阿姆斯特丹 7 大夏季好玩活動
阿姆斯特丹嘅暑期之旅
1. 運河之旅
推介： 家庭, 拍照
夏天係阿姆斯特丹運河充滿活力嘅季節！其中，8 月份舉行嘅運河節 (Grachtenfestival) 就為林立住歷史建築同庭院嘅獨特岸濱區帶嚟美妙嘅古典旋律；而兒童運河節 (Children’s Canal Festival) 餘興活動仲可以俾 BB 仔、小朋友以至青少年開心欣賞表演同睇戲添！你亦都可以參加埋運河遊船團，泛舟遊遍阿姆斯特丹，都咪話唔寫意。
2. 夏季嘅凡德爾公園
推介： 家庭
凡德爾公園 (Vondelpark) 堪稱阿姆斯特丹暑假旅行嘅必去景點，既係野餐、踩單車同散步勝地，園內嘅露天劇場亦都會喺 6 月至 8 月舉行免費演唱會同兒童表演。想玩啲更加醒神嘅活動？呢度嘅遊樂區同滾軸溜冰鞋出租設施就啱哂你；而電影博物館 (Film Museum) 仲會舉辦露天放映會，各適其適。
夏季嘅凡德爾公園
3. 文化活動
每年 6 月，適逢阿姆斯特丹尋根節 (Amsterdam Roots Festival)，全城都會奏起嚟自世界各地嘅樂韻；同一時間，文青們可以沉醉於 6 月荷蘭節 (Holland Festival) 嘅文藝氣氛之中，盡情欣賞歌劇、音樂、舞蹈同劇場節目；嚟到 7 月底，為慶祝阿姆斯特丹同志遊行 (Gay Pride Amsterdam)，市內周圍仲會有熱鬧嘅街頭 Party；而 8 月就有烏伊馬克特音樂節 (Uitmarkt Festival)，亦標誌住荷蘭文化旺季嘅開始，全市將會 有多達 2,000 位藝術家傾力表演！
4. 都市海灘
推介： 伴侶, 家庭
即使身處阿姆斯特丹市區，你都可以去市內沙灘打場排球，又或者攤喺吊床上面 hea 返吓！位於艾瑟爾堡 (IJburg) 島上嘅 Blijburg aan Zee 有舉辦熱鬧嘅營火晚會，邀得 DJ 同 Live Band 表演；而極盡豪華嘅 Supperclub Oasis 出自設計公司 Concrete 嘅手筆，都吸引唔少遊客到訪架！如果你想共聚天倫，不妨去 NEMO 科學中心 (Nemo Science Centre) 嘅天台沙灘一遊吖—無論係大人定小朋友，都肯定會鍾意呢度嘅幼沙、豆袋同城市靚景。
5. 私人園林景致
推介： 伴侶, 家庭, 拍照
運河之間、高牆之後，隱藏住阿姆斯特丹最優雅嘅私人庭園，其中有啲仲會喺 6 月份嘅「庭園開放日 (Open Garden Days)」對外開放，俾遊客參觀添！漫步於園內嘅希臘雕塑、華麗花棚、摩洛哥長凳同現代藝術品之間，你會有置身綠茵天堂嘅感覺；而部分設施同作品出自著名建築 師手筆，相當珍貴。
6. 陽光下嘅藝術
推介： 美食
喺河畔用餐，可謂係阿姆斯特丹夏季樂趣之一，戶外 Cafe 統統都會喺夏日開放露台。其中，位於阿姆斯特爾河 (Amstel River) 上嘅 Amstelhaven 餐廳/酒吧就設有全市數一數二嘅大型水上露台；而 Nemo 科學中心 (Nemo Science Centre) 嘅 NEMO 廣場 (NEMOPiazza) 仲擁有阿姆斯特丹面積最大嘅屋頂露台添！
7. 市內公園
推介： 經濟實惠
除咗面積冠絕阿姆斯特丹嘅凡德爾公園 (Vondelpark) 綠色空間之外，市內都仲有好多綠意區域，俾你盡情享受一段由樹蔭同陽光交織而成嘅假期。其中，博物館廣場 (Museumplein) 喺正荷蘭國家博物館 (Rijksmuseum)、梵高博物館 (Van Gogh Museum) 同市立博物館 (Stedelijk Museum) 正前面，係郊遊、滾軸溜冰同曬太陽嘅好地方；如果你咁啱喺德派普街區 (De Pijp)，不妨 一遊薩法蒂公園 (Sarphati Park)，暫時逃離呢區以至阿爾伯特·奎普 (Albert Cuyp) 市場嘅都會繁囂；而東區公園 (Oosterpark) 位於東區 (Oost) 附近，深受當地人鍾情，仲吸引唔少音樂家光臨，因而鼎鼎大名。
此文章含有 Go Guides 編輯團隊的個人意見。Hotels.com 會向於本網站上撰文的作者付費，其中或包括旅遊及其他費用。