京都 25 大最佳玩樂活動

嚟到京都，又點可以唔探索下市內最出色嘅寺廟神社？呢個城市坐擁數以千計嘅寺廟同神社，有啲信奉佛教，有啲就係神道教神殿 (呢個係日本嘅古老宗教，認為一切都有靈魂，應該受到尊重)。雖然京都最優秀嘅寺廟神社都位於市中心便利位置、又或者圍繞市中心地帶，但係都盡顯地道風情，幽靜到你唔信！

講到日本，「藝伎」可能係你率先諗到嘅特色之一；而京都曾經係藝伎嘅活動樞紐，可惜時移世易，呢個古都而家只係剩返唔夠 500 位藝伎嚕…京都市的藝伎和舞子 (學徒藝伎) 經常亮相鴨川以東的祗園傳統街區，不妨找個晚上早點來到，靜看這些年輕優雅的女士趕去精緻高檔的茶館工作—佢哋著住典雅貴價嘅傳統絲綢和服，盤好頭髮，面上拍滿粉白色嘅化妝品，腳踏「下馱」傳統木屐同白襪，風情萬種；而且，呢班女仔有時仲會特登放慢腳步，面向遊客嘅相機，露出友善可愛嘅微笑架！藝伎嘅工作係唱歌、跳舞、演奏傳統樂器，娛樂賓客；不過，想有藝伎相伴，絕對耗價不菲！

京都有數之不盡嘅博物館，任你探索，一覽日本眾多備受推崇嘅歷史文物。不妨用少少時間參觀下博物館，令你喺市內嘅行程更具深層意義？京都坐落於日本文化中心已經 1,000 幾年，擁有悠久嘅歷史同傳統，你可以喺呢度了解古老嘅武士文化，接觸日本傳統茶道等藝術，甚至一探京都生產清酒嘅往昔故事。

二條城是遊覽京都的必去之地，曾經係德川幕府喺京都嘅居所，建於 1603 年，至今從來都未重建過，喺日本文化遺產裡面，算係獨一無二。城堡內嘅一切都係原始真品，包括內部裝修都不例外！要數遊客最愛，就一定非二之丸御殿嘅「黃鶯走廊」莫屬—呢個名來自會發出「吱吱」聲嘅地板，作用係令入侵者難以潛入。二条城內部設計豐富，飾有精美木雕同出自幕府時期頂級藝術家手筆嘅畫作。另一方面，日本好多重大歷史事件亦係喺呢度上演—其中，最後一任德川幕府將軍於 1867 年喺二条城將權力移交俾天皇，正式結束咗德川幕府 250 年嘅統治歷程。二条城已經被列為聯合國教科文組織世界文化遺產。

東映太秦映畫村係京都最引人入勝嘅景點之一，做過好多部武士同古裝電影嘅拍攝場景，設有趣味盎然嘅露天同室內設施，包括舊屋、穀倉同廳房等等。事實上，你可以當呢個公園係活生生嘅博物館，盡情探索，細賞忍者表演，又或者試下著傳統服飾，一嘗做公主、軍閥、武士、忍者或藝伎嘅滋味—記得要影相「打卡」啊！映畫村各處都修葺良好，散發住屬於日本舊時代嘅懷舊氣息；而園內嘅鬼屋亦都不容錯過—屋裡面嘅「鬼」全部都係演藝學生，會出盡全力嚇到你「咿嘩鬼叫」！

呢片秀麗竹林位於嵐山市中心天龍寺後面。幾個世紀以嚟，清風吹過嫩綠色竹葉、竹幹輕柔碰撞嘅聲音，都曾經為日本無數藝術家、詩人同作家送上創作靈感。事實上，呢片茂密竹林、以及竹林裡面嘅寺廟神殿，同樣具有文化意義，林地從天龍寺一路通往大河內山莊，林中小徑指示清晰。

京都係參觀日本傳統劇院嘅好地方，熱門嘅舞台劇包括「歌舞伎」同「能樂」等等。歌舞伎一開始係由女性創辦，歷史可以追溯到 17 世紀，而家就完全由男性出演—見到男演員扮演女角都咁優雅，的確令人著迷！京都南座劇場是城中最出色的歌舞伎劇院，鄰近鴨川東岸嘅祗園四条站。

