奧地利 10 座最靚嘅城堡

霍恩斯特維茨城堡 (Hochosterwitz Castle) 無疑係奧地利最華麗嘅堡壘之一，零舍上鏡！呢座中世紀岩石城堡坐落於 172 米高嘅白雲石山頂上，俯瞰住下面克恩頓 (Carinthia) 大致平坦嘅原野。每年 4 月至 10 月，城堡都會開放一部分嘅空間，俾遊客參觀。

行上城堡 14 道大門嘅小徑雖然好長，勝在沿路風光如畫；而城堡裡面開設咗唔少展廳，匯集令人嘆為觀止嘅文藝復興時期藝術作品，仲有中世紀嘅武器同盔甲。城堡外面嘅教堂同花園夢幻繽紛；而由堡頂遠眺鄉村美景，同樣醉人！

薩爾茨堡要塞 (Hohensalzburg) 山頂堡壘碩大宏偉，雄據奧地利薩爾斯堡 (Salzburg) 嘅天際線，歷史可以追溯到 1077 年，裡面有好多間中世紀房屋同內部庭院，任你探索。不妨買入場套票，搭纜車上城堡，

沿途留心望吓薩爾茨堡要塞嘅盾徽—呢個圖案都幾特別，係一隻攞住蘿蔔嘅獅子嚟架，喺城堡嘅部分牆身都會見到。堡內有幾間博物館，當中包括得意可愛嘅扯線木偶博物館，展出薩爾斯堡扯線木偶劇院嘅收藏品。

霍亨威爾芬城堡 (Hohenwerfen) 位處山頂，俯瞰奧地利維爾芬 (Werfen) 集鎮，亦係一座中世紀歷史博物館，由薩爾斯堡 (Salzburg) 大主教興建，一般都被視為薩爾茨堡要塞 (Hohensalzburg Castle) 嘅姐妹堡壘，

係你體驗中世紀風情嘅好地方！不妨搭纜車沿住森林峭壁上山頂，欣賞沿途嘅優美風景，再參加城堡導賞團，去堡內嘅獵鷹中心睇埋定期猛禽表演。

克勞施泰恩城堡 (Kreuzenstein Castle) 係奧地利最風景如畫嘅童話城堡之一，相鄰嘅塔樓望落仲好似睡美人嘅香閨添！有別於名單上嘅其他舊城堡，克勞施泰恩城堡外觀保養完善，皆因佢採用歐洲各地中世紀城堡遺留嘅部件重建。

由於克勞施泰恩城堡狀況良好，所以成日成為電影場景，內容一般有關吸血鬼、中世紀騎士等等嘅奇幻題材。

唔好以為呢座係德國符騰堡州嘅同名城堡喎！奧地利嘅列支敦士登堡位於首都維也納以南叢林茂密嘅高原上，係宏偉壯觀嘅羅馬式地標，成日被森林迷霧籠罩，好似夢幻童話場景一樣。

而且，夏季天氣晴朗嘅話，列支敦士登古堡仲會開辦導賞團，帶你參觀裡面嘅中世紀武器同傢俱，由露台欣賞森林嘅壯麗全景。

中世紀堡壘安布拉斯城堡 (Ambras Castle) 代表咗文藝復興時期嘅最高境界，設計一時無兩，令人讚嘆。喺獨立嘅博物館大樓內，保存住城堡 16 世紀蒂羅爾 (Tyrolean) 統治者嘅珍貴藝術品，被譽為當今博物館嘅先驅。

城堡軍械庫裝滿咗 15 世紀嘅板甲同文藝復興時期騎士嘅武器，蔚為壯觀。關於城堡本身嘅歷史，你亦都可以喺度了解更多。館內收藏品另有涉獵藝術範疇，涵括精緻繪畫、哥德式雕塑同手工玻璃製品，同樣值得細賞！

弗蘭岑斯堡 (Franzensburg) 係一座水上城堡，被鬱鬱蔥蔥嘅森林花園所隔離，係位於維也納外圍拉克森堡 (Laxenburg Castles) 宏偉建築群嘅一部分，建於城堡花園人工湖嘅小島上，歷史可以追溯到 1801 年。

由弗蘭岑斯堡以至拉克森堡城堡群，兩者都提供咗好多休閒活動—其中，遍佈花園嘅遠足小徑可以俾你浪漫散步，而一家大細就可以踩單車或者喺遊樂場玩返餐；你仲可以喺風景秀麗嘅湖上、雄偉城堡嘅夢幻背景下，租架船泛舟暢遊添！

里格斯堡城堡 (Riegersburg) 位於遠古火山之巔，望落好似由山頂嘅熔岩之中升起一樣！事實上，呢座城堡某啲部分又的確係用山上嘅玄武岩石頭建造嘅，歷史可以追溯到 1100 年代，堡內隱約俯瞰到同名嘅古老山谷小鎮。

里格斯堡城堡而家已經化身博物館，皇室房間同畫廊展示咗城堡同村莊嘅動盪歷史，而堡外嘅景色令人嘆為觀止。城堡周圍有啲冒險活動亦值得一試；而中午之前、以及 14:00 至 17:00 期間，仲會有中世紀獵鷹表演添！

歐特湖城堡 (Seeschloss Ort) 係奧地利格蒙登 (Gmunden) 特勞恩湖 (Lake Traunsee) 上嘅一顆明珠！天氣晴朗嘅時候，波光粼粼嘅湖面映照出城堡倒影，而背景就有艾拉科格爾 (Erlakogel) 山脈嘅輪廓，風景優美，難怪成為格蒙登人氣爆燈嘅午餐勝地，亦係來往維也納同哈修塔特 (Hallstatt) 自駕遊嘅必到之境。

呢座城堡嘅歷史可以追溯到 1080 年，喺第一次世界大戰之中倖存落嚟，而家就成為咗舉辦活動同展覽嘅場地。你可以由湖邊嘅木板碼頭行去城堡；據聞：呢度有隻貌似巨型海馬嘅湖中怪物，叫做 Lungy，會喺平靜嘅水中潛伏…呢個傳說聽落唔算恐怖吖，應該會為你嘅旅程增添樂趣 (笑~)！

維斯貝格城堡 (Schloss Wiesberg 或 Wiesberg Castle) 坐落於俯瞰帕斯農谷 (Paznaun Valley) 嘅翠綠山丘上，距離奧地利蒂羅爾邦 (Tyrol) 蘭德克鎮 (Landeck) 以西 4 公里。沿住山谷公路 Silvretta-Hochalpenstraße 揸車行駛，就可以見到城堡嘅宏偉景象，而引人注目嘅特里桑納 (Trisanna) 鐵路大橋仲會一路延伸到城堡。

可惜，維斯貝格屬於私人財產，遊客唔可以停車入內參觀。自 13 世紀以嚟，呢座城堡嘅擁有權不斷更改，佢甚至曾經默默見證住 1809 年巴伐利亞 (Bavarian) 同帕斯農部隊交戰！