維也納 10 大拍拖活動

維也納嘅美泉宮 (Schönbrunn Palace) 係 18 世紀國王法蘭茲·約瑟夫一世 (Emperor Franz Joseph I) 嘅夏日行宮，而家開放舉辦宮殿導賞團，俾遊客欣賞堂內瑰麗堂皇嘅洛可可式裝潢。你可以喺巴洛克式宮殿嘅夢幻花園裡面，跟隨哈布斯堡王朝 (Habsburgs) 嘅足跡，

漫步經過「手舞足蹈」嘅噴泉，行勻哂花卉露台等等嘅浪漫景點，當中仲包括以大理石女神像裝飾嘅星池 (Star Pool) 添！喺花園迷宮裡面玩咗一陣，係時候參觀埋御車堡 (Wagenburg) 博物館，細賞連灰姑娘都眼紅到爆嘅金色馬車。

美景宮 (Belvedere Palace) 係 18 世紀薩伏伊親王歐根 (Prince Eugene of Savoy) 嘅巴洛克式夏日行宮，宮內收藏咗大量藝術品，其中最出名嘅就係維也納畫家古斯塔夫·克林姆 (Gustav Klimt) 嘅象徵主義作品。呢位已故藝術家令人神魂顛倒嘅《吻 (The Kiss；又名《戀人》(The Lovers))》畫作正正擺咗喺美景宮上宮 (Upper Belvedere) 美術館嘅隱蔽角落之中，

以類似馬賽克嘅風格創作，描繪一對愛侶企喺斷崖邊長滿鮮花嘅草地上緊緊擁吻，浪漫究極；而愛侶嘅衣飾以金箔點綴，背景亦都鋪上金、銀甚至鉑金薄片，閃爍生光。美景宮有開辦私人導賞團，深入介紹相關藝術同埋歷史，都好值得參加架！

喺狹長嘅維也納多瑙島 (Donauinsel 或 Danube Island) 上面欣賞多瑙河景色，先至最靚！史特勞斯 (Strauss) 其中一首華爾茲名作，就係受多瑙河嘅靚景啟發—所以話呢，呢條蜿蜒流過維也納嘅河流，係真心有詩意架~

而維也納中心以東嘅多瑙島翠綠小巧，就啱哂「賞河」，河岸有行人徑同河灘，仲可以俾你試玩雙人腳踏輪船添！

除咗瀰漫於空中嘅知名古典音樂外，維也納最為人熟悉嘅聲音，仲有馬蹄踏上鵝卵石街道嘅「咯躂咯躂」聲。維也納嘅酒店一般都有開辦傳統馬拉馬車「fiaker」觀光遊，不妨 Book 嚟體驗吓。

夜幕低垂，內城區 (Innere Stadt) 嘅古蹟同迷人小徑沐浴於金色光芒之中，零舍浪漫；好多時，斯蒂芬廣場 (Stephansplatz)、阿爾貝蒂娜廣場 (Albertinaplatz) 同霍夫堡宮 (Hofburg Palace) 前面都排滿馬車兜客，馬背配置咗長毛絨凳，而車伕仲會著古裝，帶你「穿越」返去古代添！

霍夫堡宮有如童話場景，曾經係哈布斯堡王朝 (Habsburgs) 600 年統治時代嘅焦點，宮內設有皇家公寓，當中包括伊利沙伯女王 (Empress Elisabeth) 嘅寢宮同埋豪華起居室，而後者仲被公認為係霍夫堡宮最靚嘅房間添！宮殿裡面亦有個金庫，收藏住成粒布冧咁大嘅紅寶石，閃閃發光。

參觀期間，記住要喺 10:00 去到西班牙皇家馬術學校 (Spanish Riding School)，探吓姿態優美嘅利比扎 (Lippizaner) 白馬；撞啱星期日，不妨去埋禮拜堂，聽維也納男聲兒童合唱團唱歌吖！

