紐約 9 大家庭休閒活動

中央公園 (Central Park) 擁有全紐約市最大片嘅綠色原野，入面有超過 20 個遊樂場、人工湖同埋池塘，仲有好多條寬闊嘅步行徑；園內成日舉辦各式各樣嘅活動、展覽同音樂會，春、夏兩季就更加熱鬧。中央公園嘅親子節目一向都好出名，園內亦都有旋轉木馬、中央公園動物園 (Central Park Zoo)、中央公園溫室花園 (Central Park Conservatory Garden) 同埋眺望台城堡 (Belvedere Castle) 等景點，啱哂一家大細玩。中央公園全年免費對外開放，有提供導賞團服務，收費都只不過係幾蚊美金咋！

紐約公共圖書館 (New York Public Library) 喺紐約有超過 90 間分館；不過，要數最受歡迎嗰間，都係首推位於蘇世民大樓 (Stephen A. Schwarzman Building) 嘅分館。呢間圖書館採用布雜藝術 (Beaux-Arts) 建築風格設計，珍藏咗好多稀有書籍，仲會舉辦講座同工作坊，俾唔同年齡層嘅人士參加。其中，兒童中心嘅「小熊維尼」展覽人氣最旺，你可以喺嗰度搵到啟發作者 Christopher Robin Milne 創造呢位卡通人物嘅原型毛公仔。如果你想了解呢座圖書館大樓嘅歷史，仲可以參加埋星期一至日 11:00 至 14:00 舉辦嘅免費導賞團添！

布魯克林植物園 (Brooklyn Botanic Garden) 位於展望公園 (Prospect Park) 東北邊，佔地面積超過 20 萬平方米，擁有好多個溫室花園、園景花園、步行徑同池塘，每個位都係打卡勝地！植物園成人票價係 USD15，12 歲以上小童票價係 USD8，而你亦可以喺星期五 12:00 前免費入場；如果咁啱冬天遊覽紐約，布魯克林植物園逢星期二至五仲全日免費開放添！

新阿姆斯特丹劇院 (New Amsterdam Theatre) 喺 1903 年開幕，係百老匯 (Broadway) 歷史最悠久嘅娛樂場所，內部裝潢嘅最大特色就係描繪莎士比亞戲劇場景嘅大理石牆身雕塑，除咗重現《尼伯龍根的指環 (Wagner’s Ring)》嘅經典一幕，仲有《安徒生童話 (Hans Christian Andersen)》同埋《伊索寓言 (Aesop’s Fables)》入面嘅角色，喺你眼前出現添！新阿姆斯特丹劇院只會上演迪士尼音樂劇作，例如《阿拉丁 (Aladdin)》、《獅子王 (The Lion King)》、《歡樂滿人間 (Mary Poppins)》同《魔雪奇緣 (Frozen)》等作品。如果你嚟呢度唔係為咗睇 Show，都仲可以參加導賞團，了解呢座古老建築嘅有趣歷史 (仲有鬼故聽架~)，收費都只不過係幾蚊美金啫。

兒童藝術博物館 (Children’s Museum of the Arts) 喺 1930 年興建，館藏超過 2,000 份油畫、雕塑同裝飾藝術品，全部創作都係出自小朋友嘅手筆！呢間博物館另一個賣點，就係周不時會舉辦非牟利課程同工作坊，俾一家大細參加。其中，媒體實驗室 (Media Lab) 歡迎 7 至 12 歲嘅小朋友試吓親手製作定格動畫，仲有機會體驗配音同製片添！駐館藝術家會喺平日 10:45 至 12:00 主持指導班，教小朋友畫油畫、整黏土雕塑、講故仔同打鼓等技能，內容豐富。

相比傳統旋轉木馬，砲台公園 (Battery Park) 配置咗用海洋做主題嘅海玻璃旋轉木馬 (SeaGlass Carousel)，帶俾遊客無重「騎馬」體驗，而 LED 燈投射出嚟嘅色彩仲會令你感覺置身海底世界咁添！每人每次騎乘，只需要 USD5。安全起見，身高唔夠 106cm 嘅細路仔一定要有大人陪同，先可以玩旋轉木馬。

啱啱喺紐約到埗，遊客第一眼留意到嘅地方通常就係自由神像 (Statue of Liberty)。呢座女神像象徵住美國追求民主自由嘅精神，喺 1886 年建成，可以全方位放眼紐約、新澤西州、紐約港 (New York Harbor) 同附近嘅埃利斯島 (Ellis Island) 靚景。自由神像基座二樓設有展覽廳，遊客可以喺度透過各種實物比例複製品、舊相、文字同影片資料，認識呢座女神像嘅歷史。如果你想去埋自由島 (Liberty Island)，買張船飛就可以搭遊輪過去，旅途上仲有自助語音導賞服務添！不過，想爬上去自由女神冠位嘅話，就要額外俾錢，同埋記得預先 Book 定喇。

美國自然史博物館 (American Museum of Natural History) 設有超過 45 個常設展覽，史前時期嘅文物同化石數以百萬計，館內仲珍藏咗全球最大型嘅恐龍骸骨模型，包括 122 尺長嘅泰坦巨龍，絕對係一大特色！嚟到博物館，另一個必去景點有海登天文館 (Hayden Planetarium)，裡面關於銀河、星空、各大星球嘅展覽同影片資料都令人印象深刻。美國自然史博物館有舉辦專為小朋友而設嘅益智工作坊同活動；其中，化石展廳嘅尋寶遊戲好玩又刺激，好值得參加架！

杜莎夫人蠟像館 (Madame Tussauds Wax Museum) 展出咗超過 200 尊「幾可亂真」嘅國際巨星蠟像，仲分開音樂、電影、體育、皇室同荷里活等等好多個主題展區，別出心裁。其中，最刺激嘅展覽莫過於「捉鬼敢死隊」VR 體驗 (The Ghostbusters Experience)：喺活動過程中，你要去唔同嘅房間探險，而房內會投射出鬼怪魅影，實行嚇到你彈起！博物館門票價格大約係每人 USD34；如果經由杜莎夫人蠟像館官方網站訂飛，仲有折扣優惠添。