」，民族路附近就有很多選擇。

位置： 700 台灣台南市中西區衛民街

2. 國華街

推介： 伴侶, 家庭, 購物, 經濟實惠

要喺台南體驗正宗地道購物樂趣，首推國華街不容錯過！國華街係一條非常狹窄嘅車道，並無劃作步行街—所以，逛商店時務必多加小心，隨時準備好閃避貨車同電單車。話雖如此，呢度嘅貨品價格比起任何一間大型百貨公司都要便宜得多，點可以唔到此一遊？

由於國華街嘅主要客路為當地人，如果你唔識國語，可能會遇到語言障礙，咁不妨試試運用手勢溝通。店主見到你係遊客，無論你購買街頭小食、手信定係服飾，都可能會送上超值優惠！

位置： 710 台灣台南市永康區國華街

查看附近住宿

3. 南門假日花市

推介： 家庭, 購物, 拍照

即使你無意購買任何盆栽植物，南門假日花市依舊值得一遊—呢度唔單止空氣清新，花香濃郁，放眼更加係色彩繽紛嘅蘭花、有趣嘅盆景樹，以及大量植物花卉，絕對可為你送上佈置家中陽台後花園嘅靈感。場內有啲攤位亦會出售同園藝無關嘅商品，想買好玩手信絕對「冇難度」，難怪呢度深受當地人以至遊客推崇。

位置： 700 台灣台南市中西區南門路 28 號

開放時間： 星期六至星期日 08:30 至 18:30

4. 新光三越台南新天地本館

推介： 伴侶, 家庭, 購物

新光三越係台南規模最大嘅百貨公司，樓高 9 層，佔地寬敞，有售化妝品、時尚配飾、服裝、國際精品、童裝、休閒服飾同家居裝飾等商品；場內 5 樓設有綜合戲院—不過，到戲院洗手間時要務必小心，據說曾經有人喺嗰度「撞鬼」！

行到肚餓？新光三越設有「超正斗」嘅大型美食廣場，一定令你食指大動。溫馨提示：與台南周圍嘅市集同商圈相比，呢度嘅服裝同食品相對昂貴。

位置： 700 台灣台南市東區西門路一段 658 號

開放時間： 每日 11:00 至 22:00

電話： +886 (0)6 303 0999

5. 中正路

推介： 伴侶, 家庭, 購物

要喺台南買衫，嚟中正路就啱啦！中正路嘅店舖經常人頭湧湧，到咗夜晚更加係水洩不通；店內所售商品大多屬於中價品牌，熱門店舖包括漢登 (Hang Ten) 同 Easy Shop 等。中正路上有多間商舖都係獨立小店，正係你搜羅特色玩意嘅必到之處；另外，呢度嘅珠寶店亦聞名遠近。

由觀光角度睇，中正路建於日治時期嘅 1895 年，屬於早期建設嘅街道之一，眾多建築物都甚具歷史風情，令人難忘！

位置： 700 台灣台南市中西區中正路

6. 府中街

推介： 伴侶, 家庭, 購物, 經濟實惠

府中街屬步行街，綠樹成蔭，處處遍佈茶館、餐廳同 Cafe，每逢假日同週末都格外繁忙熱鬧，平日則比較清靜，惟不時會有年輕「準新人」喺迷人街景前拍攝婚紗照。

呢條步行街始自孔廟，穿越歷史悠久嘅泮宮石坊，絕對係你搜羅傳統紀念品嘅好去處。

位置： 700 台灣台南市中西區府中街

此文章含有 Go Guides 編輯團隊的個人意見。Hotels.com 會向於本網站上撰文的作者付費，其中或包括旅遊及其他費用。