多哈係一個繁榮嘅城市,人口約 200 萬人,市內現代奇觀同古老傳統揉合起來。閃爍嘅城景迎接著剛到埗嘅旅客;多哈蘊含豐富石油財富,令佢成功由一個樸素嘅採珍珠小漁港搖身一變成為國際大都市。

    多哈位於沙漠之中,陽光明媚,天氣炎熱,所以設有冷氣嘅博物館、購物中心同娛樂場所成為大家嘅避暑聖地。喺戶外探索嘅人,一定會俾市內四周美麗嘅海灘,同埋連綿嘅沙丘吸引住。睇埋下面,就知多哈仲有好多活動等緊你!

    多哈乜嘢活動最好玩?

    1

    穆罕默德·伊本·阿卜杜勒·瓦哈卜阿訇酋長清真寺

    一個可以欣賞到城市美景嘅「吸睛」地點

    穆罕默德·伊本·阿卜杜勒·瓦哈卜阿訇酋長清真寺由內到外都令人目不暇給。佢係一座壯觀嘅建築,值得擁有卡塔爾國家清真寺嘅稱號。佢嘅建築旨在反映卡塔爾較為古老同傳統嘅房屋,由明亮嘅白色牆壁至你腳下嘅地氈,每一個你見到嘅地方都反映出經典嘅伊斯蘭建築同設計特色。

    嗰度可以欣賞到西灣嘅天際線,由於你好難唔俾佢所震撼到,所以就請確保有帶備相機,用嚟拍攝遠處壯麗嘅摩天大樓景色喇。注意,由於呢個係一個仍然使用中嘅禮拜場所,所以請穿著適當服飾。

    地點: Al Muhandiseen St, Doha, Qatar

    電話: +974 4470 0000

    地圖
    • 拍照
    2

    濱海大道

    沿著住海濱散吓步又或者喺跑道上慢跑一吓

    濱海大道係一條迷人嘅海濱長廊,沿多哈灣延伸 7 公里。呢條寬闊嘅長廊可以令你欣賞到海邊同城市天際線嘅美景,係當地家庭同遊客都相當鍾意去嘅聚會地點。

    你可以喺黎明時分嚟濱海大道漫步,睇住金光映照中央商業區嘅高樓大廈,又或者喺繁忙嘅傍晚時分過嚟,睇下喺海灣之中漂浮嘅傳統木製單桅帆船。一路上會有好多咖啡館同餐廳,俾你一邊放鬆一邊欣賞美景。

    地點: Al Corniche St, Doha, Qatar

    地圖
    • 伴侶
    • 家庭
    • 拍照
    • 經濟實惠
    3

    瓦奇夫市場

    準備喺呢個繁忙嘅購物迷宮入面講吓價啦

    瓦奇夫市場嘅店舖分佈喺濱海大道附近 4 個街區,嗰度係一個充滿活力嘅百年市場,亦曾經係貝都因人買賣駱駝以及其他商品嘅交易中心。至於嗰啲唔係嚟市場買駱駝嘅人,亦可以搵到好多其他奪目嘅商品,由金飾到色彩繽紛嘅布料以至阿拉丁風格嘅青銅燈,嗰度都應有盡有。

    記得要空住肚去,俾自己試下附近本地小食攤售賣嘅嘢食,又或者停落嚟飲杯咖啡或茶歇一歇,同時觀察下市場中入面嘅熱鬧情況。

    地點: Al Souq Street, Doha, Qatar

    電話: +974 5551 9254

    地圖
    • 購物
    • 拍照
    • 品嚐美食
    4

    伊斯蘭藝術博物館

    由備受尊敬嘅建築師貝聿銘設計

    伊斯蘭藝術博物館擁有令人驚嘆嘅建築以及大量藝術同手工藝品,去嗰度參觀係喺多哈最好嘅活動之一,嗰度亦都係市內其中一個最著名嘅景點。博物館坐落喺多哈灣嘅濱海大道之上,收藏住從 14 世紀到現代嘅伊斯蘭世界陶器、手稿、金屬製品、紡織品同其他精美藝術品。

    由於入面有餐廳而且中庭每個月都會舉辦免費室內音樂會,遊客好易就會喺度待上幾個鐘。博物館亦會喺星期四及星期六 14:00 提供英文同阿拉伯文嘅免費導賞服務。入場費大約係 50 里亞爾,而 16 歲以下嘅小朋友可以免費入場。

    地點: South of Doha Corniche, Doha, Qatar

    開放時間: 營業時間:星期六至星期四 09:00 至 19:00;星期五 13:30 至 19:00

    電話: +974 4422 4444

    地圖
    • 家庭
    • 歷史文化`
    5

    阿爾發塔

    專門為 2006 年亞運會而建

    阿爾發塔係多哈最高嘅建築物,而家係一間豪華酒店同會議場所。由呢座 300 米高嘅摩天大樓上面欣賞璀璨城市景觀嘅最佳方法,就係去酒店嘅旋轉餐廳 Three Sixty 用餐。

    另一個方法,就係去健身俱樂部享受「高高在上」嘅水療護理,並使用佢嘅健身室同懸臂式游泳池,咁你就可以喺 19 樓欣賞到極好嘅風景。阿爾發塔位於該市嘅多哈體育城,毗鄰多哈嘅頂級體育設施同購物中心。