嚟到京都，另一種值得推介嘅經典舞台表演，正正係同樣全男班演出嘅「能樂」，以緩慢動作同面具作為表演內容嘅一部分，相當有趣！如果你有時間，仲可以參觀「祇園角」獨特劇院—呢度會演出京都七種專業表演藝術，包括「狂言」經典喜劇、京舞、「雅樂」朝廷音樂、箏、「文樂」木偶戲、茶道同花道。

哲學之道係一條風景優美嘅小徑，命名自京都大學知名學者西田幾多郎—以前，佢成日步行來往區內各處，又可以保持健康，又可以冥想沉思。呢條步道沿住綠樹成蔭嘅運河延伸，起點喺銀閣寺，經由東山山脈嘅山腳通往南方嘅南禪寺，兩旁林立古色古香嘅 Cafe、工藝品商舖同餐廳。每年 4 月同 5 月，正值櫻花盛開，哲學之道旋即人頭湧湧，而全國各地都會有情侶嚟遊覽。呢條 2 公里長嘅小徑步程唔使 30 分鐘，不過沿路得意景物數之不盡，肯定會吸引你停步細賞。

京都塔於 1964 年啟用，高聳 131 米，俯瞰本市全景—適逢天清氣朗，由觀景台望出去，遠至大阪灣嘅景色都可以一覽無遺！京都塔裡面有一間 4 星級酒店、一個購物商場、一間雞尾酒吧同幾間餐廳，佢嘅現代化建築同古都其他地方好似唔多襯，但就因為貴為京都市內最高嘅建築物，所以自建成以來一直都係重要地標。京都塔鄰近京都站，由好遠嘅地方都可以望到佢。

京都有好多隱世寺廟，雖然仲未晉身遊客必到嘅觀光景點，但係依然不失壯麗。如果你已經去過最大、最著名嘅景點，咁就試下尋探呢啲比較低調嘅宗教聖地啦！要數參觀京都隱世寺廟嘅最美妙體驗之一，絕對係任你獨享嘅神秘氣息同樸素環境。由於京都公共交通系統發達，就算要去市郊，亦都好輕鬆。

桂離宮係日本最重要嘅大型寶藏之一，亦係純正日式建築同庭園嘅傑出典範。桂離宮原本為賞月而興建，設有由陽台延伸出去嘅寬敞平台；而宮外的散心庭園堪稱藝術品，將桂川河水引入中央池塘，池畔林立古色古香的茶室和佛教大廳。桂離宮由宮內廳管理，淨係接受遊客預約參觀，每日有舉辦幾節免費導賞團，但係星期日或者公眾假期就暫停導賞服務。想參加導賞團，記得要提前去宮內廳辦事處出示護照預訂！遊客可以乘搭阪急線到桂站，直達桂離宮。

呢座廳堂氣勢宏偉，以 12 至 13 世紀製作嘅 1,001 尊一比一佛教慈悲女神觀音像而聞名，而且所有雕像都係採用日本檜木精製而成，用金箔包覆，華麗不凡。寺內其他有趣雕像還包括佛教 28 神靈像，以及兩尊寺廟守護神像。三十三間堂長 100 米，被視為日本最長的木結構建築。每年 1 月，日本人都會聚集喺寺廟後面，觀賞至今已經有幾百年歷史嘅馳名射箭比賽。

神泉苑曾經係佔地廣闊嘅中式花園，而家只係剩返一小部分嘅原有造景，以同樣叫做「神泉苑」嘅池塘最引人注目—呢面池塘幾個世紀以來一直係重要嘅儀式場所，池水據聞具有療癒同保護功效添！神泉苑鄰近二条城，好易搵到。

呢啲石板街道屬於京都四大保護區之一，留存咗往昔魅力。喺日文裡面，「二年坂」同「三年坂」可以解做「兩年斜坡」同「三年斜坡」—當地的民間傳說認為：如果你在樓梯上跌倒，便會遭受兩至三年的厄運，所以記得小心看路！漫步在懷舊的街道上，欣賞精緻木造建築、小花園和舒適茶室，不失寫意。呢兩條大街都係位於京都東部通往清水寺嘅路上。

嵐山係京都郊區綠茵如畫嘅河畔地帶，遊客可以喺呢度細賞春日嘅櫻粉、夏日嘅翠綠、秋日嘅火紅同冬日嘅雪白。山坡上面，到處都有遠足小徑、觀景台同野餐區，俾你喺京都嘅人造奇觀之間抖返啖氣，享受自然美景。

