柏林 9 大最好玩活動

貴為德國首都，柏林係歐洲最具標誌性嘅城市之一，始建於 12 世紀，歷史源遠流長，亦經歷過動盪，而家已經發展成融合創意、技術同文化嘅世界城市。柏林於 1990 年重新統一，保留自身歷史遺產，同時又有多姿多彩嘅景點，扣人心弦，亦值得國民引以為傲。

由見證德意志民主共同國時期嘅亞歷山大廣場 (Alexanderplatz)，到 19 世紀德意志帝國嘅德國國會大廈 (Reichstag Building) 古蹟建築，柏林帶你漫步往昔。歷年以嚟，柏林亦都不斷進步，晉身歐洲最熱門度假勝地之列，不妨參考下面嘅指南，睇睇應該由邊度起步，遊覽呢個迷人都會啦！

柏林最好玩嘅活動係乜嘢？

柏林酒店

1. 喺亞歷山大廣場展開一日行程

喺市內人流最旺嘅廣場開始旅程

推介： 伴侶, 家庭, 歷史文化, 拍照, 經濟實惠

當地人暱稱佢做「Alex」嘅亞歷山大廣場 (Alexanderplatz) 係柏林最大型嘅公共廣場。廣場位於東柏林中心地段，係重要嘅公共交通樞紐，周圍環繞百貨公司同購物中心，你可以喺人民友誼噴水池 (Brunnen der Völkerfreundschaft) 附近嘅小食店坐低，欣賞吓市內僅存嘅社會主義城市美學，例如 365 米高嘅電視塔，同埋建於 1969 年嘅烏拉尼亞世界時鐘 (Urania World Clock) 等地標。

位置： 位於市中心東部嘅城中區 (Mitte) 自治市鎮內

探索亞歷山大廣場附近的酒店

2. 必睇景點：布蘭登堡門

參觀柏林最具代表性嘅歷史地標

推介： 伴侶, 家庭, 歷史文化, 拍照, 經濟實惠

今時今日，布蘭登堡門 (Brandenburg Gate) 象徵和平統一，仲可能係柏林最經典嘅地標添！呢座 18 世紀新古典主義紀念碑同柏林嘅動盪歷史關係密切，每年除夕夜都吸引大約 100 萬人嚟到倒數慶祝。布蘭登堡門喺歷史上佔據重要地位，往往人頭湧湧，所以最好喺清晨時份嚟參觀，避開人群；而大門附近遍佈酒吧、餐廳同街頭小食檔，行幾耐都唔怕餓親啦！

位置： 位於市中心西部、亞歷山大廣場 (Alexanderplatz) 以西 2.5 公里

探索勃蘭登堡門附近的酒店

3. 參觀博物館島

喺柏林國家博物館遊走，穿梭歷史印記

推介： 伴侶, 家庭, 歷史文化, 拍照

博物館島 (Museum Island) 嘅德文名係「Museumsinsel」，佢位於市中心嘅施普雷河 (Spree River) 北部，島上有 5 間世界級精選博物館，而北端嘅博物館建築群仲被聯合國教科文組織列為世界文化遺產，可以俾你漫步歷史之中添！博物館島既有由佩加蒙博物館 (Pergamon Museum) 保存嘅宏偉佩加蒙祭壇同巴比倫伊什塔爾大門 (Ishtar Gate of Babylon)，又有喺新博物館 (Neues Museum) 內珍藏嘅娜芙蒂蒂胸像 (Bust of Nefertiti)，的確值得一遊，不妨買張 3 日通行證，按照個人步伐隨心參觀。

位置： 距離市中心亞歷山大廣場 (Alexanderplatz) 東南面 900 米

開放時間： 星期二至日 10:00 至 18:00；逢星期一休息

探索柏林博物館島建築群附近的酒店

4. 喺 Mauerpark 跳蚤市場行街

感受柏林獨特嘅購物體驗

推介： 伴侶, 家庭, 經濟實惠

嚟到 Mauerpark 跳蚤市場，你可以行吓街，食吓嘢，感受歌唱歡樂氣氛，度過正到爆嘅星期日！呢個熱鬧市集裡面有數之不盡嘅新舊貨品，由傢俬、服裝到古董都應有盡有，而主打地道同國際美食嘅攤檔亦唔少，不妨買啲野食，然後飲返杯啤酒或者葡萄酒，清清味蕾。到咗 15:00，係時候參加圓形劇場舉辦嘅卡拉 OK 演唱會，聽吓又唱吓！Mauerpark 嘅跳蚤市場極具人氣，又潮又開心，難怪成為柏林必到景點之一。

位置： 亞歷山大廣場 (Alexanderplatz) 以北 2 公里嘅普倫茨勞爾貝格區 (Prenzlauer Berg)

