維也納 10 大親子活動

ZOOM 兒童博物館 (ZOOM Kindermuseum) 堪稱小朋友嘅「動手創作殿堂」，雖然節目時間表唔定，但通常都會提供 4 至 5 項活動選擇，切合細路仔嘅年齡同興趣—想嚟玩嘅話，就要提早預訂喇！

美術班開始之前，小朋友會先著上啱哂尺寸嘅「工作服」，覆蓋全身，然後就可以著手盡情畫畫；而專業美術老師會鼓勵小朋友唔好怕污糟，親手髹畫陰影、溝顏色，將油漆噴落牆上嘅紙度，創造出獨一無二嘅傑作，帶返屋企珍藏。

美泉宮 (Schönbrunn Palace) 嘅合家歡活動各適其適，場內仲貼心設計咗「小朋友限定」嘅「Kinder」兒童節目，你可以帶一班細路去到宮殿正門右側，俾佢哋學吓 Set Up 皇室餐枱，然後換上皇室成員或者古代中產階級嘅裝束，

了解舊時皇家宴會有咩食，體驗幾個世紀之前哈布斯堡 (Habsburg) 皇公貴戚嘅生活。另一方面，宮外嘅花園迷宮同遊樂場都好好玩架，戶外樂趣無限！

Demel 係維也納遠近馳名嘅餅店，自 1888 年以嚟一直製作各式維也納忌廉蛋糕同果仁糖，門市喺正美輪美奐嘅聖米歇爾廣場 (Michaelerplatz) 以北。如果你行到攰，又諗唔到其他辦法叫停班細路嘅話，「去 Demel 坐吓」就可以成為終極殺手鐧 (笑~)！

呢間餅店裝潢典雅，後舖點綴精緻，不妨搵個靚位，坐低慢慢欣賞；而小朋友仲可以透過廚房玻璃櫥窗，親眼望住師傅用巨型壓麵棍壓扁麵團、為蛋糕灑上糖霜添。

你同屋企人想一眼睇哂各種各樣嘅海洋動物同爬行動物？去維也納嘅 Haus des Meeres 水族館就啱哂喇！呢間水族館設有陸地動物飼養區，養咗毒蛇、蟒蛇同鱷魚；喺熱帶海水區嘅巨型魚缸入面，就有鯊魚、海龜同埋好多其他品種嘅魚，喺度自在游水；

嚟到熱帶區，樹枝之間有熱帶鳥類飛翔，亦有靈長類動物搖搖擺擺。而且，飼養員全日都會定時餵鱷魚、鯊魚同食人魚，呢 Part 肯定最深得小朋友歡心啦！

蝴蝶屋 (Schmetterling Haus) 係設於奧地利首都維也納嘅小型溫室，啱哂成家人嚟玩吓、學吓嘢。蝴蝶屋坐落喺維也納約瑟夫廣場 (Josefsplatz) 嘅阿爾貝蒂娜美術館 (Albertina art Museum) 同城堡公園 (Burggarten) 之間，

裡面既有蝶蛹，亦有蝴蝶成蟲拍動五顏六色嘅翼，扣人心弦，肯定會深深打動你一家大細。而且，各種顏色嘅蝴蝶可能會停留喺你身上，搭返程「順風車」；有緣嘅話，你仲有機會見到佢哋破繭而出添！

喺維也納未坐過傳統馬拉馬車 Fiaker 穿梭城市，你嘅家族旅行又點算圓滿呢？安坐車上，大人可以由唔同角度欣賞維也納嘅宏偉地標，而小朋友實鍾意呢段「顛簸刺激」嘅旅程啦！

Fiaker 馬車設計優雅精美，同維也納嘅壯麗名勝一樣，都係市內不可或缺嘅一部分；馬背配置咗長毛絨凳，而車伕仲會著古裝，令成件事真實感培增。馬車之旅通常由斯蒂芬大教堂 (Stephansdom) 或者聖米歇爾廣場 (Michaelerplatz) 出發，有短途同長途路線任你揀。

玩到咁上下，想食啲甜嘢唞唞嘅話，係時候去 Zanoni & Zanoni 坐陣喇！呢個品牌喺維也納第一區有兩間分店，專賣雪糕同蛋糕，由 Lugeck 街嘅古騰堡像 (Johannes Gutenberg Monument) 行幾步，就會去到總店。

面對店內口味繁多嘅 Gelato 雪糕，你話唔定旋即「選擇困難症」發作，連食幾多球都有排諗啊！講到店家最受歡迎嘅口味，絕非雲呢拿、榛子、櫻桃味 Coppa Amarena 同埋果味 Coppa Delle Casa 莫屬。

維也納普拉特遊樂場 (Prater) 係歐洲最迷人、最古老嘅遊樂園之一，場內嘅 ReisenRad 被稱為「維也納巨型摩天輪」，歷史可以追溯到 1897 年，咁多年嚟經過好多次修復同提升。

全家人坐上摩天輪，由 65 米高處睇盡維也納嘅全景，絕對係極致視覺享受啦！普拉特嘅機動遊戲啱晒一家大細玩，既有嚇到你「鼻哥窿都冇肉」嘅 Boomerang 過山車，亦都有懷舊嘅碰碰車，門票大約每人 EUR10。

美泉宮木偶劇院 (Marionettentheater Schloss Schönbrunn) 採用造工精緻、栩栩如生嘅木偶，重新演繹一個又一個家傳戶曉嘅童話故事同維也納民間傳說。技藝超群嘅木偶師通過動作同姿勢，為精雕細刻嘅木偶注入生命，

表演劇目有《阿拉丁 (Aladdin)》、《糖果屋 (Hansel and Gretel)》，亦有講述皇室故事嘅劇院原創作品，其中一套叫做《茜茜的秘密 (Sisi’s Secret)》，內容關於深受奧地利人愛戴嘅伊利沙伯女皇 (Empress Elisabeth)。院內劇目大多數都有提供好幾種語言版本；之但係，無論你聽得明、聽唔明都好，單係欣賞音樂同舞台表演，都足以著迷心醉！

維也納嘅西班牙皇家馬術學校 (Spanische Hofreitschule) 別樹一幟，教授傳統馬術，成日都有令人驚嘆嘅馬匹芭蕾節目上演，主角係利比扎 (Lippizaner) 種馬，而最出名嘅環節有經典盛裝舞步，同埋經過排練嘅跳躍動作。見到馬仔都識跳舞，無論咩年齡嘅小朋友都會拍爛手掌啦！

一家大細可以買飛睇咗晨操先，再參加導賞團參觀馬房，咁樣抵好多架~ 校內掛咗吊燈同大窗簾，裝飾到好似歌劇院咁，呢種體驗簡直係世間絕無僅有。