    地點: Al Waab Street, Doha 23833, Qatar

    電話: +974 4446 5600

    地圖
    • 伴侶
    • 拍照
    • 品嚐美食
    • 晚間娛樂
    • 豪華住宿

    相片由 Jaseem Hamza 提供 (CC BY 3.0) 經修改

    6

    Villaggio Mall

    入面甚至有個奧運規模嘅溜冰場

    購物人士一走入 Villaggio Mall 可能會以為自己突然去咗意大利,因為嗰度有威尼斯風格嘅運河同貢多拉坐。由於所有店舖同設施都喺有冷氣嘅商場入面,所以你唔洗驚比沙漠熱浪熱溶,就可以盡情睇最新時尚款式、享用唔同嘅午餐選項,又或者喺 Gondolania 主題樂園大玩特玩。

    呢個購物中心入面有幾個高級品牌,包括 Louis Vuitton、Christian Dior 同 Gucci,但係如果你「彈藥」唔算多,亦都有價值比較相宜嘅店舖可以逛。

    地點: Al Waab St, Doha, Qatar

    電話: +974 4422 7400

    地圖
    • 伴侶
    • 家庭
    • 購物
    • 豪華住宿

    相片由 Lars Plougmann 提供 (CC BY-SA 2.0) 經修改

    7

    獵鷹市場

    古代貝都因人嘅狩獵技術

    雖然現代卡塔爾對獵鷹嘅實際需求唔大,但係飼養同訓練呢啲雄偉鳥類嘅傳統依仍保留咗落嚟,並且已經被聯合國教科文組織列為重要嘅文化習俗。見到男人同男仔一邊喺市內嘅街道同市集穿梭,一邊自豪咁將珍貴嘅獵鷹放喺手臂上面,並唔係唔尋常嘅景象。

    而去鄰近瓦奇夫市場嘅獵鷹市場,你就可以一探呢個獵鷹世界。係嗰度,你可以見到出售各種獵鷹用具嘅店舖,又或者參觀佢每個月嘅拍賣會,見證一啲較為優秀嘅獵鷹點樣可以賣到幾萬美金一隻。

    地點: Al Souq Street, Doha, Qatar

    開放時間: 星期六至星期四 07:00 到 18:00

    地圖
    • 家庭
    • 歷史文化`
    • 非一般行程
    8

    香蕉島

    距多哈市區只有 25 分鐘船程

    想去海灘嘅旅客可以係伊斯蘭藝術博物館附近嘅碼頭,登上豪華雙體船前往香蕉島 (Banana Island)。你可以期待一下喺泳池旁邊好悠閒咁過一日、去划獨木舟、坐香蕉船、滑水梯,以及進行其他親子水上運動同娛樂活動。

    香蕉島由多哈香蕉島安納塔拉度假酒店 (Banana Island Resort Doha by Anantara) 經營,一日通門票大約係 350 里亞爾,門票包坐船、去游泳池同海灘、同埋可以喺度假村嘅餐廳同玩休閒活動嘅時候用入面嘅積分。

    地點: Banana Island Resort Doha by Anantara, Doha, Qatar

    開放時間: 每日 08:00 至 19:00

    電話: +974 4040 5050

    地圖
    • 伴侶
    • 家庭
    • 豪華住宿
    9

    卡塔拉文化村 (Katara Cultural Village)

    卡塔爾嘅文創中心

    多哈嘅卡塔拉文化村擁有宏偉嘅希臘羅馬圓形劇場,而且全年都會有好多表演同節慶,係一站式嘅藝術文化勝地。卡塔拉建於卡塔爾之珠附近嘅人工土地之上,設計擁有好似迷宮咁嘅小巷同埋鴿子塔,重現昔日嘅傳統生活面貌。

    遊客可以係呢度探索唔同嘅店舖同畫廊、喺咖啡店同餐廳食吓嘢,又或者喺海灘上面放鬆一吓,度過一整日。最好就係喺涼爽嘅傍晚時間去,因為到時沿住長廊會有食品攤位同市場攤販擺檔。

    地點: Lusail Expy, Doha, Qatar

    電話: +974 4408 0000

    地圖
    • 家庭
    • 購物
    • 歷史文化`
    • 拍照
    • 品嚐美食
    10

    卡塔爾之珠

    建於昔日嘅珍珠潛水場之上

    卡塔爾之珠坐落喺一個佔地 4 平方公里嘅人造島上面,係一個摩登嘅區域,嗰度有好多唔同嘅體育、娛樂同購物場所俾你去探索。好多人嚟呢度只係為咗睇吓碼頭嘅時髦遊艇,又或者去其中一個海灘玩吓水上運動。

    而對於小朋友同追求刺激嘅成年人嚟講,嗰度有個充滿活力嘅室內游樂場 Megapolis,裡面有保齡球場、逃脫室以及唔同嘅街機遊戲俾你玩。嗰度嘅餐廳提供咗各種美食,由 Alison Nelson’s Chocolate Bar 出品嘅手工甜品,以至 Yasmine Palace 炮製嘅安達盧西亞風味皇室美食都有。

    地點: Pearl Blvd, Doha, Qatar

    地圖
    • 伴侶
    • 家庭
    • 購物
    • 豪華住宿
    Lana Willocks | 特約撰稿人

    開始計劃行程

    Maps