紐約 11 大最好玩嘅活動

中央公園 (Central Park) 擁有全紐約市最大片嘅綠色原野，入面有超過 20 個遊樂場、人工湖同埋池塘，仲有好多條寬闊嘅步行徑；園內成日舉辦各式各樣嘅活動、展覽同音樂會，春、夏兩季就更加熱鬧。中央公園嘅合家歡節目數之不盡，小朋友實會鍾意呢度嘅旋轉木馬、中央公園動物園 (Central Park Zoo)、中央公園溫室花園 (Central Park Conservatory Garden) 同埋眺望台城堡 (Belvedere Castle) 等景點！而且，中央公園全年免費對外開放，有提供導賞團服務，收費都只不過係幾蚊美金咋！

911 國家紀念博物館 (National September 11 Memorial) 係為咗紀念 2001 年 9 月 11 日恐怖襲擊之中遇難嘅死者而興建嘅，館內最大特色莫過於兩座寓意「反思」嘅水池，象徵住雙子塔樓遺址。除此之外，池邊嘅銅製邊緣都刻有意外身故者嘅姓名，惹人追憶。紀念館入面有兩大展覽廳，其中一個展示 911 事件嘅過去、現況同影響；而另一個就安裝咗 270° 全景多媒體裝置。

香港人可能只會當 Pizza 係「偶一為之」嘅 Party Food；但對紐約人嚟講，Pizza 幾乎等於正餐！好多 Pizza 舖都為咗爭奪「紐約 No.1 Pizza」嘅名銜而努力不懈。要數當地人至 Like 嘅 Pizza 店，又點可以唔提始創於 1975 年嘅 Pizza 專家 Joe’s Pizza 呢？除咗位於卡邁爾街 (Carmine Street) 嘅總店之外，紐約大街小巷都開咗好多間 Joe’s Pizza 分店，遍佈威廉斯堡 (Williamsburg)、東村 (East Village) 同中城 (Midtown)。只需要 USD1，你就可以買到一件熱辣辣嘅 Pizza，上面鋪滿蕃茄醬、芝士同意大利辣肉腸，係咪好吸引呢~？

啱啱喺紐約到埗，遊客第一眼留意到嘅地方通常就係自由神像 (Statue of Liberty)。呢座女神像象徵住美國追求民主自由嘅精神，喺 1886 年建成，可以全方位放眼紐約、新澤西州、紐約港 (New York Harbor) 同附近嘅埃利斯島 (Ellis Island) 靚景。自由神像基座二樓設有展覽廳，遊客可以喺度透過各種實物比例複製品、舊相、文字同影片資料，認識呢座女神像嘅歷史。如果你想去埋自由島 (Liberty Island)，買張船飛就可以搭遊輪過去，旅途上仲有自助語音導賞服務添！不過，想爬上去自由女神冠位嘅話，就要額外俾錢，同埋記得預先 Book 定喇，因為呢樣幾乎係去紐約玩嘅指定動作，一票難求架！

紐約中央車站 (Grand Central Terminal Station) 係市內最繁華嘅地標之一，每日都有成千上萬紐約市民喺度返工放工，穿梭車路。呢個車站位於中城 (Midtown)，站外主打布雜藝術 (Beaux-Arts) 雕塑同建築，而站內就有成 44 個火車月台，仲有好多間餐廳添！主要車站大堂每日人來人往，但都有好多值得欣賞嘅特色，包括四面鐘、星空穹頂壁畫同埋美食市集，就算你唔打算搭火車，要行勻哂紐約中央車站入面嘅「隱世角落」，都夠你打發大半日時間喇。

唐人街係繁華嘅社區，由布魯姆街 (Broome Street) 以南一路延伸到曼克頓下城 (Lower Manhattan) 拉斐特街 (Lafayette) 以東，嚟到紐約，其中一樣「指定動作」就係去繁華熱鬧嘅唐人街行返轉，呢度雲集咗東南亞、中式同港式等世界各地美食餐廳，話唔定會令你有種穿梭世界唔同大洲嘅感覺！如果你鍾意搜羅各種各樣嘅「戰利品」，店面小巧嘅 Mmuseumm 擺放住嚟自全球嘅新奇有趣商品，包括雜牌美容產品、自拍神棍，同埋各國移民帶過嚟嘅玩具。

