紐約 9 大最佳食品市場 (同美食)

切爾西市場 (Chelsea Market) 坐落於經過改建嘅工廠入面，而呢間工廠前身仲係第一個製作 Oreo 餅乾嘅地方添！時至今日，市集裡面有一排一排攤檔，賣街頭美食同手工產品，由芝士、新鮮龍蝦再到即製意粉，統統應有盡有。呢度最常見嘅「街景」，就係當地白領一邊飲咖啡，隔籬嘅遊客一邊食 Taco 墨西哥捲餅，相映成趣。其中，Los Tacos No. 1 隱世又唔起眼，但係就有全城數一數二嘅 Taco，店外人龍長到唔見尾，不過好彩條隊都郁得夠快。

甘斯沃爾特市場 (Gansevoort Market) 距離切爾西市場 (Chelsea Market) 短短 5 分鐘路程，可以一次過行哂兩邊喎！呢個市場其實都幾似「樸實工業風美食廣場」，食物選擇多不勝數，由韓式雞翼、經典美式漢堡到巨型曲奇餅，都一應俱全，只係空間比較細啫。市集前身曾經係夜店，天花板有天窗之外，仲用咗纏繞嘅樹枝同鮮花裝飾，都幾有特色架；而休息區自然採光，啲座位仲多過切爾西市場添！如果你想暫時將「減肥大計」拋諸腦後，不妨試吓 Burger, Inc. NYC 嘅骨髓漢堡，又或者 Mission Ceviche 嘅秘魯燉雞吖。

范德比爾特城市空間酒店 (Urbanspace Vanderbilt) 係遊覽紐約中城 (Midtown New York) 嘅理想落腳點，你想食嘅嘢喺呢度都應有盡有，另加無數店家提供素食﹑純素同健康食品。自問唔係「養生達人」，場內美食廣場仲有 Taco Bar﹑雞尾酒吧﹑壽司店﹑漢堡店…想食乜都得啦！環境方面，美食廣場飾有偌大玻璃窗，配搭昏暗金色燈光，休閒得嚟有活力，旋即令成個空間變得非常誘人。係時候開餐喇—香港車仔檔 (Hong Kong Street Cart) 嘅蜜糖是拉差雞翼值得一試，就算食到兩隻手都污糟哂，依然在所不辭 (笑~)！而列剋星敦大道 (Lexington Avenue) 同時裝區 (Garment District) 仲有城市空間酒店旗下嘅分店。

斯莫加斯堡 (Smorgasburg) 係美國最大型嘅每週露天食品市場，美食選擇多到數唔晒，仲算得上係紐約 Fusion 菜嘅發源地添！喺呢度食 Lunch，絕對係身處紐約最獨特嘅尋味體驗啦！不妨同朋友一齊嚟，叫多幾樣菜式一齊 share 吖！如果咁啱夏天或者春天嚟到，最好帶定把遮同太陽油，因為呢度冇乜地方遮陰架。

場內嘅菜式數之不盡，等你逐一品嚐，其中一道就係鼎鼎大名嘅拉麵漢堡。斯莫加斯堡市集逢星期六 11:00 至 18:00 喺東河州立公園 (East River State Park) 開業，而星期日就會轉戰前景公園 (Prospect Park)，可以飽覽曼哈頓島 (Manhattan Island) 嘅都會美景。出發之前，記得帶定現金，同埋留肚擦餐勁喎！

迪卡爾布市集廣場 (DeKalb Market Hall) 以霓虹燈照亮每個角落，引領你去到各個小食攤，大擦令人垂涎嘅好東西！呢個美食迷宮設於狹窄嘅大廳入面，人山人海，多少會令人聯想到亞洲嘈雜繁囂嘅食品市場；而場內 40 個攤販各有招牌菜，同時亦都反映咗呢區豐富嘅文化同種族多樣性。不妨試吓 Fletcher's 嘅牛腩三文治吖，佢嘅做法簡單，只係將煙熏牛腩切成薄片，配埋燒烤醬同鹹菜一齊食，但都夠哂惹味，正到暈！

運河街市場 (Canal Street Market) 以前係跳蚤市場，後來重新設計成至 In 至潮嘅現代食品市集，坐落喺唐人街同運河街 (Canal Street) 嘅熱鬧街區，吸引唔少美食攤販同店舖進駐，以所售貨色分區，有賣各式各樣嘅美食同手作產品。其中，場內嘅亞洲風味食品特別受歡迎，人氣之選包括一風堂黑帶 (Ippudo Kuro-Obi) 濃郁惹味嘅拉麵。

你可以喺市場入面搵張枱凳坐低，又或者去後面靜啲嘅零售區大嘆美食。而成個場都配備通風空間同天窗，以自然採光照耀住 Alexandra Proba 抽象粉紅色壁畫前面嘅休息區，氣氛溫馨。

哥譚西市場 (Gotham West Market) 裡面有好多間人氣美食攤販進駐，難怪吸引大批遊客同當地人幫襯！與此同時，呢個市場鄰近切爾西碼頭 (Chelsea Pier) 同時代廣場 (Times Square)，亦係飽覽都會風景嘅好去處。觀光完，肚仔餓？想食亞洲菜的話，不妨試吓 Ivan Ramen Slurp 嘅大蒜撈麵配雞蛋同辣椒油；想入鄉隨俗，擦返餐美國地道菜都唔錯架！

就算你唔係拉丁美洲人，都可以大嘆 Red Hook Food Vendors 出品嘅拉丁美食嘅！呢個市集嘅拉丁美洲食品公認全城最好味，攤販對於烹飪都有一份執著，會喺你面前準備美食，氣氛就好似喺露天 mercado 市集一樣。雖然由曼哈頓 (Manhattan) 過嚟有少少跋涉，但場內食物地道正宗，令人大飽口福，你又點可以唔試？其中，Country Boys 美食車成日大排長龍，佢嘅「huarache (拖鞋餅)」絕對不容錯過！溫馨提示：攤販只會喺星期六同星期日營業。

聯合廣場綠色市集 (Union Square Greenmarket) 所賣嘅當地食品種類繁多，葡萄酒﹑芝士同其他主食都深受當地人喜愛，皆因攤販會採購全城至靚嘅有機產品，難怪好多人個個星期都專誠嚟呢度買生果蔬菜啦！呢個市場由非營利機構 GrowNYC 喺 1978 年建立，旨在振興區內農業，同時將最新鮮嘅農產品回饋社區，就連知名大廚都成日嚟幫襯架，

不妨買啲嘢食，跟住去公園野餐睇靚景吖！到咗秋天，場內由美國北部入口嘅蘋果特別甜，又點可以唔買返幾個嚟試吓？市集逢星期日﹑星期二同星期四休息。