卡塔爾 11 個最正嘅主題樂園

Gondolania 規模龐大，位於冷氣開放嘅比利亞吉奧購物中心裡面，全日娛樂活動不斷，設施全面。事實上，呢項設計命名自超可愛嘅威尼斯風格貢多拉，你可以坐上船穿越人工運河，感受中東舊世界嘅意式風情。

要數小朋友鍾意嘅景點，包括摩天輪、恐龍樂園同碰碰車，年紀大啲仲可以同大人一齊玩過山車、激流同跳樓機，尋求刺激。再加上源源不絕嘅美食選擇、4D 戲院、保齡球場、溜冰場同雷射槍戰遊戲，Gondolania 各適其適，全團人都一定玩得過癮。

Meryal Waterpark 位於盧塞爾核心位置，距離多哈市中心只有 20 分鐘車程，係逃避卡塔爾暑氣嘅好去處。呢座水上樂園佔地廣闊，又有「卡塔爾最大型水上樂園」嘅稱號，園內嘅塔樓高度冠絕全球，遊樂設施數量稱霸，總數達到 45 個，連埋 52 道滑梯、造浪池同漂流河，喺交通便利嘅海濱位置為你帶嚟無盡刺激。

除咗最常見嘅滑水梯之外，Meryal Waterpark 仲有 VR 滑梯等獨特景點，帶俾你驚心動魄嘅虛擬實境歷險樂趣。嚟到寓教於樂嘅 Edutainment Cave，小朋友可以邊玩邊學，透過引人入勝嘅模擬展品探索海洋生態。

多哈凱悅廣場嘅 Jungle Zone 叢林主題樂園動感十足，活動豐富刺激，室內全場裝飾精美，重現茂密雨林場景，仲有奇珍動植物動畫點綴。遊樂設施包括飛濺瀑布、馮卡諾過山車同糖果彈彈跳，刺激腎上腺素飆升。而碰碰船、賽馬場同嘉年華遊戲夠哂經典，大受小朋友歡迎。

Party Room 嘅亞馬遜同熱帶主題別具特色，舉辦生日會一定可以令壽星仔/女盡興難忘。而且，場地可以因應客戶需求，度身打造餘興節目，包括面部彩繪、魔術表演、雜技、雜耍，為你嘅私人聚會增添趣味。

貴為區內第一個主題遊戲中心，Virtuocity 對於多哈日漸壯大嘅電競群體極具吸引力。場館以未來派競技場作為設計核心，全國最出色嘅電競鬥士會喺呢度展開激烈對決，橫跨精準策略以至出招技巧範疇，一較高下。場內嘅高規格遊戲站超過 200 個，滿足電競賽事以至休閒「打機」嘅需求。

想「動真格」接受挑戰，咁就要拉埋成班朋友，去 Enigma Escape Room 玩返轉，喺 60 分鐘嘅刺激遊戲之中，將解謎能力發揮到極致。而全動感賽車模擬器都係 Virtuocity 嘅好玩設施之一。

Circus Land 係多哈歷史悠久嘅人氣景點，至今依然充滿樂趣。呢座馬戲團主題樂園佔地廣闊，遊樂設施適合各個年齡層嘅小朋友，當中包括旋轉木馬、碰碰車、彈床同充氣滑梯等。

樓高 4 層嘅 Cushion 遊樂區俾小朋友玩得開心又安全，而大人就可以投入精選電競同模擬遊戲。玩到餓餓哋？大型美食廣場裡面開滿知名國際連鎖餐廳，大人細路都可以擦餐飽。

《憤怒鳥》遊戲風靡全球，而 Angry Birds World 絕對係粉絲必去聖地。自從呢款解謎遊戲嘅初版於 2009 年發行以嚟，就捉住咗大人細路嘅歡心，隨後兩套荷里活主題電影上畫，更加令角色聲名大噪。

主題樂園嘅一系列遊樂設施令人興奮，活動「寓教於樂」，將趣怪卡通世界嘅魔力，濃縮喺大約一個足球場大細嘅場館之中，帶俾你驚險刺激嘅設施、室內同室外遊樂區，仲有數之不盡嘅零售店同餐廳。

Snow Dunes 係卡塔爾第一個室內滑雪中心。雪固然唔係中東嘅「地道產物」，所以全個建築群 (大約一個足球場大細) 嘅溫度都由人工冷卻至冰點以下，仲有 17 支先進雪槍，噴出蓬鬆雪花，營造夢幻迷人嘅阿拉伯冬季仙境，為全家人帶嚟無限樂趣。

雖然冇可能同 Whistler「爭一日之長短」，但係 Snow Dunes 嘅雪坡同樣斜度十足，衝刺速度超過每小時 50 公里。小朋友未必真正滑到雪，反而可以玩盡旋轉木馬、瀡滑梯同平底雪橇，同樣樂趣滿 Fun。

顧名思義，KidZania 係專為 1 至 14 歲小朋友而設嘅主題樂園，有別於多哈市內嘅一眾競爭對手，重點唔在於令人腎上腺素飆升嘅刺激體驗，而係主打模擬職業體驗，俾小朋友了解大人嘅世界，概念夠哂新穎。

小朋友可以參加多達 60 項充滿教育意義嘅好玩活動，嘗試現實世界嘅各種職業，包括醫生以至消防員，應有盡有，仲可以學埋點樣理財，兌現支票、開設銀行戶口、存款、提款、用積蓄買特別獎品等。細路仔深入學習嘅同時，大人不妨喺出邊嘆杯咖啡，善用免費 Wi-Fi 鬆一鬆。

Bounce Inc 主題樂園嘅「現象級」風潮席捲全球，主打健康生活，深受後生仔歡迎，就連小朋友都一試愛上，因為園內有大型充氣囊、Big Bag、仲有相連彈床，可以自由跳躍，細路仔實玩到唔肯走。

另一方面，入樽挑戰、高效能跳床、反彈跳牆同懸崖跳台，就俾到活力充沛嘅大人無限刺激。不如喺安全嘅環境下，試返次極限 Parkour，突破自我？

卡塔爾嘅巴拉德納公園有齊兒童遊樂設施同農家莊園，喺當地家庭客之間極具人氣。事實上，巴拉德納係全中東地區最大型嘅乳業畜牧場之一，小朋友可以親眼見證牛奶嘅誕生：高科技旋轉擠奶室精確展示製造過程，而附屬寵物園就有細路仔最鍾意嘅農場動物，同大家見面。

戶外場地會喺比較涼爽嘅月份開放，節慶氣氛濃厚。自問膽識過人，可以挑戰高空滑索，而綠樹成蔭嘅花園就為爸爸媽媽提供放鬆身心嘅好去處。與此同時，主舞台仲有文化同音樂活動連番上演，你一定唔會悶親。

Doha Quest 室內遊樂園位於多哈市中心，帶俾你心跳加速嘅玩樂體驗，創新設計將最先進嘅科技揉合色彩鮮艷嘅遊樂設施同互動遊戲，亮點包括 EpiQ Coaster (全世界最高嘅室內過山車) 同 Magma Blast (全世界最高模擬火山爆發嘅跳樓機)。

呢度嘅景點五花八門，由身臨其境嘅 3D 體驗到主題園區，大人細路都大把嘢玩。而公園充滿活力，繽紛亮眼，增添刺激氣氛同探險感覺。