紐約 10 項免費必試活動

911 國家紀念博物館 (National September 11 Memorial) 位於曼克頓下城 (Lower Manhattan) 金融區 (Financial District) 世貿中心 (World Trade Center) 裡面，係為咗紀念喺 2001 年 9 月 11 日恐怖襲擊之中遇難嘅死者而興建嘅，最大特色莫過於兩座寓意「反思」嘅水池，象徵住雙子塔樓嘅遺址。除此之外，池邊嘅銅製邊緣都刻有意外身故者嘅姓名，惹人追憶。紀念館入面有兩大展覽廳，其中一個展示 911 事件嘅過去、現況同影響；而另一個就安裝咗 270° 全景多媒體裝置。

中央公園 (Central Park) 位於曼克頓 (Manhattan) 市中心，擁有一大片綠色草地，同超過 20 個遊樂場、人工湖同埋池塘相映成趣，仲有好多條寬闊嘅步行徑添！公園全年免費對外開放，可以俾你喺度玩盡各式各樣嘅親子活動，同屋企人樂聚天倫。其中，最受歡迎嘅親子遊樂設施包括旋轉木馬、中央公園動物園 (Central Park Zoo)、中央公園溫室花園 (Central Park Conservatory Garden)、戴拉寇特劇院 (Delacorte Theater) 同埋眺望台城堡 (Belvedere Castle)；而中央公園管理委員會 (Central Park Conservancy) 仲有為家庭旅客開辦免費導賞團，帶你認識中央公園嘅北森林 (North Woods)，行程全長 90 分鐘，免費派發《探險專刊 (Discovery Journal)》、兒童專用雙筒望遠鏡、場地指南同埋放大鏡，方便大家沿途發掘新事物。

紐約中央車站 (Grand Central Terminal Station) 係市內最繁華嘅地標之一，每日都有成千上萬紐約市民喺度返工放工，穿梭車路。呢個車站位於中城 (Midtown)，站外主打布雜藝術 (Beaux-Arts) 雕塑同建築，而站內就有成 44 個火車月台，仲有好多間餐廳添！主要車站大堂每日人來人往，但都有好多值得欣賞嘅特色，包括四面鐘、星空穹頂壁畫同埋美食市集，就算你唔打算搭火車，要行勻哂紐約中央車站入面嘅「隱世角落」，都夠你打發大半日時間喇。

紐約嘅博物館數之不盡，各具特色，部分仲有開設免費入場時段，一般訂喺星期五同星期六黃昏。其中，現代藝術博物館 (Museum of Modem Art；MoMA) 同動態影像博物館 (Museum of the Moving Image) 等星級場館都會喺星期五 16:00 至 20:00 免費開放；而布朗克斯藝術博物館 (Bronx Museum of the Arts)、美國民俗藝術博物館 (American Folk Art Museum) 同埋 FIT 時尚博物館 (Fashion Institute of Technology) 等等展館仲係全年免收入場費添！

布魯克林植物園 (Brooklyn Botanic Garden) 位於展望公園 (Prospect Park) 東北邊，佔地面積超過 20 萬平方米，擁有超過 10 個溫室花園、園景花園、步行徑同池塘，每個位都係打卡勝地！植物園成人票價係 USD15，12 歲以上小童票價係 USD8，而你亦可以喺星期五 12:00 前免費入場；如果咁啱冬天遊覽紐約，布魯克林植物園逢星期二至五仲全日免費開放添！

漢彌敦格蘭奇國家紀念公園 (Hamilton Grange National Memorial) 前身係美國國父漢彌敦 (Alexander Hamilton) 嘅故居，位於聖尼古拉斯公園 (St. Nicholas Park) 北端，遊客可以免費參觀紀念園嘅各個部分，仲有機會一睹 19 世紀嘅傢俬同裝飾品實物添！紀念公園分別喺 10:00、11:00、14:00 同 16:00 提供導賞團服務，園內嘅遊客中心有個常設畫廊，仲有書店同 25 座影院，俾遊客透過短片了解漢彌敦嘅生平。

紐約公共圖書館 (New York Public Library) 喺紐約有超過 90 間分館；不過，要數最受歡迎嗰間，都係首推位於蘇世民大樓 (Stephen A. Schwarzman Building) 嘅分館。呢間圖書館採用布雜藝術 (Beaux-Arts) 建築風格設計，珍藏咗好多稀有書籍，仲會舉辦講座同工作坊，俾唔同年齡層嘅人士參加。其中，兒童中心嘅「小熊維尼」展覽人氣最旺，你可以喺嗰度搵到啟發作者 Alan Alexander Milne 創造呢位卡通人物嘅原型毛公仔。如果你想了解呢座圖書館大樓嘅歷史，仲可以參加埋星期一至日 11:00 至 14:00 舉辦嘅免費導賞團添！

紐約布魯克林啤酒廠 (Brooklyn Brewery) 會帶俾遊客一個認識釀酒過程嘅好機會！呢間小型釀酒廠位於威廉斯堡 (Williamsburg)，每逢週末都會開辦免費導賞團，30 分鐘一場；而如果你唔介意使少少錢消費，仲可以去到品酒室試吓呢度最出名嘅拉格啤酒 (lager) 同愛爾啤酒 (ale) 添，每杯費用只需大概 USD6 咋！

紐約切爾西 (Chelsea) 社區嘅美術館成日邀請世界各地嘅藝術家主持開幕儀式，仲歡迎遊客免費參加添！由第十大道 (10th Avenue) 至第十一大道 (11th Avenue) 嘅 14 街西 (W. 14th Street) 至 29 街西 (W. 29th Street)，沿途有百幾間星期四免費開放嘅美術館，包括卓納畫廊 (David Zwirner)、Anton Kern Gallery 同佩斯畫廊 (Pace Gallery)。最令人興奮嘅係—如果你喺黃昏之後過嚟參觀，館方有飲品 (一般係紅酒同啤酒) 同小食供應，俾遊客任食架！

唐人街係繁華嘅社區，由布魯姆街 (Broome Street) 以南一路延伸到曼克頓下城 (Lower Manhattan) 拉斐特街 (Lafayette) 以東，區內人來人往，嚟到走一轉，就會有種穿梭世界唔同大洲嘅感覺，皆因呢度雲集咗東南亞、中式同港式等世界各地美食餐廳。如果你鍾意搜羅各種各樣嘅「戰利品」，店面小巧嘅 Mmuseumm 擺放住嚟自全球嘅新奇有趣商品，包括雜牌美容產品、自拍神棍，同埋各國移民帶過嚟嘅玩具。