紐約 8 大購物區

上東城 (Upper East Side) 出哂名係上流社區，住咗好多有錢人，周圍都係現代化摩天大廈，就連享譽國際嘅麥迪遜大道 (Madison Avenue) 都喺區內，雲集各大名師設計品牌門市同高檔百貨公司，由 Louis Vuitton、Tiffany & Co.、Prada 以至 Valentino…只要你講得出嘅名牌，呢度都應有盡有！聽落好似淨係啱有錢人瘋狂「血拚」？其實，你唔一定要有「斬獲」；簡簡單單喺麥迪遜大道行吓，都足以親身感受紐約 Window Shopping 嘅樂趣啦！

每逢季節更替，Saks Fifth Avenue、Barney’s 同博道夫古德曼 (Bergdorf Goodman) 等等嘅百貨公司都會重新佈置櫥窗陳設，換上最新、最奢華嘅商品，每年都吸引到成千上萬嘅客流架。溫馨提示：越係去到上城區中心，店舖消費就越高。

「蘇豪」呢個名嚟自英文「SoHo」嘅譯音，意思係「休斯頓街以南 (South of Houston Street)」，區內開咗好多至 In 至潮嘅店舖同 Cafe，絕對俾到你 IG 放閃嘅好機會。無論你鍾意邊個品牌，都可以喺呢度搵到，Fast Fashion 即食時尚嘅代表有 Zara；藝術出版社嘅代表有 Taschen；而主流品牌嘅代表就有 Levi’s。蘇豪區一定冇麥迪遜大道 (Madison Avenue) 咁逼，邊行邊買，夠晒自在！講到蘇豪嘅 Shopping 首選，梗係唔少得捧場客超多嘅 Reformation、Glossier 同 American Two Shot 啦，人氣名店數都數唔晒。想幫自己轉個潮爆 Cool Look？咁就要快啲嚟呢度嘅舖頭揀返啲心頭好喇！蘇豪周圍嘅酒店服務質素都相當理想，而且價格豐儉由人。

「諾利塔」係英文「Nolita」嘅譯音，意思係「小意大利以北 (North of Little Italy)」，同蘇豪 (SoHo) 一樣係購物區，但人流就相對少好多，處處散發迷人嘅時尚氣氛，喺街頭經過嘅潮人身上更加突顯出嚟。諾利塔全區都係由窄巷交織而成，店舖櫥窗精心佈置咗各式陳設，Vince、warm、Babel Fair 同 Lingo 等等嘅精品店專售精選男女裝衫褲。當然，呢區又點止得咁少時裝店？只要周圍行吓，你一定會發掘到更多啱心水嘅店舖！

想「全日血拚」嘅話，東村 (East Village) 未必係你嘅首選；之但係，如果你對復古風有興趣，呢度嘅舖頭相信都會幾啱你！東村被視為曼哈頓少數仲保留獨特個性嘅地方，大街小巷都充滿新奇有趣嘅店舖，俾你超脫現實嘅感覺。行到入 Cloak & Dagger，就好似「回到過去」咁，店內售賣嘅商品好多都唔過 USD100，但就令人聯想起 Wes Anderson；其他超有 Character 嘅店舖仲包括 Cobblestones 同埋 VideoGamesNewYork—呢間舖頭得一間更衣室咁大，竟然擺滿唔同年代嘅遊戲，相當特別！

運河街 (Canal Street) 人氣超旺—唔想俾咁多錢買正版名牌袋嘅人，都會嚟呢度尋寶。呢區開設咗好多臨時攤檔，無論係「名牌 (高仿)」手袋，定係銀包、名錶同香水，統統應有盡有，攤檔本身就已經係旅遊景點，啲小販盞鬼得嚟又 Nice，有時聽吓佢地講嘢，都幾搞笑架！無論你覺得呢度賣嘅係正版定 A 貨都好，運河街同上東城 (Upper East Side) 光潔亮麗嘅街道相比，氣氛肯定截然不同。如果你想住喺附近，可以揀間位於唐人街嘅酒店落腳吖！

溫馨提示：運河街唔係樣樣嘢都係正貨嚟架，最緊要識分冒牌貨同高仿貨：冒牌袋嘅款式、顏色同標誌都同正貨一模一樣；而高仿貨就係以原裝正貨作為「設計靈感」嘅相似產品。

西村 (West Village) 就係大名鼎鼎嘅布萊克街 (Bleecker Street) 同歷史悠久嘅格林威治村 (Greenwich Village) 所在地，雲集至 In 時裝店同至出名品牌。沿住曲折巷仔一路行，Diptyque 同 C.O.Bigelow 等熱門名牌旋即映入眼簾，滿足晒你對家居裝修嘅各種需求。而 Madame Matovu 係區內嘅隱世奇珍之一，佢賣嘅嘢雖然都幾貴，但店內商品係社會幾咁進步都買唔返架，絕對物超所值！想搵返啲潮牌睇吓嘅話，不妨去埋 Maison Margiela 同 Urban Zen (Donna Karan 喺 2015 年創立嘅新品牌) 吖。

威廉斯堡 (Williamsburg) 位於至 In 至潮嘅布魯克林 (Brooklyn)，但竟然主打典雅瑰麗嘅古董同舊物，係咪估佢唔到呢？由布魯克林大橋 (Brooklyn Bridge) 行去探索呢個社區，絕對值得，皆因呢度唔單止係正到爆嘅 Shopping 同吃喝玩樂熱點，仲有幾間即將開幕嘅美術館添！對於古董發燒友嚟講，威廉斯堡係「伊甸園」嘅代名詞，舉凡店舖以至市集，統統都係尋寶勝地。記得去行吓人氣超旺嘅古董店 Beacon’s Closet、深受推崇嘅 Artist & Fleas 跳蚤市場，同埋梗係唔少得布魯克林跳蚤市場 (Brooklyn Flea Market) 啦！威廉斯堡周圍有各式各樣嘅出色酒店，實有間啱你心水。

柏坡 (Park Slope) 係布魯克林 (Brooklyn) 鮮為人知嘅潮區，低調得嚟有齊最新最 In 嘅潮流靚衫。講起第五大道 (Fifth Avenue)，你可能會不其然諗起 Tiffany and Co. 嘅店面；而柏坡就係雲集各大獨立時裝店嘅「第五大道 2.0」，喺度 Shopping 嘅體驗堪比喺古老啡色寶箱尋寶，區內嘅靚景亦都值得「打卡」留念。不妨去行吓 Bird 吖，呢間舖頭拍得上有如神話嘅 Beacon’s Closet 同 Diana Kane 架！