紐約曼哈頓 (Manhattan) 嘅第五大道 (Fifth Avenue) 稱得上係潮爆購物街；而博道夫古德曼百貨公司 (Bergdorf Goodman) 就喺 1928 年開幕，櫥窗擺設極盡奢華，賣嘅貨色統統嚟自 Burberry、Balenciaga 同 Marc Jacob 等國際名牌，所以由當年開業至今都吸引名流紳士去幫襯。行過第 39 街至第 60 街，你仲會見到 Louis Vuitton、Henri Bendel、Armani 同 Dolce & Gabbana 嘅旗艦店，實買到手軟！

布魯克林大橋 (Brooklyn Bridge) 橫跨東河 (East River)，連接曼哈頓 (Manhattan) 同布魯克林 (Brooklyn) 兩區，橋面行人路分為兩線，一條俾單車通過，而另外嗰條行人專用路出名「人多擠逼」，好多遊客都鍾意喺度搵個靚位，企定定影相「打卡」，將東河、曼哈頓下城區 (Lower Manhattan)、加弗納斯島 (Governors Island) 同自由神像 (Statue of Liberty) 當做「呃 Like」背景 (笑~)。漫步呢條全長超過 1.6 公里嘅路徑，你會發現大橋兩邊有大把旅遊名勝，包括布魯克林兒童博物館 (Brooklyn Children's Museum)、布魯克林大橋公園 (Brooklyn Bridge Park)，仲有各式運動場、遊樂場、單車舖、餐廳同碼頭添！

嚟到紐約，好多人都鍾意去曼哈頓中城 (Midtown Manhattan) 嘅時代廣場 (Times Square) 遊覽，睇吓精彩嘅街頭表演，去吓數之不盡嘅博物館同美術館參觀，再欣賞埋攞獎攞到手軟嘅百老匯 (Broadway) 表演。另一方面，呢個露天廣場仲係「只此一家」嘅杜莎夫人蠟像館 (Madame Tussauds Wax Museum) 同信不信由你博物館 (Ripley’s Believe It or Not) 所在地，難怪成為咗紐約嘅必到朝聖熱點啦！如果你喺 12 月底嚟玩，仲可以參加埋星光熠熠嘅音樂會，同埋經典馳名嘅 Ball Drop 除夕 Party 添。

帝國大廈 (Empire State Building) 有兩個觀景台，而無論你去邊一個，都可以將成個紐約同周邊地區嘅景色放入眼內。帝國大廈 86 樓嘅露天觀景台係唔少電影同電視劇嘅取景勝地；上到 102 樓嘅另一個觀景台，就可以一眼望晒自由神像 (Statue of Liberty)、中央公園 (Central Park)、布魯克林大橋 (Brooklyn Bridge) 同時代廣場 (Times Square) 架喇！除咗觀景台，帝國大廈入面仲有遊客中心同兩個展館，行極都唔會悶。

哈林區 (Harlem) 係紐約音樂發燒友嘅聚腳點，別樹一幟嘅活動數之不盡，成個地區活力滿載，開咗好多 Jazz Club，仲有一間爵士樂博物館，搖擺樂、拉丁爵士樂、咆勃 (Bebop) 爵士樂同冷爵士樂嘅氣氛濃厚到暈！想一齊 Jam 歌，歡迎去 Bill’s Place、Minton’s Playhouse 同 Showman’s Jazz Club 等等嘅爵士樂熱點一遊；想知多啲爵士樂歷史嘅話，就一定要去埋國家爵士樂博物館 (National Jazz Museum) 參觀喇！呢間博物館免費開放，仲成日舉辦大熱展覽、影展、音訊電影分享會，每星期梗係唔少得講座同音樂會啦。