台南 14 大最好玩嘅活動

安平古堡係台灣最古老嘅堡壘，喺 1624 至 1634 年間由荷蘭人建造，當時稱為「熱蘭遮城」，曾經喺監察同維護區內國際貿易方面，發揮重要作用。如今，呢座堡壘已經化身極具人氣嘅博物館；每逢週末，堡外周圍嘅街道仲會架設起熱鬧市場，就連空氣都充滿嘉年華氣氛。

安平古堡曾見證一件又一件歷史大事，其防禦能力喺 1661 年備受考驗—當時，衛兵人數較來襲敵軍少 10 多倍，而且無望援兵相助，卻仍苦戰持續一年，熱血激昂！堡壘衛隊向來自中國的圍攻者投降後不久，荷蘭於台灣歷時 38 年的統治亦宣告結束。

北極殿係「玄天上帝」嘅行宮，以寺內木製裝飾、古鐘，以及當地民間藝術家嘅畫作而聞名，藏品素獲譽為台南市嘅「重要歷史寶藏」。

赤崁樓又名「普羅民遮城」，於 1653 年由荷蘭人建造，因地理位置便利、而且周圍開設咗精緻餐廳，而成為城裡遊客最多嘅旅遊景點之一。登上呢座閩南風格嘅樓閣頂層，台南市全景即盡收眼底！

台南孔子廟係台灣最古老嘅廟宇之一，初建於 1665 年，以大成殿 (正殿) 為寺廟中心，周圍另設眾多小廳堂，連接廟外空地同大成門。

其中，明倫堂鄰近大成殿，堂內綴有以漂亮書法寫成嘅儒家文章，而呢個亦係孔子廟獲稱為「文廟」嘅原因之一。大成門前方嘅戶外主庭院種滿大榕樹，既係休息閒坐嘅好去處，亦時有舉行儒家典禮儀式。

德化堂風格簡約，建築低矮，定會為你留下深刻嘅第一印象；進入寺內廟堂，你則會感受到有別尋常嘅平靜。充滿藝術感嘅門神同屋頂嘅綠色陶瓷瓦片相映成趣，令呢座寺廟從台南眾多寺廟之中脫穎而出；而寺內殿堂綴有錯綜複雜嘅圖案同壁畫，同樣值得細心欣賞。

德化堂距離延平郡王祠同孔子廟不遠，不妨一併順道遊賞！

大東門初建於 1725 年，現已成為台南最具標誌性嘅地標之一，夜晚燈火通明，睇起嚟就好似台南版本嘅「巴黎凱旋門」。

大東門歷史悠久，而門樓則於 1736 年增建，至 1788 年再度加建，並以水泥同磚塊加固木牆。可惜，大部分城門同城牆都喺日本佔領台灣期間被摧毀，門樓同埋大門好彩喺 1975 年再次修復，回復舊日光華。

大南門係台南市古老防線遺跡嘅一部分，建造工程始於 1736 年，並於 1835 年重大修建，現為台南市內最「上鏡」嘅景點之一，距離歷史悠久嘅孔子廟僅幾分鐘路程。大南門樓周圍環繞著公園，睇起嚟有啲似古老堡壘；而園內放有多座古碑—呢啲古碑曾經遍佈台南各處，用作頒佈公告。

要數大南門另一有趣特點，正正就係大南門所豎立嘅雙層防線，受中國萬里長城啟發，外門通向正門前方嘅庭院，迫使試圖突破大門嘅攻擊者進入庭院，令衛兵輕易瞄準反擊。

延平郡王祠係紀念明朝將軍鄭成功而建—呢位英勇將軍喺 1661 年將荷蘭人趕出台灣，然後統治該島同埋另一小王國至 1683 年，功績顯赫！延平郡王祠建於 1663 年，

有鄭成功嘅雕像矗立喺主殿中央，同鄭家歷代祖先嘅神位同放一處；祠外仲有較小型嘅雕像，描繪童年鄭成功同母親企喺一齊嘅畫面。

大關帝廟又名「祀典武廟」，供奉武聖關公，係全台灣最古老、保存最完好嘅寺廟之一；而藝術家同詩人仍然會喺 17 世紀種植嘅梅樹周圍聚會，將古老傳統延續至今。

大關帝廟建喺明朝 1665 年左右；隨住歳月過去，呢間廟嘅作用亦漸見多元，信眾可以喺呢度祈求美好姻緣、考試成功，甚至喺糾紛中佔盡上風！廟堂左側有個小型宗教藝術雕塑工場，同樣值得參觀。

臨水夫人廟供奉主管生育繁殖嘅女神，位處鄭成功文物館側，係台南最古老、最重要嘅寺廟之一，建於 1736 年—建成之初，呢間寺只係稻草棚，並喺 1886 年進行重建同翻修，加固建築。寺內對於女性嘅描繪冠絕台南市任何一間寺廟，又以多幅描畫女門神嘅精美畫作為焦點。

黃金海灘係台南市最大嘅沙灘，有時又名「黃金海岸」，寬約 50 米，長約 4 公里，獲譽為「沙灘王國」，非常適合玩沙灘足球同沙灘排球。與此同時，台灣風箏滑浪中心亦喺呢度，樂趣多多！

台江國家公園係一片秀美綠茵，位於台南市西北面嘅七股河畔，遊客可以坐船遊覽園內嘅四草野生動物保護區濕地，同埋由紅樹林沼澤形成嘅「綠色隧道」，踏上畢生難忘嘅旅程。區內仲設有數條步行徑、博物館同埋大眾廟，景點眾多！

想揮灑活力？台南市體育公園將為你送上多種選擇！呢個公園佔地約 52 公頃，鄰近台南機場，內有多個向公眾開放嘅室內同室外網球場，以及滑板公園、射擊場、羽毛球會同籃球場；園外周圍仲擺放咗幾架保存完好嘅舊車，當中包括二戰時期嘅蒸汽火車，值得參觀！台南市體育公園正係踩單車、步行及踏滑板勝地，玩足一日都不夠！

台南公園位於火車站附近，係人氣極旺嘅中式秀麗園林，園內更設有音樂廳、圖書館同圓形劇場。年紀稍長嘅遊客鐘意喺呢度享受下棋之樂、練習交誼舞或者係耍太極拳；年輕人就會嚟呢度打羽毛球，或者係遊覽主池塘上嘅大理石橋地標；再「細個啲」嘅訪客可以喺園內遊樂場玩個痛快，或者去兒童科學博物館參觀一番。