我哋嘅紐約旅遊懶人包羅列出你需要嘅基本資料,幫你 Plan 定美國行程,向各大人氣熱點進發!無論你去旅行去得幾密,都要留意以下問題:當地天氣係點?點樣由機場去酒店?需要邊種貨幣同插頭?我哋會為你提供所有答案,同場加映最佳旅遊時機、交通資訊、各類基本資料,同埋實用旅遊貼士,

    一切盡在呢份紐約旅遊懶人包之中。睇完呢份簡短易明嘅指南之後,你嘅紐約旅程應該就準備得七七八八架喇!

    1

    遊覽紐約嘅最佳時機 (天氣方面)

    紐約屬於亞熱帶濕潤氣候,平均溫度由冬天嘅 0ºC 至夏天嘅 23ºC,

    • 雨量全年平均分佈,每個月一般有 9 至 11 日會落雨,
    • 12 月至 3 月會落雪
    • 而 5 月至 9 月就係全年最溫暖嘅月份。
    • 夏天 (6 月至 8 月) 係旅遊旺季,酒店同機票價格都會相應上漲。
    • 5 月、6 月同 9 月尾至 11 月頭都係出發遊覽嘅好時機,到時唔單止天氣溫和,可以避開夏天嘅旅客人潮,而且機票同酒店嘅價格仲會係最抵架添!
    2

    紐約基本資訊

    • 語言:主要語言:English; Secondary: 英文、西班牙文、中文
    • 插頭類型:A 同 B
    • 電壓:120 伏特
    • 貨幣:美元 (USD)
    • 國際電話代碼:+1 212
    • 緊急電話:911
    3

    城市交通

    約翰甘迺迪國際機場

    約翰甘迺迪國際機場 (John F. Kennedy International Airport) 係紐約嘅主要機場,位於皇后區 (Queens),距離市中心東南偏東只有大約 24 公里,仲係北美最繁忙嘅機場之一添,場內有成 8 座客運大樓,餐飲同購物選擇齊全,亦有提供銀行同外幣兌匯等設施。前往紐約市中心嘅交通選擇有幾種:

    • 搭的士去曼哈頓要 30 至 40 分鐘左右,而車費大約 USD50 至 USD75;每座客運大樓外面都有的士站。
    • 坐機場捷運 (AirTrain) 同地鐵大約要 50 至 75 分鐘先去到曼哈頓,車費係 USD7.75;每座客運大樓都有機場捷運站,而呢個亦都係去紐約市中心最平價嘅交通選擇。
    • 甘迺迪國際機場 (JFK Airport) 有提供唔少接駁巴士選擇,去曼哈頓需要 50 至 75 分鐘左右,車費大約 USD20 至 USD30。
    • 每座客運大樓都設有租車公司嘅櫃枱,你只要搭機場捷運去聯邦環路站 (Federal Circle Station),就可以拎車喇!


    獨家貼士

    • 地鐵係「慢」遊曼哈頓之選,
    • 你要搭機場捷運去到牙買加站 (Jamaica Station) 先,然後再轉搭 E、J 或者 Z 線去曼哈頓下城 (Downtown Manhattan)/中城 (Midtown Manhattan)。又或者,你可以搭機場捷運去到霍華德海灘站 (Howard Beach station),再轉乘 A 線都得。
    • 如果你要喺最繁忙時段去曼哈頓同布魯克林 (Brooklyn),可以喺牙買加站上車搭長島鐵路 (LIRR),方便到極!


    拉瓜迪亞機場

    拉瓜迪亞機場 (LaGuardia Airport) 係紐約三個機場入面最細嗰個,位於皇后區 (Queens),距離曼哈頓中城 13 公里左右,主要飛內陸線。前往紐約市中心嘅交通選擇有幾種:

    • 搭的士去曼哈頓要 20 至 30 分鐘左右,而車費大約 USD50 至 USD75;每座客運大樓外面都有的士站。
    • Q70 巴士 (亦稱為 LaGuardia Link) 會載你去傑克遜高地 (Jackson Heights) 嘅地鐵站,大約一個鐘就去到同曼哈頓中城同下城,車費係 USD7.75。
    • M60 巴士往來機場同百老匯 (Broadway) 嘅哥倫比亞大學 (Columbia University) 附近,大約一個鐘就去到曼哈頓上城,車費係 USD8 左右。
    • 想去紐約中央車站 (Grand Central)、賓州車站 (Penn Station) 同港口管理局 (Port Authority),仲可以搭 NYC Airporter 巴士。
    • 客運大樓外面有租車接送標誌,可以俾你搭免費接駁巴士去到租車中心,喺大約十間租車公司之間隨心任揀。


    紐瓦克國際機場

    紐瓦克國際機場 (Newark International Airport;EWR) 位於新澤西州,同另外兩個機場相比,距離紐約市區都係遠多啲啲啫。國內外嘅航班都有喺度降落。前往紐約市中心嘅交通選擇有幾種:

