倫敦 11 大最好玩活動

倫敦最出名嘅係乜嘢?

    倫敦擁有偉大嘅歷史,絕非世界上任何一個城市所能匹敵;與此同時,倫敦亦都係勇於創新嘅先鋒。你可以去博物館探索世界,亦可以觀賞最優秀嘅表演藝術;想飲杯嘢就落 club 落 bar,或者簡簡單單散個步,遍覽歷史嘅盛衰印記亦得。如果你一心喺呢度 shopping 嘅話,倫敦嘅市集同商場種類繁多,各適其適;而河邊每一季都會有短期活動,樂趣無窮。

    倫敦嘅宏偉之處實在毋庸置疑,當你喺著名街道漫步嘅時候,往往會浮現「下個轉角肯定有大事發生」嘅感覺。想感受吓我哋筆下嘅倫敦?咁就跟住呢份指南,了解吓去到倫敦第一日應該做啲咩啦!

    倫敦最好玩嘅活動係乜嘢?

    1

    喺柯芬園展開一日行程

    位於西區嘅柯芬園 (Covent Garden) 公共廣場盡展倫敦活力,啱哂步行遊覽!身處園內,街頭藝人施展渾身解數娛賓,餐廳就會喺廣場上架設室外座位,令到柯芬園喺晴朗嘅日子滿載優悠氣氛。行到柯芬園市集 (Covent Garden Market),有各式各樣嘅古董、手工藝品同新鮮農產品,任你買勻哂;

    而柯芬園嘅食肆種類繁多,有知名連鎖餐廳、貴價 fine dining 餐廳,亦都有用微波爐「叮叮食品」嚟呃遊客嘅「黑店」(笑~),選擇多到你唔知點揀好。話雖如此,一邊悠閒咁飲杯嘢,一邊欣賞街頭表演,都算係賞心樂事嘅!想睇區內至靚景色?咁就要去 Punch & Judy 酒吧嘅露台坐吓喇。

    地點: Covent Garden, London WC2E 8BE, UK

    地圖
    • 伴侶
    • 家庭
    • 購物
    • 拍照
    2

    沿住牛津街 Shopping

    牛津街 (Oxford Street) 係英國最出色嘅購物街,雲集全國頂尖品牌嘅旗艦店,既有 Selfridges、Debenhams 等等嘅高檔百貨公司進駐,亦有街邊小店,可以俾你買到檔次較低嘅平價手信。

    如果你想全方位體驗呢個零售天堂,可以搭地鐵去托登罕宮路 (Tottenham Court Road) 站,沿住大街一路「血拚」到街尾嘅大理石拱門 (Marble Arch)。牛津圓環站 (Oxford Circus) 大概位於牛津街中間位置,都幫到你認路架!想買「後生仔」時裝?咁就要兜一兜路,入去鼎鼎大名嘅卡爾納比街 (Carnaby Street) 喇。聖誕佳節前後,牛津街特別五光十色,有成千上萬嘅閃爍燈飾,同天馬行空嘅櫥窗陳列,令人目不暇給。

    地點: 英國倫敦牛津街

    地圖
    • 購物
    • 豪華住宿
    3

    喺白金漢宮睇衛兵換崗

    白金漢宮 (Buckingham Palace) 係英女王嘅皇座所在,亦都係遊客初訪倫敦嘅必去景點。要數參觀呢座莊嚴大宅嘅最佳時間,梗係負責保衛宮殿嘅衛隊換崗嗰陣啦!衛兵換崗嘅確切時間每日都有少少唔同,但通常係逢星期日、星期一、星期三同星期五嘅 11:00 左右,

    士兵一邊喺人群面前步操,銅管樂隊一邊演奏,場面都幾「儀式化」,相當鼎盛架!喺暑假等等比較熱鬧嘅日子,可能幾難搵個好位…所以,如果你想挨近圍欄,影到清晰靚相,就要預早嚟到霸位喇。

