努沙杜瓦 15 大最佳玩樂活動
努沙杜瓦乜嘢最出名？
要數努沙杜瓦 (Nusa Dua) 最出名嘅活動，當然唔少得去平靜清澈嘅 Pantai Mengiat 海灘同格格海灘 (Geger Beach) 玩水啦！你可以喺海灘上游水、浮潛，甚至滑浪都得 ，活動各適其適，實有一款啱玩。努沙杜瓦五星級度假村同酒店林立，呢度嘅海灘更加係峇里最隱世嘅景點之一。
除咗海灘，區內仲設有幾間畫廊，展示嚟自亞洲同太平洋群島嘅珍貴藝術品，好值得觀賞架！努沙杜瓦四處都有寺廟，每個月嘅特定日子舉辦獨特儀式同慶祝活動，繽紛多彩。無論你係沙灘友定藝術達人，都可以睇睇我哋嘅努沙杜瓦指南，Plan 下行程。
1. 峇里努沙杜瓦劇場《天譚舞蹈》表演
推介： 晚間娛樂
努沙杜瓦劇場 (Bali Nusa Dua Theatre) 嘅《天譚舞蹈 (Devdan Show)》表演長 90 分鐘，可以俾你欣賞到印尼唔同島嶼嘅舞蹈。成場 Show 由一對細路仔女講解同主演，故事講述佢咃喺神奇寶盒裡面發現代表各個島嶼同文化嘅物件。舞技精湛嘅 Dancer 跳出精彩舞步，雜技演員就無間斷上演雜技演出，展示印尼峇里 (Bali)、蘇門答臘島 (Sumatera)、爪哇島 (Java)、婆羅洲 (Borneo) 同巴布亞 (Papua) 嘅多元文化。道具設計旨在為觀眾帶嚟視覺上嘅震撼，仲結合咗最先進嘅燈光音響系統、旋轉舞台、煙火同人造雨等等元素添！
位置： Komplek ITDC Nusa Dua, Benoa, Kuta Selatan, Badung, Bali 80363, Indonesia
開放時間： 星期一、星期三、星期五至星期六 19:30 至 21:00。
電話： +63 (0)361 770 197
峇里努沙杜瓦劇場《天譚舞蹈》表演
2. 潘達瓦海灘
推介： 伴侶, 家庭, 拍照
潘達瓦海灘 (Pandawa Beach) 全長 1 公里，隱身喺石灰岩懸崖後面，距離努沙杜瓦 (Nusa Dua) 中心區域西南大約 8 公里，絕對係暫離煩囂嘅好地方！身處海灘，你可以欣賞一覽無遺嘅海景同巨型石灰岩懸崖；而石拱上面飾有大型雕像，每一尊分別刻有摩訶婆羅多 (Mahabharata) 史詩嘅「般度五子 (Five Pandawas)」。雖然潘達瓦海灘位置相當隱蔽，但係餐廳同水上運動裝備租用店統統齊備，設施完善。
位置： 印尼峇里潘達瓦海灘
潘達瓦海灘
3. 努沙杜瓦 Water Blow 觀浪點
推介： 拍照
努沙杜瓦 (Nusa Dua) Water Blow 設有瞭望台，可以俾你望住印度洋嘅大浪不斷撞擊鋸齒狀嘅石灰岩邊，絕對係「打卡」勝地，你甚至有機會捕捉大浪捲起到 30 米嘅畫面添！不過，影相嗰陣記住小心，唔好俾浪花整濕攝影器材喎。身處 Water Blow，你幾乎一定會濕身，帶定套衫嚟換就啱架喇 (笑)！
位置： Benoa, South Kuta, Badung, Bali 80363, Indonesia
努沙杜瓦 Water Blow 觀浪點
4. 蒙吉特海灘 (努沙杜瓦海灘)
推介： 家庭, 拍照
努沙杜瓦海灘 (Nusa Dua Beach) 又稱為蒙吉特海灘 (Pantai Mengiat)，擁有幼滑白沙同平靜海面，而且大部分時間遊客都唔多，仲有一道 500 米長嘅珊瑚礁，可以充當屏障，保護岸邊免受印度洋嘅洶湧波濤衝擊。一場嚟到峇里，梗係要去島上嘅 Water Blow 觀浪點行下，喺岩石峭壁上近距離感受海浪嘅威力啦！蒙吉特海灘正正就係峇里幾條人氣豪華度假村嘅所在地，
村內設有鋪砌平整嘅小徑，直通海灘，所以成日都有人喺度慢跑同踩單車。你可以喺蒙吉特海灘嘅海岸線附近游水同浮潛；當地漁民會由海灘坐傳統木船出海捕魚，而區內亦都有旅行社開辦玻璃底船觀光同釣魚團，活動豐富！
位置： Nusa Dua, Benoa, Kuta Selatan, Badung, Bali, Indonesia
蒙吉特海灘 (努沙杜瓦海灘)
5. 格格廟
推介： 歷史文化, 拍照
格格廟 (Pura Geger Temple) 係努沙杜瓦 (Nusa Dua) 嘅重要文化地標之一，喺懸崖上面拔地而起，俯瞰同名嘅格格海灘 (Geger Beach)，以高聳嘅外觀映襯住迷人海景；遇著風和日麗，朝早仲會望到海灣同阿貢火山添！
格格廟只會喺儀式期間對外開放，其餘時間都唔開門；而朝聖信徒就會喺峇里日曆月圓之時去格格廟，參加 Purnama Kanem (第 6 個月圓日) 舉行嘅重要慶祝活動。
