高雄 9 大最好玩嘅活動
高雄景點
高雄係台灣第二大城市，擁有精彩嘅歷史同埋充滿活力嘅未來，佢嘅起源遠到明朝果時，仲係島上最古老嘅城市之一。遊覽高雄，絕對唔可以錯過呢啲古蹟景點！
高雄環繞源遠流長嘅港口而建，呢個港口係 17 世紀荷蘭人嘅重要設施，慢慢發展成為今日嘅主要國際貿易港，水道延伸到市內，而愛河就係當地最獨特嘅星級景點。
1. 高雄 85 大樓
推介： 伴侶, 家庭, 拍照
高雄 85 大樓嘅高度冠絕市內建築物，而且喺台北 101 建成之前，一直係全台灣最高嘅華廈！大樓樓高 85 層，因而得名；公眾人士可進入嘅最高樓層係 75 樓嘅觀景台。由觀景台眺望，你會鳥瞰到高雄市、高雄港同愛河嘅遼麗景致；而觀景台嘅正下方有一間豪華酒店，辦公室則位於較低樓層。
位置： 802 台灣高雄市苓雅區自強三路 5 號
電話： +886 (0)7 972 2829
高雄 85 大樓
2. 旗津島
推介： 家庭, 美食
旗津島係高雄市 11 個市轄區之一，亦係數一數二嘅熱門旅遊勝地，素以美麗海灘同數之不盡嘅一流海鮮酒家而聞名—其中，個別餐廳更可讓你親自挑選新鮮食材，由廚師喺你眼前烹製佳餚，接近「親手垂釣、親手炮製美食」嘅體驗。
旗津島同本島相隔約 15 分鐘船程，乘搭旗津-鼓山航線票價大約係 NT$15，亦係旅程中嘅有趣環節。要由本島進入旗津？你亦可以使用連接小島同高雄市嘅隧道。
旗津島
3. 高雄市立美術館
推介： 家庭, 歷史文化
高雄素有「台灣卓越文化中心」同「歷史之都」嘅美譽；而高雄市立美術館正好反映出呢個特點！館內 3 樓嘅展廳珍藏住寶貴嘅書法作品，不容錯過；為妥善保存呢啲獨一無二嘅藝術品，展館嘅畫廊同展櫃都會實施極其嚴謹嘅恆溫控制。
高雄市立美術館位於鼓山區，屬內惟埤文化園區嘅一部分；園區仲設有生態公園、雕塑公園同入口廣場，佔地超過 16 公頃，滿載藝術氣息，景致優美。
位置： 804 台灣高雄市鼓山區美術館路 80 號
開放時間： 星期二至星期日 09:30 至 17:30。
電話： +886 (0)7 555 0331
高雄市立美術館
4. 高雄國家體育場
推介： 拍照, 單人旅客, 團體
高雄國家體育場規模冠絕台灣，全年都吸引大量遊客湧入，更被視為全球最節能嘅運動場之一，曾經喺 2009 年舉辦世界運動會嘅主要田徑賽事。
高雄國家體育場可以容納 55,000 人，時時用作音樂會同台灣當地足球賽場地。場館由日本建築師設計，外觀令人嘆為觀止，並且採用巨型太陽能電池板供電，所產生嘅電量甚至超過場館用量，剩餘電力可注入當地電網。
位置： 813 台灣高雄市左營區世運大道 100 號
電話： +886 (0)7 582 9000
高雄國家體育場
5. 蓮池潭
推介： 伴侶, 家庭, 拍照
蓮池潭位於左營區東部，屬於人造奇觀，亦係高雄最受歡迎嘅旅遊景點之一，主要以兩項特色而享譽遠近：湖中植有種類繁多嘅蓮花，沿岸林立數之不盡嘅寺廟，
又以孔廟、龍虎塔同春秋閣最為知名。2009 年世界運動會期間，蓮池潭亦曾經係多項水上運動賽事嘅舉辦場地。
位置： 813 台灣高雄市左營區
蓮池潭
6. 六合夜市
推介： 伴侶, 家庭, 購物, 晚間娛樂
六合夜市係台灣嘅著名景點，定必令你著迷！呢片夜市「出名」之處在於露天食肆，尤其以海鮮檔特別人潮洶湧，又以鰻魚意粉為必試之選。
「飲飽食醉」之後，你仲可以到處行吓，搜羅手工藝品、電子設備同埋刀具，甚至連馬騮仔都買得到！六合夜市與眾不同，部分攤檔奉行「以物易物」，你可以將用過嘅二手物品帶嚟，交換成有用又耐用嘅「新收穫」。
位置： 800 台灣高雄市新興區六合二路
開放時間： 每日 18:00 至深夜
六合夜市
7. 愛河
推介： 伴侶, 家庭, 拍照, 經濟實惠
愛河蜿蜒穿過高雄市，其後流入高雄港，全長約 12 公里，河畔一側設有夜市，同埋幾間「極讚」嘅戶外河畔 Cafe，值得一遊！全市大多數嘅文化活動同現場音樂會都喺愛河河畔上演，令呢條河川成為高雄「心臟」。
「愛河」呢個名源自一對戀人：相傳，佢哋喺 1940 年代跳進河中殉情，淒美故事流傳甚廣，結果為河流賦上官方名稱。情侶不妨坐船沿河觀光，遊遍高雄市中心嘅大小角落。
愛河
8. 左營舊城
推介： 家庭, 歷史文化, 經濟實惠
左營舊城充滿文化同傳統氣息，可以俾遊客從多角度了解台灣人嘅傳統生活風情！左營舊城亦稱為「鳳山縣舊城」，係台灣最早建有城牆嘅城市之一，而部分城牆同城門已經喺建成之後嘅數百年間遭受摧毀。
除咗古老城牆同歷史悠久嘅街道外，舊城區內仲有蓮潭池、植物園、半屏湖濕地公園同埋高雄孔廟等等嘅景點，絕對係漫步遊覽嘅好地方。
左營舊城
9. 猴山
推介： 家庭, 經濟實惠, 遊歷, 團體
猴山亦稱為「壽山」，集觀景台、自然奇觀同埋歷史景點於一身，位於高雄港主入口嘅北面，18 世紀曾為荷蘭人命名為「猿山」，皆因山上住有相當多嘅猿猴—不過，呢種生物實際上係台灣獼猴，亦令呢座山易名為「猴山」。
猴山區內小山丘綿延，各有名字，各具特色；整片山嶺主要由兩座山峰組成，分別係北部嘅蛇山和南端嘅南壽山。現時，全區均已改劃為自然公園，園內住有大批動植物，有遠足徑縱橫其中，亦有源自 4,000 多年前嘅歷史遺跡，以及清政府和日治時期建造嘅軍事設施。
位置： 804 台灣高雄市鼓山區
猴山
此文章含有 Go Guides 編輯團隊的個人意見。Hotels.com 會向於本網站上撰文的作者付費，其中或包括旅遊及其他費用。