南投 3 大最正購物體驗

如果你想搜羅精美手信，去廣興紙寮就有機會尋到寳！呢間迷人小店由一群紙匠經營，佢哋友善熱心，熱衷向遊客提供資訊，訴說南投縣嘅詄事。

除咗傾聽埔里嘅造紙故事之外，你仲可以購買獨一無二嘅紀念品，其中又以藝術紙扇最受歡迎，上面印有節日場景、以至台灣熱門景點嘅畫像，地道十足！

南投縣空氣清新，夏季溫暖，係台灣頂級葡萄酒嘅生產地。而埔里酒廠盛產優質美酒，並以香醇可口嘅紹興酒著稱—有別於米酒，紹興酒嘅酒體呈金黃色，鮮艷奪目！好多旅客都會慕名而嚟，到訪「紹興酒之鄉」埔里；而你可以喺呢度淺嚐呢種入口醇厚嘅美酒，然後帶幾支返屋企做手信。

埔里城觀光夜市係南投最大型嘅市場，約有 550 個攤位等待你嚟發掘。不過，夜市所喺位置卻會勾起一段傷痛回憶—呢度位處 1999 年集集大地震 (又名「921 大地震」) 嘅紀念園內，嗰次地震重挫區內多處；現時，市場入口附近設置咗一啲慈善攤檔，收益會用嚟幫助地震傷者。

逢星期五，正係參觀埔里鎮夜市嘅最佳日子，因為當日有最多攤檔營業，而且場內小食檔選擇繁多，有臭豆腐和蒙古烤肉等地道美食，任你品嚐。另一方面，市集通常都備有跳彈床及充氣城堡，供小朋友玩樂一番。