想令維也納約會更加難忘？不妨同另一半一齊上堂，學吓華爾茲舞步！維也納堪稱「華爾茲之都」，每年都有舉辦為期 3 個月嘅節慶，大約由 11 月開始，翌年 1、2 月達到高峰，幾百場舞會連番上演，只要求其參加一場，已經足以感受終極維也納體驗。

就算撞唔啱華爾茲節慶，維也納都仲有好多課堂，俾你學跳華爾茲嘅；而其中一間學校就叫 Tanzschule Elmayer，有開辦專為情侶而設嘅 50 分鐘課程。

Esterházykeller 酒窖算係一間「Heurige (葡萄酒小酒館)」，早喺 17 世紀開幕，歷史悠久，屬於維也納 Wallnerstraße 上巴洛克式埃施特哈齊宮殿 (Esterházy) 嘅一部分，隱身喺宮外嘅鵝卵石庭院度，飾有磚砌拱頂同木製雅座，營造出溫馨親密嘅感覺，啱晒私人聚會。

呢間餐廳精選好多種用本地葡萄釀製嘅雷司令 (Riesling) 同綠維特利納 (Grüner Veltliner) 美酒，配襯一道道佳餚，先至係最經典嘅維也納餐飲享受！唔講唔知—海頓 (Joseph Haydn)、莫扎特 (Mozart) 以至維也納皇室成員於 1600 年代都曾經出現喺酒館原址嘅劇院裡面，為呢度增添歷史氣息，都加分唔少架~

維也納鼎鼎大名嘅沙哈朱古力蛋糕 (Sachertorte) 就係喺 Café Sacher 發源。身處紅色天鵝絨設計嘅舖面，你可以盡情感受 19 世紀嘅浪漫氣氛；切開濃香沙哈杏醬朱古力蛋糕嘅糖霜面同時，不妨欣賞吓餐廳由吊燈同鍍金框油畫營造出嚟嘅美好氛圍吖！

如果你想百分百沉醉於朱古力帶嚟嘅幸福感，就要去埋同 Café 一樣位於維也納薩赫酒店 (Hotel Sacher Wien) 嘅 Sacher Boutique Spa，嘆返一節 90 分鐘嘅「朱古力交響曲 (Symphony in Chocolate)」護理，療程包括濃郁朱古力裹敷、純淨可可磨砂、朱古力 Body Mask，再加埋採用朱古力 Body Care 產品嘅減壓按摩，Sweet 得嚟夠哂 Relaxing。

喺維也納國家歌劇院 (Staatsoper) 度過一晚，肯定係身處城內嘅最浪漫活動，「沒有之一」！呢座馬蹄形嘅會堂採用紅色襯金色設計，有維也納知名愛樂樂團喺正廳表演，簡直係世界一流歌劇同芭蕾舞嘅典範。

維也納國家歌劇院嘅歷史可以追溯到 1860 年代；歷經百年，劇院至今仍然宏偉壯觀，華麗嘅大堂同優雅嘅中場休息室都有大量壁畫同裝飾，而最高級嘅座位票格平均係 EUR100 至 EUR200 之間。

維也納 Le Ciel 餐廳屢獲殊榮，由 Toni Mörwald 主理，位於維也納大酒店 (Grand Hotel Wien) 嘅 7 樓，採用巴洛克風格裝潢，仲可以由頂樓俯瞰維也納嘅璀璨景色添！呢間餐廳除咗獲米芝蓮評為星級之外，亦得到 3 頂 Toque 帽，就連 Gault Millau 都評出近乎完美嘅 18 分。

如果你想嚟呢度嘆返餐燭光 Fine dining，就要提早 Book 枱喇！Le Ciel 餐廳嘅索價喺維也納嚟講算高，勝在店內嘅完美用餐體驗肯定會令你永誌難忘；想 Casual 啲嘅話，喺餐廳戶外露台食 Lunch 都一樣咁嘆。