阿姆斯特丹 10 個 Instagram 打卡勝地

阿姆斯特丹皇宮 (Royal Palace of Amsterdam) 建於公元 17 世紀，係水壩廣場 (Dam Square) 附近嘅地標，以砂岩建成，滿載獨樹一幟嘅特色，當中包括拱形圓頂，上面飾有仿似柯克船嘅風向標。而波賽頓 (Poseidon)、阿特拉斯 (Atlas) 等希臘眾神嘅雕塑喺阿姆斯特丹皇宮嘅立面建築上隨處可見，極具神話色彩。

位於阿姆斯特丹市中心嘅西教堂 (Westerkerk) 高聳入雲，成幢建築高達 85 米，鐘樓更加係一大標誌特色。行入呢座公元 17 世紀嘅教堂，你會喺入口上方見到華麗樂器，周圍仲飾有出自佛萊明 (Flemish) 油畫家 Gerard de Lairesse 手筆嘅畫板添！

位於哈倫 (De Hallen) 嘅老教堂 (Oude Kerk) 喺 1213 年落成，悠久歷史冠絕阿姆斯特丹 (Amsterdam)，堂址佔地 3,300 平方米，飾有彩色玻璃窗配搭巨型木屋頂，滲透中世紀色彩。嚟到老教堂廣場 (Oudekerksplein)，最「吸睛」嘅無疑係設計大膽嘅裸體雕塑，其中一個正正係女性單手遮胸嘅青銅浮雕。

阿姆斯特丹嘅運河風景如畫，相當受歡迎，而王子運河 (Prince's Canal) 更加係當地人氣最旺嘅必到打卡位。不妨試吓拎住相機，聚焦行人天橋對面？運河獨一無二嘅建築物、樹木、盆栽同船仔都可以成為獨當一面嘅「Model」架！

達姆拉克大街 (Damrak) 位於阿姆斯特丹中央火車站 (Centraal Station) 同市中心嘅水壩廣場 (Dam Square) 之間，可以全方位眺望阿姆斯特爾河 (Amstel River)，同時將阿姆斯特丹山牆屋嘅絢麗風光盡收眼底。如果想用相機捕捉最精彩一刻，趁住晏晝河面反射繽紛房屋嘅倒影，你一定會得到最滿意嘅構圖！

Zevenlandenhuizen 係荷蘭名建築師 Tjeerd Kuipers 喺 1894 年設計嘅作品，成座建築由一排 7 間房屋並列而成，流露歐洲 7 個國家嘅建築風格，每間房屋各具特色，例如有以西班牙格拉納達 (Granada) 為靈感嘅別墅、法國盧瓦爾 (Loire) 城堡，仲有唔少得德國 18 世紀嘅拱形窗同塔樓。

適逢春季，去庫肯霍夫花園 (Keukenhof Gardens) 玩番日，包保你會俾園內處處盛開嘅鮮艷鬱金香深深吸引！庫肯霍夫花園係全世界最大型嘅花園之一，種植咗超過 800 種鬱金香，映照獨一無二嘅藝術裝置；再加上廣闊舒適嘅亭園，啱哂舉辦花卉展覽。

嚟到 NDSM Werf 造船廠，你會發現周圍都瀰漫住濃厚嘅藝術氣息，除咗有新奇嘅藝術擺設俾旅客欣賞，仲有由當地藝術家開設嘅工作坊。由壯麗驚艷嘅壁畫，到用回收物料製成嘅雕塑，呢個公共空間嘅一切都令人眼前一亮！

喺阿姆斯特丹眾多運河之中，Sint Olofssteeg 一隅嘅規劃相當特別，區內建築物周圍居然完全無行人街道，設計獨到，令一幢幢建築物望落有種「河上漂浮」嘅錯覺，眼見未為實！

贊瑟斯漢斯 (De Zaanse Schans) 位於阿姆斯特丹西北 15 公里以外，保存咗好多 18 世紀遺留落嚟嘅風車，可以話係荷蘭嘅一大象徵！呢條充滿中世紀風格嘅村莊全年四季都歡迎旅客遊覽；不過，如果你想睇真啲區內風車，就要喺 4 月至 10 月光臨喇。