京都 15 大最佳隱世寺廟

京都擁有好多隱世寺廟，雖未晉身遊客必到觀光景點，但係仍然不失壯麗。如果你已經去過最大、最著名的景點，這份寺廟名單便最適合你。要數參觀京都隱世寺廟的最美妙體驗之一，當然是任你獨享的神秘氣息和樸素環境；而且，你也毋須面對成行成市嘅紀念品商店以及一大群遊客，感覺格外輕鬆。

京都酒店

1. 法界寺

推介： 家庭, 歷史文化, 拍照

喺 1051 年建造法界寺嘅法師係藤原家族後裔，信奉藥師佛—至今，日本人仍然廣泛相信藥師佛可以令餵人奶嘅媽咪「奶量充足」！神社坐落喺國寶級祭壇上面，正正供奉住藥師佛同阿彌陀像。如果要嚟呢座寺廟，可以乘搭京阪線到六地蔵站。

位置： 京都市伏見區日野西大道町 19

開放時間： 每日 09:00 至 17:00

電話： +81 (0)75 571 0024

查看附近住宿

2. 長樂寺

推介： 伴侶, 家庭, 拍照

要嚟長樂寺，就一定要先攀過陡峭山坡，心血少啲都唔掂！不過，登頂之後，京都全景盡收眼底，卻係送俾成功登山人士嘅最佳回報！通往寺廟道路嘅兩旁全部都係石柱燈，夏季點燈嗰陣，景象令人讚嘆！呢座古色古香嘅寺廟歷史可以追溯到 9 世紀，位於京都東部，靠近祗園區。

位置： 605-0071 日本京都府京都市東山區圓山町 626

開放時間： 每日 09:00 至 17:00

查看附近住宿

3. 大田神社

推介： 家庭, 歷史文化, 拍照

大田神社又名「紫色鳶尾神殿」，以地面盛開嘅鮮豔花朵著稱。5 月至 6 月期間，鳶尾花絢麗盛放，恰好為呢片寧謐淨土染上繽紛色彩。呢座神社係為敬奉豐收神靈而設，由創寺以來就對農夫具有重大意義。

位置： 603-8047 日本京都北區上賀茂本山 340

電話： +81 (0)75 781 0907

4. 妙滿寺

推介： 歷史文化, 非一般行程

妙滿寺原本建於 14 世紀，二戰後搬到現址，可以飽覽比叡山嘅山景絕色。為咗紀念佛陀啟蒙，妙滿寺珍藏住印度菩提伽耶佛塔嘅複製品，放喺寧靜嘅花園裡面，園內沙粒礫石排列得一絲不苟。

位置： 606-0015 日本京都左京區岩倉幡枝町 91

電話： +81 (0)75 791 7171

查看附近住宿

5. 吉田神社

推介： 歷史文化, 非一般行程

吉田神社建於 859 年，喺 1081 年獲評選為日本 22 座優秀神社之一，係由勢力龐大嘅藤原家族創立，一直守護京都。15 世紀，學者兼法師吉田兼俱喺呢度發起咗稱為「吉田神道」嘅神道教分支，至今仍然係神道教重要聖地。每年 1 月 3 日，神社都會舉辦節分 (中國新年) 篝火和慶祝活動。神社四周縈繞住鬱鬱蔥蔥嘅森林，環境幽靜，氣氛平和。

位置： 606-8311 日本京都左京區吉田神樂岡町 30

電話： +81 (0)75 771 3788

探索吉田神社酒店

6. 野宮神社

推介： 拍照, 非一般行程

呢座神社置身於茂密竹林之中。平安時代，皇室公主必須喺呢度至少住一年，齋戒沐浴，然後先可以代表皇室。呢座神社為供奉愛情同學習之神而設，吸引日本好多單身女仔嚟祈求好姻緣，而學生就祈願考試合格。經過獨特嘅黑色鳥居，你就會見到龜石—據聞：只要摸下龜石，你嘅願望就會喺一年內實現！神社距離 JR 嵯峨野線嘅嵯峨嵐山站只係幾步之遙。

位置： 616-8393 日本京都右京區嵯峨野野宮町 1

開放時間： 每日 09:00 至 17:00 (辦事處於 16:30 關閉)

電話： +81 (0)75 871 1972

探索野宮神社酒店

7. 化野念佛寺

推介： 拍照, 經濟實惠

呢座小寺廟隱身喺嵐山山坡上面，擺放住 8,000 尊石佛像，圍坐成一片震撼畫面，令到行咗半個鐘上山嘅遊客嘆為觀止。當然，你亦可以選擇由天龍寺附近乘搭當地巴士上山。化野念佛寺相傳係為獻俾貧困人民而興建—平安時代同江戶時代年間，窮人離世之後，骨灰正正係散落區內。

位置： 616-8436 日本京都右京區鳥居本化野町 17

開放時間： 3 月至 11 月 09:00 至 16:30。12 月至 2 月 09:00 至 16:00

電話： +81 (0)75 861 2221

8. 妙心寺

推介： 家庭, 拍照, 經濟實惠

呢座 14 世紀寺廟建於 698 年，存放住日本最古老嘅大鐘，僧人到而家每日都仲係用緊呢個鐘。呢處景點曾經係花園天皇嘅別墅，但係天王經過好多年嚴格嘅佛教禪修後，猛然覺悟，就將別墅改建成寺廟。寺內法堂嘅彩色天花板令人驚嘆，有一條龍由 8 個方向望實你，無論你企喺邊度，都避唔過佢嘅目光！要嚟寺廟參觀，最簡單嘅方法係乘搭京都市巴士 61、62 或 63 號至妙心寺前站。