    • 視乎交通情況,搭的士最快 40 至 50 分鐘內去到市中心,車費大約 USD50 至 USD75。
    • 紐瓦克國際機場捷運 (AirTrain Newark) 同新澤西捷運 (NJ Transit) 完美交接,你可以轉搭後者,繼續出發去曼哈頓嘅紐約賓州車站 (New York Penn Station;唔好搞錯咗紐瓦克賓州車站 (Newark Penn Station) 喎),又或者搭 PATH 通勤列車去世貿中心 (World Trade Center)。兩個目的地車程都只需要 30 至 40 分鐘,去世貿中心嘅車費係 USD11,去曼哈頓就要 USD12.50。
    • Newark Liberty Airport Express 巴士亦都可以直達港務局 (Port Authority)、布萊恩公園 (Bryant Park) 同中央車站 (Grand Central),車程大約 50 至 60 分鐘,車費係 USD 13。
    • 搭 AirTrain 可以直達租車區。


    如果你搭火車嚟

    • 紐約市有兩個大火車站,
    • 第一個係中央車站 (喺東區),你可以喺度轉搭其他巴士同地鐵線 (4、5、6、7 同 S),出發去到市區任何地方;
    • 而北部地鐵 (Metro-North) 通勤網絡就啱哂遊覽城郊。
    • 中央車站本身已經係個景點,搭車經過呢度,都算係 Check off 必遊勝地名單嘅又一個地標吖!
    • 紐約市第二個火車站係賓州車站 (位於西區),有 Amtrak 列車同 LIRR 行駛,服務周到,
    • 仲連接住好多條巴士同地鐵線,例如 1、2、3 同 A、C、E,載你去到市內任何地方。


    如果你搭巴士嚟

    • 所有大公司嘅巴士都會由美國各地城市駛至港口管理局巴士總站 (Port Authority Bus Terminal);
    • 而站內有成 12 條地鐵線,後續交通超級方便!
    4

    紐約市內交通

    旅遊貼士

    如果路程唔係好遠,行路不失為探索紐約嘅好方法;之但係,要去遠啲嘅目的地,市內都仲有由 MTA (大都會運輸局) 營運嘅地鐵同巴士俾你搭嘅,交通網絡好完善架!

    • 唔少地鐵同巴士線都係全天候 24 小時營運,服務範圍包括曼哈頓、皇后區 (Queens)、布魯克林 (Brooklyn) 同布朗克斯 (Bronx)。
    • 只要有張 MetroCard,你就可以用優惠價搭地鐵同巴士,參觀指定博物館同去餐廳食飯嗰陣仲有得慳多啲添!
    • MetroCard 售價由 USD5.50 起,可以喺有自動售賣機嘅地鐵站、巴士站同櫃枱買到。
    • 單程地鐵或者巴士車費要 USD2.75 (無 MetroCard 就要俾 USD3)。
    • 所有巴士都裝咗無障礙設施,方便傷健人士上落。
    5

    的士

    • 曼哈頓嘅的士多數都係黃色嘅,而外城區嘅就係「Boro 綠的」,
    • 兩者都可以喺街度截到。
    • 市內的士全部配置咗咪錶、GPS 系統同信用卡收費機;
    • 順帶一提,落車嗰陣記得俾少少 Tips 司機喎!
    • 的士起標價係 USD2.50,之後每 1/5 英里 USD0.40;閒日 16:00 至 20:00 嘅繁忙時段會收取附加費。
    • Uber 同 Lyft app 都係適用於紐約嘅 Call 車 Apps。
    6

    踩 Citi Bike 單車

    • 紐約有個叫做「Citi Bike」嘅單車共享系統,提供一日同三日通行證,
    • 收費係每 30 分鐘 USD3,24 小時內無限次 30 分鐘騎乘價格就只需 USSD12。
    • 租車站 24 小時開放;而多得 App 系統同埋單車獨有嘅亮藍色彩,喺街度都好易搵到佢哋架!
    7

    渡輪

    • 史泰登島渡輪 (Staten Island Ferry) 免費橫越紐約海港 (New York Harbour),連接史坦頓島 (Staten Island) 同曼哈頓;
    • 東河渡輪 (East River Ferry) 就往來曼哈頓、布魯克林 (Brooklyn) 同皇后區 (Queens);
    • 而海面仲有水上黃色的士,沿住市內多條路線航行,主要來往各大旅遊熱點。
    8

    租車

    • 想喺紐約市內揸車,可能要再諗諗…因為全市嘅泊車費都超貴,
    • 仲要提早 Plan 定泊車位添!如果你真係決定租車自駕,Best Parking 網站可以幫你比較商業泊車設施嘅價格同位置,仲會提供路邊泊車嘅最新消息同所有重要法規資訊。
    • 記得小心留意交通標誌喎,因為轉彎位隨時都可能有拖車出現架!

    開始計劃行程

    繼續探索

    紐約

    美國

    Maps