    地點: Westminster, London SW1A 1AA, UK

    開放時間: 星期日、一、三及五 11:00

    地圖
    • 家庭
    • 歷史文化`
    • 拍照
    4

    波羅市集掃街

    呢個美食市集包羅萬有,各式各樣嘅手工食品琳瑯滿目,用餐時間過嚟就最啱喇!舉凡香腸、烤肉、醃肉、貝類海產、新鮮出爐麵包,仲有你所認知嘅任何英國芝士 (另加好多款歐洲芝士),通通都可以喺呢度搵到。波羅市集 (Borough Market) 位於倫敦橋車站 (London Bridge) 附近,相當易搵。

    以市集嚟講,呢度嘅貨色價格偏高;不過,如果你唔怕「面懵」,周圍免費試食都夠食得飽嘅…只係,我哋就唔多建議咁做喇 (笑~)。

    地點: 8 Southwark St, London SE1 1TL, UK

    開放時間: 每日 10:00 至 17:00 (星期六 08:00)

    電話: +44 (0)20 7407 1002

    地圖
    • 品嚐美食
    5

    必睇景點:大笨鐘同國會大廈

    呢座宏偉壯麗嘅哥德式地標係英國議會所在地,而人稱「大笨鐘 (Big Ben)」嘅鐘樓已經為世界各地報時超過一個世紀!大笨鐘嘅鐘聲幾乎同鐘樓本身一樣出名,全球各地都有人翻錄 Copy,難怪兩者同樣係倫敦歷久不衰嘅標誌。

    由威斯敏斯特車站 (Westminster) 出發,你可以先細賞國會廣場 (Parliament Square) 上面嘅雕像,再越過威斯敏斯特橋 (Westminster Bridge),以國會為背景,影返張經典自拍照「打卡」。過橋後繼續向前行,你就會去到南岸,欣賞到河岸對面嘅迷人市景。

    地點: Westminster, London SW1A 0AA, UK

    地圖
    • 歷史文化`
    • 拍照
    6

    由威斯敏斯特搭水上巴士到塔橋

    倫敦地鐵可能係最多遊客使用嘅交通工具,但係搭水上巴士睇到嘅風景先至最靚,而且空氣仲更加清新添!公共水上巴士 Thames Clippers 有 5 條航線,沿泰晤士河 (Thames) 航行,雖然評價唔及遊船,但勝在船飛平啲,感覺亦特別「貼地」。

    如果你想搵沿河兩岸嘅最佳景點,建議你喺威斯敏斯特 (Westminster) 上船,遊覽至塔橋 (Tower Bridge) 落船。有 Oyster Card 嘅話 (講真…又點可以冇?),仲可以獲享折扣優惠架!

    地點: Victoria Embankment, London SW1A 2JH, UK

    地圖
    • 經濟實惠
    7

    食炸魚薯條

    炸魚薯條簡直同英女王一樣咁有「英倫風情」!呢道菜固然係最普遍、最易搵到嘅地道名物,但係要搵啱口味,其實殊不簡單。完美嘅炸魚薯條應該採用新鮮多汁嘅鱈魚或黑線鱈魚塊炮製,魚肉要絲絲分明,包裹住酥脆麵糊,伴碟配搭蘸滿醋嘅粗切薯條,先最正宗。

    全倫敦好多間酒吧都有「見得吓人」嘅炸魚薯條,而講到最正嘅選擇,就首推史比特市集旁邊屢獲殊榮嘅 Poppies Fish & Chip Shop 喇!呢間店家嘅魚非常新鮮,而且仲有各種各樣嘅伴碟任揀,包括豌豆茸同鱔魚凍等等,用仿報紙包住上碟,錦上添花。