位置： 616-8035 日本京都右京區花園妙心寺町 64

電話： +81 (0)75 461 5226

探索妙心寺酒店

9. 勸修寺

推介： 家庭, 拍照

勸修寺由醍醐天皇為咗紀念媽媽而興建，位處京都地震多發地、曾經遭逢應仁之亂，到 17 世紀末經已日久失修；直到幕府撥出資金重建，寺院先至恢復昔日光輝。如今，呢座寺廟以古老花園散步體驗吸引遊客，庭園同 1,000 年嘅舊貌仍大致相同。如果要嚟勸修寺，可以乘搭東西地鐵線到小野站。

位置： 607-8226 日本京都山科區勸修寺仁王堂町 27-6

開放時間： 每日 09:00 至 16:00

電話： +81 (0)75 571 0048

查看附近住宿

10. 隨心院

推介： 拍照, 經濟實惠

這座絢麗寺廟以一重重的梅花樹冠而聞名—春天時節，花樹色彩四綻，份外賞心悅目。寺廟裡面收藏住好多無價文物，當中包括知名女詩人小野小町嘅作品；而寺院每年都會舉辦舞會，紀念小町。隨心院而家都未算好多人識，所以仲係逃離人群嘅好地方。隨心院位於京都市中心東部嘅山科區，乘搭地鐵到小野地鐵站就可以直達。

位置： 607-8257 日本京都山科區小野御靈町 35

開放時間： 每日 09:00 至 16:30

電話： +81 (0)75 571 0025

查看附近住宿

11. 大石神社

推介： 美食

大石神社係一座位於山科區嘅寧靜寺廟，由武士道「大佬」大石良雄嘅碩大雕像看守住。主殿矗立喺巨型石屎鳥居後面，係典型日本寺廟，而通往大殿嘅路徑上有一株株嘅櫻花樹。寺廟周圍都會見到石獅雕像嘅蹤影，張開口嘅石獅可以擋住惡靈，合埋口嘅石獅就會留住好運。每年 4 月第一個星期，一年一度嘅櫻花節會喺呢度上演。

位置： 607-8308 日本京都山科區西野山桜ノ馬場町 16 號

電話： +81 (0)75 581 5645

查看附近住宿

12. 西芳寺 (苔寺)

推介： 遊歷, 非一般行程

貴為同禪宗哲學相關嘅最古老庭園之一，西芳寺早喺奈良時期由行基僧人建成，並於 1339 年皈依禪宗，至明治時期日久失修，到處生滿苔蘚，先開始遠近知名。據講：寺廟而家已經生滿超過 120 種苔蘚，所以叫做「苔寺」。西芳寺於 1994 獲列入聯合國教科文組織世界文化遺產，庭園風景秀麗，別樹一幟，尤其係池塘周圍一帶望落似漢字「心」嘅形狀，份外獨特，歷來亦成為咗唔少設計師嘅靈感之源。要參觀寺廟同埋神奇嘅苔蘚花園，你必須以書面形式提交姓名、參觀人數、首選日期同郵寄地址，寄去以下地址。西芳寺入場費係 3,000 円，喺參觀當日俾錢就得。

位置： 615-8286 日本京都西京區松尾神ケ谷町 56

電話： +81 (0)75 391 3631

探索西芳寺酒店

13. 廣隆寺

推介： 歷史文化, 拍照

好多人都認為廣隆寺嘅歷史可以追溯到 603 年，係京都最古老嘅寺廟。呢座寺廟曾經於 818 年同 1150 年遭受火災嚴重燒毀，好彩每次都重建成功。靈寶殿保存咗好多古代文獻、繪畫同著作，全部都被視為國寶。而大多數遊客特別有興趣了解嘅就係寺廟廣場嘅木雕像。廣隆寺位於距離旅遊路線好遠嘅太秦。不過，如果你身處西面鄉郊，不妨到呢個有趣景點一遊！

位置： 616-8162 日本京都右京區太秦蜂岡町 32

開放時間： 每日 09:00 至 17:00

探索廣隆寺酒店

14. 敷地神社 (別名：わら天神宮)

推介： 家庭

如果你咁啱大肚，又或者識得有人大肚，就一定要去敷地神社，保佑「準媽媽」健康快樂！呢座古老嘅神道神社係要喺分娩期間庇佑 BB 同媽媽—相傳，由神社求返嚟嘅特殊護身符仲可以預測 BB 性別添！敷地神社鄰近京都北部嘅立命館大學，學生亦都好鍾意喺考試之前親臨祈願。

位置： 603-8375 日本京都北區衣笠天神森町 10

電話： +81 (0)75 461 7676

15. 法然院

推介： 家庭, 拍照, 經濟實惠

由哲學之道小徑嘅分岔路走過，你就可以向法然院淨土宗小寺廟進發，沿途細賞絕色風光。質樸嘅茅草門、同埋僧侶不時重新設計嘅耙石花園，統統係你因循古老長廊遊覽、享受休閒時光嘅好地方！經過寺廟後面，仲有一道經典日式小橋，通往祥和鏡靜嘅錦鯉池；然後，你就會見到觀音菩薩嘅宏偉雕像。

位置： 日本京都左京區鹿ケ谷御所ノ段町 30 番地

開放時間： 每日 05:00 至 16:00

電話： +81 (0)75 771 2420

探索法然院酒店

此文章含有 Go Guides 編輯團隊的個人意見。Hotels.com 會向於本網站上撰文的作者付費，其中或包括旅遊及其他費用。