阿姆斯特丹 10 項免費必試活動
「窮遊客」遊阿姆斯特丹
1. 貝居安女修道院
欣賞 14 世紀大宅同花園嘅絢麗景色
推介： 歷史文化, 拍照, 經濟實惠
貝居安女修道院 (Begijnhof) 係位於阿姆斯特丹市中心嘅中世紀救濟院建築群，由開滿鮮花嘅庭院環抱，位置隱蔽，當地貝居安修女就係住喺度架喇！呢班婦女信奉天主教，以修女嘅身分生活，但就唔受誓言約束。行入貝居安聖堂 (Begijnhof Chapel)，裡面有 9 幅描繪咗「阿姆斯特丹奇跡 (Miracle of Amsterdam)」嘅精美油畫；而坐落喺 Begijnhof 34 嘅 Houten Huys 就建於 1475 年，係阿姆斯特丹最古老嘅房屋嚟架！
位置： 1012 AB Amsterdam, Netherlands
開放時間： 每日 09:00 至 17:00
電話： +31 (0)20 622 1918
貝居安女修道院
2. 水壩廣場
公共廣場上嘅街頭表演
推介： 歷史文化, 拍照, 經濟實惠
水壩公共廣場 (Dam Square) 係阿姆斯特丹王宮 (Koninklijk Palace) 前面嘅露天空間，歷史可以追溯至公元 13 世紀，鵝卵石路兩邊餐館同酒吧林立，附近亦不乏旅遊名勝，計有杜莎夫人蠟像館 (Madame Tussauds Wax Museum)、阿姆斯特丹舊證券交易所 (Beurs van Berlage Hall) 同新教堂 (New Church) 等。要數水壩廣場中間嘅免費活動之一，首推幾乎日日上演嘅街頭表演同音樂會，尤其喺夏天更加陣容鼎盛！不過，身處人群之中，記得提高警覺，免得淪為扒手嘅「獵食」對象。
位置： Dam, 1012 JS Amsterdam, Netherlands
水壩廣場
3. 辛格花市
喺水上市場欣賞色彩艷麗嘅鬱金香同水仙花
推介： 購物, 拍照, 經濟實惠
辛格花市係位於阿姆斯特丹南部運河帶嘅水上花卉市場，自 1862 年一直為阿姆斯特丹市中心供應鮮花。喺一排漂浮駁船上面，大約有 15 個攤位，售賣鬱金香、玫瑰、水仙花同百合等各種靚花；亦都有幾個攤販賣園藝工具、裝飾同種子。辛格花市係免費入場嘅，但係你行行吓應該都會忍唔住手，買返紮花架喇 (笑~)。
開放時間： 星期一至六 09:00 至 17:30；星期日 11:30 至 17:30
辛格花市
4. 佛光山寺
喺星期二下晝參加免費書法工作坊
推介： 拍照, 經濟實惠
佛光山寺 (Fo Guang Shan Temple) 位於阿姆斯特丹唐人街，係歐洲最大嘅佛教寺廟之一，屋頂裝飾咗代表中國十二生肖嘅動物雕像，正殿就設有供奉觀音菩薩嘅祭壇。佛光山寺又叫做善德寺 (Zeedijk Tempel)，服務當地嘅佛教社區，寺內免費活動都唔少架；而喺農曆新年期間，寺外會燒爆杖，又有 傳統舞獅節目上演，氣氛特別熱鬧！佛光山寺逢星期二 13:30 至 15:30 都會開辦免費中國書法班，值得參加。
位置： Zeedijk 106 -118, 1012 BB Amsterdam, Netherlands
開放時間： 星期二至五 12:00 至 17:00，星期日 10:00 至 17:00（逢星期一休息）
電話： +31 (0)20 420 2357
佛光山寺
5. 逢星期二去 Bimhuis
22:00 準時睇即興 Jazz Show
推介： 伴侶, 晚間娛樂, 經濟實惠, 單人旅客
Bimhuis Café 位於 Piet Heinkade 3 嘅 Muziekgebouw 河濱綜合大樓 (Muziekgebouw Complex) 旁邊，係阿姆斯特丹最有影響力嘅音樂殿堂之一，每年上演 300 幾場現場爵士樂同即興音樂表演，精彩不絕！逢星期二，Bimhuis Café 都會喺 20:00 舉辦即興演奏會，22:00 就輪到 jam 歌環節，歡迎初出茅廬嘅音樂新星以至爵士樂「鐵粉」參加！
位置： Piet Heinkade 3, 1019 BR Amsterdam, Netherlands
開放時間： 每日 18:00 至深夜
電話： +31 (0)20 788 2150
逢星期二去 Bimhuis
6. 西教堂
下晝欣賞 Westertoren 嘅鐘琴音樂會
推介： 伴侶, 歷史文化, 拍照, 經濟實惠