開放時間： 星期日 09:00 至 18:00

查看附近住宿

5. 必睇景點：國會大廈

由歷史建築物欣賞柏林靚景

推介： 伴侶, 家庭

國會大廈 (Reichstag Building) 建於 19 世紀末，係柏林城內歷史最悠久嘅建築物，位於布蘭登堡門 (Brandenburg Gate) 正北，90 年代曾經重建，屋頂加蓋咗大型玻璃穹頂，可以 360 度全方位睇盡柏林景色。如果你唔想排隊等入場，最好嘅方法係事先 Book 定觀光名額；而場內有提供好多種語言嘅語音指南，為你介紹國會大廈嘅歷史資料，仲會 Pin-point 喺圓頂見到嘅所有得意景點添！

位置： 市中心西部布蘭登堡門以北 150 米

開放時間： 每日 08:00 至 00:00

電話： +49 (0)30 22 73 21 52

探索德國國會大廈附近的酒店

6. 必睇景點：大屠殺紀念館

遊覽撼動人心嘅紀念館

推介： 歷史文化

大屠殺紀念館 (Holocaust Memorial) 官方名稱係歐洲被害猶太人紀念館 (Memorial to the Murdered Jews of Europe)，位於布蘭登堡門 (Brandenburg Gate) 正南方，會帶你深入了解呢場 20 世紀慘烈悲劇，並且向受害者致哀。館上嘅紀念碑由 2,711 塊唔同高度嘅混凝土板組成；一邊遊覽其中，一邊反思歷史教訓，你會有相當動人嘅感受。而紀念碑下面嘅博物館同樣極具啟發性，賺人熱淚。

位置： 市中心西部布蘭登堡門以南 250 米

開放時間： 戶外紀念碑全天候開放。博物館開放時間為星期二至日 10:00 至 20:00；逢星期一休館

電話： +49 (0)30 263 9430

探索猶太人大屠殺紀念館附近的酒店

7. 喺選帝侯路堤大街 Shopping

漫步柏林最熱鬧嘅商業街

推介： 伴侶, 家庭, 豪華住宿

選帝侯路堤 (Kurfürstendamm) 大道全長 4 公里，由西面嘅 Beton-Cadillacs 紀念碑延伸至東面嘅威廉皇帝紀念教堂 (Kaiser Wilhelm Memorial Church)，拍得上巴黎香榭麗舍大街 (Champs-Élysées)！呢條步行街環境怡人，到處都係精品店、餐廳、酒店、房車展廳同 Café，而且成條街種滿哂梧桐樹，形成重重樹影。雖然街上嘅商舖以高檔名店為主，不過你都仲搵到 Bershka 同 H&M 等等相對「貼地」嘅品牌嘅。順帶一提：柏林規模最大嘅百貨公司 KaDeWe 都係立足於選帝侯路堤大街架！

位置： 柏林-夏洛滕堡 (Berlin-Charlottenburg) 火車站以南 600 米

探索選帝侯路堤附近的酒店

8. 喺潘科區 (Pankow District) 嘅水塔附近食嘢

發掘型格社區嘅飲食文化

推介： 伴侶, 家庭, 美食

水塔 (Wasserturm) 位於普倫茨勞爾貝格 (Prenzlauer Berg) 嘅亞歷山大廣場 (Alexanderplatz) 以北 1.5 公里，悠久歷史冠絕全柏林，算得上係歷史地標，周圍仲有熱鬧嘅飲食區，供應各式佳餚。其中，Gugelhof 係喺 Knaackstraße 街上面開咗好耐嘅餐廳，主打阿爾薩斯 (Alsatian) 同德國南部菜式；Café Anna Blume 餐廳就型格十足，位於 Kollwitzstraße 同 Sredzkistraße 嘅轉角位，以早餐特別出名。如果你鍾意 fondue 火鍋同葡萄酒，仲可以試下 Sredzkistraße 街嘅 Ars Vini，佢哋供應嘅 fondue 類型選擇多到揀唔到，就連甜品都可以整成 fondue！

位置： 亞歷山大廣場東北 1.5 公里

9. 喺普倫茨勞爾貝格度過開心一晚

遊走熱鬧社區裡面嘅各式酒吧

推介： 伴侶

普倫茨勞貝格 (Prenzlauer Berg) 係喺柏林狂歡一晚嘅好去處，單係科維茲廣場 (Kollwitzplatz) 以北嘅街道上面，就有好多地方俾你飲返杯：如果你鍾情啤酒，Danzigerstraße 街嘅 Monterey Bar 應該係你嘅首選，有至少 250 款德國啤同各國品牌啤酒任你揀；想物色型格又趣怪嘅聚腳點？Lettestraße 街嘅WohnZimmer 實啱你心水，成間酒吧裝修到好似跳蚤市場一樣，Cool 到爆；想喺柏林尋覓紐約 Old School 酒吧嘅氣氛，你仲可以去 Stargarder Straße 街嘅 Badfish Bar 飲吓嘢—嗰度嘅威士忌、精釀啤酒，以至超級 Nice 嘅店員同管理層都會令你嘅夜晚極盡精彩。

位置： 亞歷山大廣場 (Alexanderplatz) 東北 2 公里

探索普倫茨勞貝格酒店

此文章含有 Go Guides 編輯團隊的個人意見。Hotels.com 會向於本網站上撰文的作者付費，其中或包括旅遊及其他費用。