巴塞隆拿旅遊懶人包

• 巴塞隆拿屬於地中海氣候，冬季和暖，夏季炎熱，
• 平均溫度由冬天嘅 8ºC 到夏天嘅 29ºC 左右。
• 全年降雨最多嘅月份係 10 月，平均有 9 日落雨。
• 巴塞隆拿一年四季都適合遊覽，又以 5 月﹑6 月同 9 月最正，除咗可以避開 7 月至 8 月嘅旺季旅客人潮之外，酒店同機票價錢仲平啲添！

• 主要語言：西班牙文
• 插頭類型： C 同 F
• 電壓：230 V
• 貨幣：歐元 (EUR)
• 國際電話代碼：+34 93
• 緊急電話 ：112

巴塞隆拿埃爾普拉特機場

巴塞隆拿埃爾普拉特機場 (Barcelona-El Prat Airport) 位於巴塞隆拿市中心以南 12 公里外，係西班牙最繁忙嘅機場之一。由機場出發，去巴塞隆拿市中心嘅交通方式如下：

• 搭的士到市中心大約需要 25 分鐘，費用係 EUR30 左右。的士站位於 1 號同 2 號客運大樓嘅到境大堂外。
• 搭火車到市中心大約需要 25 分鐘，費用係 EUR4 左右。Rodalies de Catalunya 火車站位於 2 號客運大樓外。
• 搭地鐵去市中心只需要 25 分鐘，費用係 EUR5。地鐵站位於 1 號客運大樓裡面、同埋 2 號客運大樓外面嘅火車站隔籬。機場站喺 L9 線上，要轉搭 L1﹑L3 或者 L5 線，先可以去到市中心。
• 搭 Aerobús - 機場快線巴士去市中心需要 25 分鐘，車費大約 EUR6。Aerobús 喺每座客運大樓外都有車站。
• 如果搭 TMB 巴士，由 2 號客運大樓出發去市中心需時 40 分鐘內，由 1 號客運大樓出發需時 55 分鐘，費用係 EUR3。
• 1 號同 2 號客運大樓內都有好多間租車公司。
  

巴塞隆拿桑茲火車站

巴塞隆拿桑茲火車站 (Barcelona Sants) 係巴塞隆拿嘅主要火車站，位於市中心以西，由高速火車連接巴塞隆拿﹑馬德里同埋西班牙各個主要城市。火車站裡面有 2 條地鐵線 (L3 同 L5)，仲有巴士同的士，直達你下榻嘅酒店。

巴塞隆拿有完善嘅公共交通系統，其中包括地鐵﹑電車﹑城市鐵路同巴士網絡，車飛都有好多種選擇，俾你輕鬆遊覽市內每個角落。

• 所有公共交通嘅單程票價係 EUR2.20 (4 歲以下小童免費)。
• 一張 T10 飛 (可以任搭所有公共交通工具 10 次) 費用係 EUR10.20，仲有多人票俾你揀 (一對情侶可以用 T10 飛搭 5 次車)。
• 你亦可以喺到達機場嗰陣買張 Hola Barcelona 旅遊卡，用 2-5 日，期間無限次任搭所有公共交通工具，票價係 2 日 EUR15 起。
• 巴塞隆拿卡 (Barcelona Card) 就包含無限次乘搭公共交通工具、免費或者以優惠價買博物館同景點門票，同埋喺指定地點食飯 Shopping 嘅 Discounts，有效期係 2 至 5 日，上網買仲平啲添！巴塞隆拿卡會喺你第一次使用嘅時候自動激活，夠哂方便。

• 你可以喺巴塞隆拿市內截官方嘅黃色同黑色的士，如果車頂著咗綠燈嘅話，就表示佢咃可以載客喇！
• 的士站遍佈全市各處，
• 你亦可以打去 936-936-936 Call 巴塞隆拿無線電的士台 (Radio Taxi Barcelona)。
• 巴塞隆拿嘅的士起標價係 EUR2.15，08:00 - 20:00 嘅基本費用係每公里 EUR1.13 (夜間收費 EUR1.34)，星期六、日會酌量加價。
• 如果你唔識西班牙文，最好準備定地址俾司機睇喇！
• 巴塞隆拿嘅的士多數都接受信用卡付款。
• 巴塞隆拿無 Uber，但係你都可以用好多個唔同嘅手機 App 叫的士，包括 Hailo，MyTaxi 同 Cabify。

想輕鬆探索陽光明媚又溫暖嘅巴塞隆拿？不妨試吓用共享單車啦！雖然 Bicing 公共單車共享系統只係俾當地人使用，好彩都仲有 Donkey Republic 為遊客提供服務。你只需要 Download Donkey Republic 嘅 App，就可以共享單車，收費係 30 分鐘 EUR1.5 起。Donkey Republic 嘅單車喺市內度度都搵得到；除此之外，市中心個別舖頭都有單車租嘅。