清水寺

清水寺歷史

清水寺相傳由佛教僧人延鎮上人喺平安時代 8 世紀所創，寺內供奉咗十一面千手觀音菩薩像。據說，延鎮上人喺夢中得到啟示，要到音羽山山腳霧鎖煙迷嘅森林中尋訪清泉。途中，佢遇上行睿居士，而呢位佛教居士已經喺山中潛心修行 200 年，不停咁念頌觀音菩薩嘅名號！

行睿居士將一塊靈木贈予延鎮上人，而延鎮上人就喺靈木上刻咗觀音菩薩像。後來，武官坂上田村麻呂為了俾懷孕嘅妻子補身，就到山中獵鹿，遇到延鎮上人，並被佢對觀音菩薩嘅虔誠所感動，所以佢就決定將靠近瀑布嘅屋改建成寺廟，供奉十一面千手觀音菩薩像。可惜，清水寺後來多次遭地震同埋火災蹂躪，現有寺身結構建於 1633 年—當時，德川幕府第三代將軍德川家光下令重建寺廟。清水寺前身係法相宗宗派嘅寺廟，1965 年變成獨立佛寺。

清水寺嘅特色同亮點

清水寺嘅優美環境本身已經係參觀亮點—喺到達清水寺大門之前，你要先穿過一條古色古香嘅狹窄街道，兩邊林立無數餐館、手信店同傳統日式旅館，而寺廟嘅古雅大門都係重要嘅文化遺產。有趣嘅係，呢條街部分商店自江戶時代已經存在，遊客可以喺呢度懷舊一番。清水寺佔地約 35,000 平方米，寺廟群由 30 多座建築物組成，最大賣點係供奉主神十一面千手觀音菩薩像嘅本堂。

「清水舞台」係主樓嘅一部分，獲列為國寶級建築物，呢個依山而建嘅木製平台高 15 米，企喺上面可以飽覽四周景色。然而，清水舞台真正獨特之處，都係在於佢嘅建築風格—平台採用日本柏樹建造，由 150 多枝巨型櫸木柱所支撐，連一枝鋼釘都無用過嚟固定！古人相傳：信眾只要向神明許願，然後從清水舞台一躍而下，跳入崖中，願望就會成真。到咗 1872 年，當地政策立例禁止呢種投崖自盡嘅行為。

要數清水寺嘅另一個重要必遊景點，當然非音羽瀑布莫屬，就連寺廟嘅名都源於呢個瀑布！音羽瀑布係日本十大最清澈嘅名泉之一，泉水來自音羽山，瀑布一分為三，分別代表智慧、美貌同長壽，據說飲用過泉水，就可以獲賜福。有趣嘅係，信眾只能選擇其中一道泉水；如果飲晒三道泉水，就會因為貪婪而招致惡果。

清水寺嘅景點仲包括祈求戀愛姻緣嘅「地主神社」，寺內供奉咗掌管姻緣嘅大國主命，入面仲有 2 塊戀愛石頭—據稱，單身男女只要合埋眼，成功由一塊石頭行到另一塊，就能順利覓得心心相印嘅伴侶。其他參觀景點包括洗滌心靈嘅大小噴泉、刻上佛祖釋迦牟尼腳印嘅「佛足石」，以及喺除夕會被敲響 100 多次嘅大鐘。