    地點: 6-8 Hanbury St,London E1 6QR,UK

    開放時間: 每日 11:00 至 23:00

    電話: +44 (0)20 7247 0892

    地圖
    • 品嚐美食
    8

    去史比特市集繼續掃貨

    史比特市集 (Spitalfields Market) 以走在潮流尖端嘅時裝店同古董店聞名,全場氣氛勁正,每日營業,而到週末仲有倫敦最優秀嘅獨立設計師出動,售賣各種精選手工作品添!場內各式各樣嘅時裝風格都有,既有印滿漫畫設計嘅女裝乾濕褸,亦都有「非洲風」嘅帽。史比特市集同倫敦東區嘅利物浦街站 (Liverpool Street) 只係相隔幾步距離,方便易去,

    除咗係 Shopping 天堂,仲設有濕貨市場,俾你選購新鮮食材,又或者去種類繁多嘅特許經營餐廳醫吓肚都得。如果你想著住新買嘅潮衫「曬命一番」,可以行去埋附近嘅布里克巷 (Brick Lane) 同潮區肖迪奇 (Shoreditch),吸引大眾眼球。

    地點: Brushfield Street, London, E1 6EW

    開放時間: 每日 11:00 至 19:00

    電話: +44 (0)20 7247 8556

    地圖
    • 伴侶
    • 購物
    • 非一般行程
    9

    必睇景點:自然歷史博物館

    自然歷史博物館 (Natural History Museum) 介紹大自然由暴龍時代到現世嘅各種演變,會為你送上有趣嘅互動體驗!博物館結合恐龍骨骼真品同互動展覽,定格地球上面各種生命奇蹟,令每位遊客都對身處其中嘅世界多一份尊重,懷住敬畏嘅心情離開場館。

    館內分為 4 個展區,老少咸宜嘅精彩體驗數之不盡,最出名嘅就係地震模擬器;而地質展區仲珍藏住一塊真嘅月球岩石添!自然歷史博物館建築本身比較似宏偉嘅大教堂,而唔多似博物館,館內唔少展品都會令你興奮驚訝。而最重要嘅係…呢度係免費入場架!

    地點: Cromwell Rd, London, SW7

    開放時間: 每日 10:00 至 17:30

    電話: +44 (0)20 7942 5000

    地圖
    • 伴侶
    • 家庭
    • 歷史文化`
    • 拍照
    10

    喺 The Shard 食飯飲嘢

    The Shard 樓高超過 1,000 英尺,外牆採用全玻璃建造,大廈形狀有如巨型冰柱,無論你身處倫敦邊一個自治市鎮,都一定會留意到佢。由大廈頂樓俯視嘅景色,更加令人嘆為觀止;而就算你咁啱唔係住喺 34 至 52 樓嘅香格里拉大酒店 (Shangri-La),都可以上去食餐飯、飲杯嘢,開展一個難忘嘅夜晚!

    喺眾多精緻華麗嘅餐廳同雞尾酒廊之中,Aqua Shard 係我哋首選嘅當代英式美食天堂;如果想喺臨瞓之前飲返杯,52 樓嘅 Gong 酒吧都唔錯架。

    地點: 32 London Bridge St, London SE1 9SG, UK

    電話: +44 (0)344 499 7222

    地圖
    • 伴侶
    • 晚間娛樂
    • 豪華住宿
    11

    去西區睇話劇,結束美好嘅一日

    倫敦西區 (West End) 堪稱「現場戲劇表演」嘅代名詞,尤其是音樂劇特別精彩。貴為全球首屈一指嘅表演藝術勝地,呢度上演嘅節目多不勝數,由《孤星淚 (Les Misérables)》之類歷久不衰嘅經典、最新鉅製,以至眾多由新銳藝術家創作嘅實驗劇場都有。

    嚟到倫敦最受歡迎嘅劇場,大部分高級座位票價超過 GBP100;之但係,如果你靈活安排日程,都可以上網搵即時平飛嘅—識揀一定係揀閒日嘅日間場,買到靚位嘅機會大好多架!

    • 伴侶
    • 家庭
    • 晚間娛樂
    • 豪華住宿
    Paul Smith | 旅遊常客

    開始計劃行程

    Maps