阿姆斯特丹 9 大親子活動

阿姆斯特丹凡德爾公園 (Vondelpark) 坐擁近 50 公頃綠化空間，周圍都係茂密嘅草坪、池塘、遊樂場，仲有步行徑添，絕對比得上紐約嘅中央公園 (Central Park)。園內 6 大遊樂區啱哂家庭樂，你可以租滑板或者單車玩吓，再喺大池塘附近輕鬆野餐，樂得其所。夏季嘅凡德爾公園零舍熱鬧，中央露天劇院 (Openluchttheater) 嘅節日慶典一浪接一浪，樂趣源源不絕！

德古育風車 (De Gooyer Windmill) 嘅歷史可以追溯到 1725 年，外型呈八角形，高達 26 米，號稱全荷蘭最高嘅風車之一，非常壯觀！嚟到呢度，除咗影相之外，好似都冇乜特別嘅旅遊活動…之不過，小朋友見到周圍宏偉嘅建築同綠化空間，肯定會好雀躍啫。爸爸媽媽想鬆番吓？咁就要去隔籬冇幾遠嘅小型釀酒廠 Brouwerij ‘t IJ 歎返杯喇；而且，你仲可以去露台取景，由最佳角度拍攝德古育風車嘅絕色景致添！

身處尼姆科學博物館 (NEMO Science Museum)，小朋友一定唔會悶，仲可以喺幾個鐘內睇盡外星生物、認識淨水過程，學習興建水壩添！呢座專為細路仔而設嘅科學中心裡面有互動實驗室，以趣味活動同實作展品，帶你進入美妙嘅科學世界。另外，阿姆斯特丹能量博物館 (Energetica exhibit) 就喺正尼姆科學博物館上面，館內嘅凳仔安裝咗太陽能板，亦有隨風郁動嘅獨特雕塑，同埋超巨型日晷，包保你眼界大開！

阿姆斯特丹杜莎夫人蠟像館 (Madame Tussauds Amsterdam) 位於阿姆斯特丹皇宮 (Royal Palace of Amsterdam) 附近嘅水壩廣場 (Dam Square)，係一間互動式展館，設有主打藝術、音樂同體育主題嘅展廊，分別擺放咗好多個栩栩如生嘅偉人蠟像。皇家展覽嘅特色就係荷蘭皇室人員嘅蠟像，例如 Máxima 公主同埋 Beatrix 公主嘅塑像，都可以喺度搵得到；藝術發燒友千祈唔好錯過《I Am Art》互動展覽—因為，你會有機會將自己融入羅薩爾瓦多·達利 (Salvador Dali) 同林布蘭·范·萊因 (Rembrandt van Rijn) 等大師級藝術家嘅畫作裡面！

嚟到國家海事博物館 (National Maritime Museum)，小朋友可以盡情扮演傳統高桅橫帆船上面嘅海盜，一圓夢想！呢間博物館位於阿姆斯特丹中央車站 (Amsterdam Centraal Station) 東南面 1.4 公里以外，設於 1656 年落成嘅港口海軍倉庫裡面，珍藏咗荷蘭東印度公司貨船「阿姆斯特丹號 (Amsterdam)」嘅複製品，可謂鎮館之寶，可以俾遊客親手觸摸，甚至發射坦克砲，並且透過虛擬實境技術，一覽阿姆斯特丹嘅航海歷史。

丹克拉克靈劇院 (Theater De Krakeling) 係阿姆斯特丹市內歷史悠久嘅青年劇場，早喺 1978 年已經落成，上演荷蘭語同佛蘭德語 (Flemish) 節目，內容主要圍繞喜劇、魔術、舞蹈同音樂；而有啲精選表演會提供英文版，有啲就一句對白都冇。每項演出嘅收費會按個別調整，一般入場費為兒童 €6 起，成人 €17 起。

倫勃朗公園 (Rembrandtpark) 位處市中心，擁有綠茵如畫嘅池塘、鋪排有致嘅小路、遊樂場同兒童中心。呢個公園位於阿姆斯特丹西部，距離凡德爾公園 (Vondelpark) 西北約 1.7 公里，園內嘅寵物動物園以創辦人倫勃朗 (Remembrant) 嘅夫人命名，養咗各種馬匹、孔雀同埋雞仔，俾旅客親親大自然。另外，呢度仲設有兒童遊樂中心，小朋友可以學吓起屋仔、騎吓馬、整吓手作珠寶。

阿姆斯特丹木偶劇院 (Amsterdam Marionette Theatre) 喺 1985 年開幕，氣氛溫馨，專為 6 歲或以上嘅遊客演出傳統木偶節目。由駐場木偶工匠手工雕刻嘅小木偶，會換上鮮艷絲綢同天鵝絨縫製嘅服裝，立體演出莫扎特同奧芬巴赫古典音樂作品所描繪嘅幕幕場景；而你仲可以參加後台導賞團，了解劇院歷史，再喺現場工作坊學習製作木偶。阿姆斯特丹木偶劇院位於阿姆斯特丹紅燈區德瓦倫 (De Wallen) 東北 700 米，交通方便。

熱帶博物館 (Tropenmuseum) 喺 1975 年開幕，係同名人類學博物館嘅姊妹場館，標榜互動空間同工作坊，教小朋友了解世界各地文化，最大賣點係以舞蹈、書法同至 In 活動教學法，引導細路仔認識摩洛哥嘅風土人情。小朋友玩得開心，大朋友仲可以細賞館內嘅常設展覽，踏出東南亞同新畿內亞文化之旅添！