位置： Jalan Pura Geger, Sawangan, South Kuta, Badung, Bali 80363, Indonesia
格格廟
6. 神鷹廣場
推介： 歷史文化, 拍照
神鷹廣場文化公園 (Garuda Wisnu Kencana Cultural Park) 位於努沙杜瓦海灘 (Nusa Dua Beach) 以西大約 12.5 公里，主要焦點係一座巨型雕像，重現仁慈嘅印度教神毘濕奴 (Vishnu) 坐喺神鷹迦樓羅 (garuda) 上面嘅情景。呢尊雕像高 121 米，坐落於 46 米高嘅石座之上，係東南亞最高嘅地標之一；而神鷹廣場會定期舉辦各種文化表演、展覽同世界級活動，精彩豐富！
位置： Jalan Raya Uluwatu, Ungasan, Badung, Bali 80364, Indonesia
開放時間： 每日 08:00 至 21:00
神鷹廣場
7. 太平洋博物館
推介： 伴侶, 家庭, 歷史文化, 拍照
太平洋博物館 (Museum Pasifika) 展出 25 個國家共 200 幾位藝術家創作嘅歷史文物同藝術作品，當中包括印尼知名藝術界人物嘅大作，包括峇里畫家 Nyoman Gunarsa，同埋爪哇藝術家 Raden Saleh 嘅心血結晶。
呢間博物館總共設有 11 間唔同主題嘅展覽廳：1 至 5 號展覽廳分別展出印尼、意大利、荷蘭、法國同印歐藝術品；其餘展覽廳就會舉辦臨時展覽，同時展出東南亞展品。其中，採用樹皮布 (tapa) 製成嘅大洋洲同太平洋作品，以及嚟自中國同日本嘅畫作都別具異國風情，千祈咪錯過！
位置： Complex Bali Tourism Development Corporation (BTDC) Area Block P, Kuta Selatan, Benoa, Badung, Bali 80361, Indonesia
開放時間： 每日 10:00 至 18:00
電話： +62 (0)361 774 935
太平洋博物館
8. 峇里國家高爾夫俱樂部
推介： 豪華住宿
峇里國家高爾夫俱樂部 (Bali National Golf Club) 位於峇里旅遊發展綜合建築 (Bali Tourism Development Complex) 南邊，佔地廣闊，由 Robin Nelson 同 Rodney Wright 設計，屬於 18 洞規格，沿途分成 3 種打波場景，別樹一幟；其他場內設施包括利百特高爾夫學院 (Leadbetter Golf Academy, LGA Bali) 同更衣室，場內嘅高爾夫專門店仲有賣專業裝備，貨色齊全！峇里國家高爾夫俱樂部亦設有練習場同果嶺，正式打 Golf 之前，不妨去熱下身先！
位置： Kawasan Wisata, Nusa Dua, Benoa, Kuta Selatan, Badung, Bali 80363, Indonesia
開放時間： 每日 06:00 至 19:00
電話： +62 (0)361 771 791
峇里國家高爾夫俱樂部
9. Puja Mandala 拜聖地
推介： 伴侶, 家庭, 歷史文化, 拍照, 經濟實惠, 非一般行程
Puja Mandala 拜聖地由印尼 5 個主要宗教朝拜場所組成，位於山頂，設有佛寺、印度教寺廟、天主教堂、新教教堂同清真寺，氣氛和諧。
每個宗教場所都各有特色：清真寺展出一個古老祈禱鼓同一卷手寫古蘭經；而佛寺就裝潢華麗，有大白象同菩薩雕像守衛大門。Puja Mandala 拜聖地成日都成為婚禮場地，仲會喺唔同宗教嘅重要日子舉辦活動添！
位置： Jalan Nusa Dua, Kuta Selatan, Benoa, Badung, Bali 80361, Indonesia
Puja Mandala 拜聖地
10. 努沙杜瓦 Spa 水療中心
推介： 伴侶, 豪華住宿
努沙杜瓦 (Nusa Dua) 嘅 Spa 水療中心數之不盡，由提供保健服務套餐嘅豪華度假村，到伍拉賴旁路 (Jalan Bypass Ngurah Rai) 上面一間間嘅 Spa 小店等等，各適其適。其中，Heavenly Spa by Westin™ 提供唔同嘅水療選擇，場內仲設有蒸汽室、喜馬拉雅鹽桑拿，水力按摩同凍水泳池等現代化設施；