渡月橋輕輕橫跨大井川，同周圍嘅大自然景致一樣咁迷人，令日本典型鄉村嘅形象更顯圓滿。每年 4 月 13 日，年滿 13 歲嘅小朋友都會被帶到渡月橋，進行重要嘅過橋儀式—據聞：小朋友喺附近嘅法輪寺祈褔之後，要一路行到尾咁過橋，一秒都唔可以望返轉頭，否則呢世人都會厄運連連！

鴨川肥沃嘅東岸孕育咗五個絢麗花園，成就出「城南宮之美」。這些花園由屢獲殊榮的園景設計師中根金作於七十年代末設計，呈現日本豐富植物品種和優雅園林設計的特色，飾有池塘、岩石、橋樑和水景。外國遊客都冇乜嚟呢個花園遊覽—就係因為咁，呢度即刻成為熱愛大自然人士暫避京都市中心人潮嘅好地方！

這片輝煌璀璨的避暑勝地於 1659 年為皇室建造，宮外花園分為上、中、下三層，背景是雄偉的比叡山，令人嘆為觀止。離宮嘅建築群入面仲設有好多茶室，同埋以前淨係俾京都上流人士使用嘅避暑小屋。修學院離宮嘅免費導賞團歷時大約 1 個鐘，雖然用日文講解，但係就有提供好多種語言版本嘅語音導賞機。如果想 Book 導賞團，記住要提前上網或者去京都御苑申請啊！

呢項活動一年兩度，分別喺 5 月同 10 月舉行，正好俾你見證藝伎嘅溫柔優雅—到時，藝伎 (經驗豐富嘅藝伎) 同舞子 (藝伎學徒) 都會表演精彩嘅古典舞蹈同音樂，每日 3 節，時間分別係 12:30、14:20 同 16:10。呢啲節目雖然係公開表演，但係場上嘅藝伎都好專業，統統配備精美服裝、化妝同道具，所以大受歡迎，吸引來自世界各地嘅觀眾觀賞。節目係「100% 日文」上演—之不過，就算睇唔明，淨係欣賞歌舞伎嘅精湛演出，都已經夠悅心賞目啦！

WAK JAPAN 中心係了解日本傳統藝術嘅好地方，遊客可以參與學習課程，又或者觀賞京都出色工匠展示精湛工藝。WAK JAPAN 創辦人小川美知嘅目標係促進國際基層文化交流，同埋為才華洋溢嘅日本家庭主婦提供大顯身手嘅舞台。你可以親身嘗試茶道、花道、書法、摺紙、打太鼓、日式料理、日式舞蹈、和服試著、清酒品嚐等等嘅傳統藝術，建議提前訂位，先可以穩奪每日課程嘅名額架！乘搭烏丸地鐵線到丸太町站，就可以直接嚟到。

京都府立植物園位於京都北部鴨川旁邊，喺 1924 年落成，1946 年曾經荒廢，到咗 1961 年再次啟用，成為設有溫室嘅大型植物園。而家，園內種有超過 12 萬棵植物，橫跨竹、櫻桃樹、繡球花、盆景、山茶花、日本鳶尾花同原生植物、蓮花等 12,000 個物種，劃分成園林專區，同絢麗無暇嘅歐陸花園相映成趣。公園裡面嘅溫室採用鑄鐵框架同平板玻璃建造，望落有啲似金閣寺，珍藏住來自 4,500 個物種嘅 25,000 多款植物。

如果你有幸喺秋天嚟到京都，就千祈唔好錯過市郊三千院楓樹迸發出嚟嘅紅、橙、黃絢爛色彩！三千院嘅歷史可以追溯到 784 年，係一座天台宗寺廟，以充滿大自然氣息嘅苔蘚花園而聞名，尤其以鮮艷嘅藍繡球花同櫻花特別醉人。

風俗博物館雖然唔算矚目，但係就展示咗日本歷代嘅各種服飾，除咗皇室禮服同武士盔甲外，仲有精美嘅藝伎和服添！呢座博物館嘅宗旨係帶你了解日本平安時代 (794 年至 1185 年) 嘅貴族世界，而鍾意全球第一部小說《源氏物語》嘅遊客，更加可以細賞館內展出嘅春宮 ¼ 比例模型，以 3D 角度睇哂段段故事！風俗博物館位於京都站附近一座辦公大樓的 5 樓。