位於阿姆斯特丹市中心嘅西教堂 (Westerkerk) 高聳入雲，成幢建築高達 85 米，鐘樓更加係一大標誌特色。行入呢座公元 17 世紀嘅教堂，你會喺入口上方見到華麗樂器，周圍仲飾有出自佛萊明 (Flemish) 油畫家 Gerard de Lairesse 手筆嘅畫板添！教堂為當地嘅新教徒 (Protestant) 社區提供服務，逢星期日 10:30 至 12:00 舉行宗教儀式。每逢星期二 12:00 至 13:00，西教堂往往人頭湧湧，皆因鐘琴音樂會喺正呢段時間上演吖嘛！
位置： Prinsengracht 279, 1016 GW Amsterdam, Netherlands
開放時間： 4 月至 11 月：每日 10:00 至 15:00。12 月至 3 月：星期一至五 10:00 至 15:00
電話： +31 (0)20 624 7766
西教堂
7. 凡德爾公園
參加夏季歌舞嘉年華
推介： 伴侶, 家庭, 經濟實惠
阿姆斯特丹凡德爾公園 (Vondelpark) 絕對比得上紐約嘅中央公園 (Central Park)，免費活動多不勝數！公園佔地大約 50 公頃，綠草如茵，佈滿咗鮮花盛開嘅草坪、池塘、遊樂場同小徑。園內 6 大遊樂區啱哂家庭樂，你可以租滑板或者單車玩吓，再喺大池塘附近輕鬆野餐，樂得其所。夏季嘅凡德爾公園零舍熱鬧，中央露天劇院 (Openluchttheater) 嘅節日慶典一浪接一浪，樂趣源源不絕！
凡德爾公園
8. 阿姆斯特丹公共圖書館 (OBA)
喺頂樓睇盡阿姆斯特丹嘅遼闊景色
推介： 家庭, 經濟實惠
阿姆斯特丹公共圖書館 (OBA) 為一眾「書蟲」提供咗超過一百萬份讀物，其中大多數都係荷蘭文同英文版本嚟嘅。事實上，睇書係阿姆斯特丹最佳免費活動之一；而嚟到呢個圖書館，你絕對有「錫住荷包」啦！館內空間可以容納千幾人，另有樓層用嚟搞臨時展覽、閱讀會同音樂會；7 樓就有間露台餐廳，俾你全方位睇盡 阿姆斯特丹市景。阿姆斯特丹公共圖書館喺 Oosterdokskade 河濱建築裡面，距離阿姆斯特丹中央火車站 (Centraal Station) 以東大約 700 米。
位置： Oosterdokskade 143, 1011 DL Amsterdam, Netherlands
開放時間： 星期一至五 08:00 至 22:00；星期六至日 10:00 至 22:00
電話： +31 (0)20 523 0900
阿姆斯特丹公共圖書館 (OBA)
9. NDSM Werf 造船廠
搭免費渡輪遊覽充滿藝術氣息嘅海濱
推介： 拍照, 經濟實惠, 單人旅客, 團體
嚟到 NDSM Werf 造船廠，你會發現周圍都瀰漫住濃厚嘅藝術氣息，除咗有新奇嘅藝術擺設俾旅客欣賞，仲有由當地藝術家開設嘅工作坊。由壯麗驚艷嘅壁畫，到用回收物料製成嘅雕塑，阿姆斯特丹潮流藝術界原來都充滿免費活動，任你揀嚟試玩架！其中，NDSM-Werf 博物館展出嘅文物可以追溯至 1920 到 1980 年代，呢個碼頭當時仲係世界上最大 嘅造船廠之一嚟架！遊客可以乘搭每日運行嘅免費公共渡輪，由中央火車站 (Centraal Station) 後面嘅港口出發去 NDSM Werf。
位置： NDSM-Plein 28, 1033 WB Amsterdam, Netherlands
電話： +31 (0)20 493 1070
NDSM Werf 造船廠
10. 倫勃朗公園
同 De Uylenburg 寵物動物園嘅小動物一齊玩
推介： 伴侶, 家庭, 經濟實惠, 團體
倫勃朗公園 (Rembrandtpark) 位處市中心，擁有綠茵如畫嘅池塘、鋪排有致嘅小路、遊樂場同兒童中心。呢個公園坐落喺阿姆斯特丹西部，距離凡德爾公園 (Vondelpark) 西北約 1.7 公里，亦係阿姆斯特丹人氣最旺嘅免費玩樂好去處；園內嘅寵物動物園以創辦人倫勃朗 (Rembrandt) 嘅夫人命名，養咗各種馬匹、孔雀同埋 雞仔，俾遊客親親大自然。另外，呢度仲設有兒童遊樂中心，小朋友可以學吓起屋仔、騎吓馬、整吓手作珠寶。
位置： Orteliuskade 57, 1057 Al Amsterdam, Netherlands
倫勃朗公園
此文章含有 Go Guides 編輯團隊的個人意見。Hotels.com 會向於本網站上撰文的作者付費，其中或包括旅遊及其他費用。