情侶可以選擇去拉古娜 SPA (The Laguna Spa) 嘅情侶別墅過夜，喺水療套房裡面享受服務，欣賞私人海灘嘅景色；而招牌情侶浪漫水療套餐 (Couples’ Romantic Spa Retreat) 包括 90 分鐘峇里式按摩同 30 分鐘面部或者足部按摩，之後仲有朱古力生果串同無酒精雞尾酒供應，幫你充一充電！
11. 滑浪
推介： 遊歷
由格格 (Geger) 搭船去到 Sawangan，就可以喺島上最波濤起伏嘅海面盡情滑浪！努沙杜瓦 (Nusa Dua) 東面 2 個小島之間嘅巨浪可以高達 4 米，所以成日吸引唔少滑浪客嚟挑戰自我；如果你係滑浪初哥，就要小心暗湧；而且，大浪區距離海灘相當遠，要多加留神。10 月至 4 月係努沙杜瓦嘅最佳滑浪月份。
滑浪
12. 峇里努沙杜瓦威斯汀渡假村嘅威斯汀家庭兒童俱樂部
推介： 家庭
威斯汀家庭兒童俱樂部 (Westin Family KidsClub) 位於度假村東北面，坐落喺寧靜花園嘅一隅，四周種滿熱帶海灘樹木，為 4 至 12 歲小朋友營造互動好玩嘅環境，而且仲有專人全面看管，父母們就可以安心俾仔女喺度玩盡各種有趣遊戲啦！一班百厭星可以任玩面部彩繪，親手整風箏，釣魚同埋觀星 (星期一 20:00 到 21:00)，由朝玩到晚！如果天氣不似預期，唔啱戶外活動，咁就不妨參加威斯汀家庭兒童俱樂部組織嘅電影之夜，同小朋友一齊欣賞好戲。
位置： Kawasan Pariwisata Nusa Dua, BTDC Lot N-3, Nusa Dua, Bali, 80363, Indonesia
電話： +62 (0)361 771 906
峇里努沙杜瓦威斯汀渡假村嘅威斯汀家庭兒童俱樂部
13. 武吉潘達瓦高爾夫鄉村俱樂部
武吉潘達瓦高爾夫鄉村俱樂部 (Bukit Pandawa Golf & Country Club) 坐落喺努沙杜瓦 (Nusa Dua) 一個懸崖上，佔地 1.5 平方公里，呈獻尊尚高爾夫體驗，場內設有 18 個錦標賽標準 3 桿短洞，其中 10 個仲可以飽覽印度洋嘅迷人全景添！全場共有 54 桿，一場 Golf 大約兩個鐘就打完，不過具體時間視乎個人能力而定。武吉潘達瓦高爾夫鄉村俱樂部嘅場地設施包括球僮服務、會所兼貨色齊全嘅高爾夫專門店，同埋一間主打各國佳餚嘅餐廳。
位置： Jalan Gunung Payung, Banjar Panti Giri, Desa Kutuh, Pandawa, Kuta Selatan, Kutuh, Badung, Bali 80361, Indonesia
開放時間： 每日 06:00 到 18:00
電話： +62 (0)811 3811 2828
武吉潘達瓦高爾夫鄉村俱樂部
14. 峇里努沙杜瓦嘉年華
努沙杜瓦嘉年華 (Nusa Dua Fiesta) 每年十月舉辦，有齊林林總總嘅藝術展覽、文化表演同體育盛事，由印尼旅遊開發公司主辦，喺努沙杜瓦好多個唔同場地上演。你可以投身參與源源不絕嘅街頭巡遊同現場表演，節目包括火舞、烹飪課同人體彩繪班，實行俾你盡情玩轉週末；大會仲會請嚟重量級國際巨星、敲擊樂手同本地藝術家，現場演奏各國音樂添！
位置： 印尼峇里努沙杜瓦海灘
電話： +62 (0)813 537 81600
峇里努沙杜瓦嘉年華
15. 努沙杜瓦寺廟
推介： 歷史文化, 拍照
努沙杜瓦 (Nusa Dusa) 嘅寺廟建築設計令人嘆為觀止，仲珍藏咗唔少風格獨特嘅文物！由布阿盧村 (Bualu Village) 前往 Jalan Pantai Mengiat 大街嘅路上，你會沿經德沙岩廟 (Pura Desa)、普薩岩廟 (Pura Puseh) 同 Catus Pata 三座寺廟；而努沙杜瓦同蒙吉特 (Bengiat) 海灘沿岸亦都有幾座大受歡迎嘅印度教寺廟，包括 Pura Segara Nata、Pura Dalem Segara 等；南努沙杜瓦大道 (Jalan Nusa Dua Selatan) 上嗰幾間隱世寺廟神秘清幽，都值得一遊架！不過，如果要數努沙杜瓦最不容錯過嘅寺廟，就一定非格格廟 (Geger Temple) 莫屬。呢座神殿位於懸崖上面，俯瞰印度洋嘅無敵靚景，身處其中特別心曠神怡。
位置： 印尼峇里努沙杜瓦
此文章含有 Go Guides 編輯團隊的個人意見。Hotels.com 會向於本網站上撰文的作者付費，其中或包括旅遊及其他費用。