情侶必試紐約 10 大活動

切爾西市場 (Chelsea Market) 充滿隱世驚奇寶藏，無論去過幾多次都依然會覺得新奇。呢個場位處都會觀光勝地，喺正哈德遜河 (Hudson River) 附近嘅廢棄餅乾工廠入面，係紐約經典嘅打卡好地方。想揀啲別樹一幟嘅手信？呢度有好多古董古玩，新奇獨特，實有啲啱你心水！

身處呢個購物﹑餐飲同觀光殿堂，行足一個下晝都唔會悶；每逢週末，呢度仲有現場音樂表演添！去市場途中，記得留返個肚喎，因為場內美食攤販供應嘅地道小食多不勝數，實會令你流哂口水。

高架公園 (High Line) 係條高架行人路，貫穿曼克頓好多個熱鬧街區，曾經係西側線 (West Side Line) 嘅火車軌道，但喺 2009 年已經改劃為其他用途。呢個公園既成為紐約「中產階級化」嘅知名例子，亦都係綠樹成蔭嘅散步好去處，可以俾你一眼睇盡周圍嘅紐約都會風光。高架公園南端以華盛頓街 (Washington Street) 為起點，一路延伸至北端嘅第 34 街同第 12 大道，全長 2.33 公里。

公園沿線有 11 個唔同嘅上落點，其中 5 個都適合輪椅使用。切爾西市場 (Chelsea Market) 大約喺半路位置，啱哂歇腳。如果唔係，坐喺長凳一齊欣賞靚景都唔錯！

係時候逛下紐約最出名、最人聲沸騰嘅地標：洛克菲勒中心 (Rockefeller Center) 啦！呢棟裝飾藝術風格傑作除咗有購物中心同幾間高檔餐廳之外，就連《週六夜現場》(Saturday Night Live) 拍攝場地 NBC Studios，同埋無線電城音樂廳 (Radio City Music Hall) 都喺呢度。最受歡迎嘅地方莫過於 260 米高嘅石頭之巔 (Top of the Rock) 觀景台，可以俯瞰曼克頓中城嘅壯麗景色。洛克斐勒中心係就係冇帝國大廈咁高，但鍾意嚟呢度睇靚景嘅旅客仲多。

洛克斐勒中心喺聖誕新年期間特別受歡迎。呢度會有溜冰場，有巨型聖誕樹，仲會掛滿裝飾品，肯定可以俾到你難忘嘅回憶。

蘇豪區係曼克頓嘅時尚之都，英文簡稱 SoHo，全名其實係「South of Houston Street (休斯頓街以南)」，區內雲集世界各地嘅中高檔時裝品牌，選擇豐富，夠你盡情血拼！想搵啲至平至抵嘅實用牌子，不妨去位於太子街 (Prince Street) 地鐵站正南邊嘅百老匯 (Broadway) 行返轉；而西邊嘅格林街 (Greene Street) 就有 Chanel、Paul Smith 同埋 Louis Vuitton 呢類高檔時裝店進駐。

除咗知名品牌之外，你都可以喺度發掘吓各間小店嘅，佢哋售賣嘅貨色由二手書、新奇文具，以至時裝珠寶都一應俱全。蘇豪區連接住小意大利 (Little Italy)。行到肚餓？係時候去附近嘅布魯姆街 (Broome Street)，任揀一間 Pizza 店，食件 Pizza 叉叉電！

如果想暫時逃離人多車多嘅紐約，你可以去古樸嘅沿海地區布魯克林入面嘅康尼島 (Coney Island)。康尼島有全長 4.8 公里嘅海灘，仲有經典遊樂設施、椰子擊球遊戲，同埋大量糖果小食等你試，好似時光停留喺以前咁，懷舊氣氛十足。想享受二人世界？康尼島有搞笑滑稽嘅馬戲節目上演，為你營造歡樂氣氛。

科尼島 (Coney Island) 嘅一大亮點就係月神公園，呢個主題公園有超過 50 個刺激嘅遊樂設施同埋好多嘉年華遊戲。其中一啲最受歡迎嘅遊樂設施包括經典嘅旋轉木馬、Coney Clipper 海盜船同埋 Coney Island Cyclone 雲霄飛車，絕對不容錯過。記得要試下 Feltman 嘅熱狗，佢哋公認係紐約最好味嘅熱狗之一。

自由女神像屹立喺紐約港嘅自由島上，呢座宏偉嘅新古典主義雕像係美國最有代表性嘅象徵之一，見證住自由同希望。好少有旅程可以比得上哈德遜河日落船河，絕對令人難忘。沿途會見到好多著名景點，無論望向邊度都咁精彩，包括巴特里公園 (Battery Park)、愛利斯島 (Ellis Island)，仲有壯觀嘅自由神像！

大多數遊船之旅都會由切爾西碼頭 (Chelsea Piers) 出發，有唔同類型嘅船俾你揀。如果想更加浪漫，可以揀搭細帆船，靜靜咁欣賞紐約美景，舒適又悠閒。

百老匯就係現場歌舞劇嘅代名詞。百老匯有超過 40 間劇院，仲有好多規模較細、獨立經營嘅劇院分佈喺曼哈頓主道路旁邊嘅街巷中，令成個區域充滿戲劇藝術氣息。由經典劇目到最新嘅華麗舞台表演，呢度通通都搵到。

如果你想搵平啲嘅門票，可以去 Duffy Square 嘅 TKTS 折扣售票亭睇下。佢哋賣嘅飛最平半價，但只有當日嘅飛，所以你揀咩睇要即興啲。

曼哈頓嘅天台酒吧係欣賞世界上最出名城市天際線美景嘅最好地點。你可以一邊享受紐約嘅景色同聲音，一邊飲雞尾酒。

紐約市嘅高質天台酒吧分佈喺唔同嘅地方，不過當地人最鍾意嘅就係 230 Fifth，呢度唔單止經過獨特設計，仲有一流嘅靚景。呢間位於第五大道嘅酒吧，可以欣賞到壯觀嘅帝國大廈景色，喺凍啲嘅月份，仲會有透明嘅「冰屋」，等你唔使凍住咁享受美景。紐約其他出名嘅天台酒吧包括 Panorama Room、Spyglass 同 Magic Hour Rooftop Bar & Lounge。

曼哈頓下東區嘅酒吧環境，時尚又獨特。呢度嘅人好時尚，酒吧設計都有好特別嘅概念。喺曼哈頓下東區同另一半去唔同嘅酒吧玩，雖然好多地方都人山人海，但你應該好容易搵到啱兩個人嘅地方。

The Flower Shop 係一間餐廳，地庫有間 70 年代主題嘅酒吧，仲有壁爐同一啲充滿歷史，風格不一嘅傢俬，充滿獨特嘅魅力。其他值得一試嘅酒吧包括型格嘅雞尾酒吧 Attaboy，同埋深受歡迎嘅現場音樂表演場地 Rockwood Music Hall。