阿姆斯特丹嘅 10 大行程

不妨喺阿姆斯特丹參加導賞遊，沿住平緩嘅單車徑了解呢個城市，盡情感受單車之旅嘅樂趣！你會路經狹窄屋仔、露天 Café 同埋巴特婁第之家 (Bartolotti House) 等華麗建築，仲可以喺夜晚欣賞燈火通明嘅橋樑同運河房屋添。MacBike 喺中央車站 (Centraal Station)、滑鐵盧廣場 (Waterlooplein) 同埋萊茲廣場 (Leidseplein) 都設有租車分店，好方便架！

喺中央車站 (Centraal Station) 登上 5 號電車前，記住買張 Strippenkaarten 乘車卡先喎！電車會途經阿姆斯特丹各個景點，例如水壩廣場 (Dam Square) 同皇宮 (Royal Palace)，然後穿過熱鬧嘅萊茲廣場 (Leidseplein Square)，再向博物館廣場 (Museumplein) 同博物館區 (Museum Quarter) 進發；繼續搭落去，你就會直接嚟到阿姆斯特丹嘅高檔南區 (Zuid) 地帶。

不妨租架荷蘭式腳踏船 (船同單車嘅混合體)，以獨特嘅方式遊覽好似迷宮咁嘅阿姆斯特丹運河網絡吖？市內好多地方都有提供腳踏船租借服務，就連中央火車站 (Centraal Station) 亦唔例外。你可以沿著水路去安妮‧弗蘭克故居 (Anne Frank's House) 附近嘅西教堂 (Westerkerk Church)，再參觀埋博物館區嘅國家博物館 (Rijskmuseum)，踏上一段歷史之旅。

由市中心南面嘅阿姆斯特爾站 (Amstel Station) 起步，沿住河畔行 3 公里，你就可以返到位處城市邊界嘅德派普區 (De Pijp)。再向北行，經過倫勃朗塔 (Rembrandt Tower) 同貝拉赫橋 (Berlage Bridge)，再橫過 Nieuwe Amstelbrug 大橋，Café 林立嘅 Ceintuurbaan 區旋即映入眼簾，不妨喺度飲返杯香濃咖啡，又或者去 Sarphati 公園食杯雪糕？再行多陣，你就會嚟到充滿波希米亞色彩嘅德派普區架喇！

嚟到阿姆斯特丹，又點可以唔坐船欣賞運河嘅迷人景色呢？呢度嘅夜間主題遊船之旅仲包括爵士樂之夜、酒吧遊同燭光晚餐，俾你好好嘆返晚！參加遊船團嘅遊客會喺水壩廣場 (Dam Square) 附近嘅中央車站 (Centraal Station)、水壩大道 (Damrak) 同羅金街 (Rokin) 一帶登船，交通方便。

喺星期六日，不妨同阿姆斯特丹市民、以至其他遊客一齊踩單車，向充滿中世紀色彩嘅哈倫市 (Haarlem) 進發！全條路線來回一共 40 公里長，你可以一邊喺平坦嘅單車徑漫遊，一邊欣賞如詩如畫嘅鄉郊景致。哈倫市係歷史悠久嘅 17 世紀小鎮，鎮上嘅街巷全部通往主要廣場—Grote Markt。

想喺高空影低由阿姆斯特丹舊城區、環形運河同 17 世紀建築交織出嚟嘅靚景？阿姆斯特丹只此一家嘅直昇機之旅就係你不二之選！身處半空之中，你仲會見到阿姆斯特爾河 (River Amstel) 岸畔嘅古老風車添。

去旅行撞正落大雨咁黑仔？唔緊要，你可以搭 Tourist Bus Amsterdam 嘅透明玻璃車頂巴士 (夏天仲有開蓬巴士添！)，飽覽阿姆斯特丹運河、大橋同廣場嘅景色。巴士由水壩廣場 (Dam Square) 附近嘅水壩大道 (Damrak) 開出，途經中央車站 (Centraal Station)、猶太區 (Jewish Quarter)、約丹 (Jordaan) 同萊茲廣場 (Leidseplein)。

阿姆斯特丹嘅運河巴士設有綠色線、紅色線同藍色線呢 3 條路線，途經安妮‧弗蘭克故居 (Anne Frank’s House)、梵高博物館 (Van Gogh Museum)、阿提斯動物園 (Artis Zoo) 同 NEMO 科學中心 (NEMO Science Museum)；而參加 Hop-on Hop-off 觀光之旅嘅遊客仲可以無限次搭乘巴士，用優惠價參觀阿姆斯特丹好多個景點添！

適逢每個星期五嘅免費「滑板之夜 (Friday Night Skate)」，滑板好手一到 20:00 就會喺公園電影博物館 (Filmmuseum) 旁邊嘅圓凳集合，展開全長 20 公里嘅旅程；而主辦方有提供免費導賞服務，帶領參加者途經阿姆斯特丹各個景點，最後返到去綠草如茵嘅凡德爾公園 (Vondelpark)—呢度正正就係滑板同滾軸溜冰發燒友嘅天堂！