峇里 6 大最佳夜店

Mirror Bali Lounge and Club 既係水明漾 (Seminyak) 大街嘅潮爆酒吧，又係最正嘅 Party 勝地，位於人流暢旺嘅佩蒂滕格街 (Jalan Petitenget Street)，設計靈感嚟自哥德式大教堂，牆身鋪上閃閃令嘅馬賽克拼圖裝飾，加埋彩色花窗玻璃同高樓底空間，視覺效果超夢幻！而且，店內仲有先進嘅激光照明系統，務求打造最 Cool、最超現實嘅未來主義世界。Mirror Bali Lounge and Club 會播放工業音樂、低音舞曲、House 浩室音樂同 hip hop 音樂，一於盡情狂歡，玩到通宵達旦啦！店家吧枱嘅飲品包羅萬有，包括伏特加混調酒、Chandon 同 Moscato 品牌氣泡酒，招牌雞尾酒亦有唔少選擇，例如 Blanc Fleur 同 Irish Tiramisu，仲有嚟自世界各地嘅啤酒添！

Bounty Discotheque 憑濕身狂野 Party 打響名堂，吸引唔少喺峇里度假嘅少男少女過嚟狂歡，癲返一晚！呢間綜合娛樂場所外號 Bounty Ship，主舞池非常闊落，附設餐廳同酒吧，氣氛熱鬧一流。

午夜之後，越夜越精彩。酒吧裡面迫爆人，有啲蒲客仲會膽粗粗，行入成個人咁高嘅「雀籠」裡面，大跳特跳！每晚，店家都有唔同嘅現場節目上演，通常包括現場敲擊樂表演、泡泡 Party、競飲比賽、桌球比賽、時裝表演同艷舞表演，仲有男扮女裝歌手，模仿 Whitney Houston 同 Dolly Parton 咪嘴獻唱，非常搞鬼，包你玩到唔捨得走。

Engine Room 係位於雷吉安 (Legian) 市中心主街嘅 3 層高夜店，每晚都吸引大批後生仔女嚟跳舞劈酒！呢間夜店下晝已經營業，比同區其他夜蒲熱點更早開門做生意，客人可以由雷吉安行人道直接行入主舞池。

通常，Engine Room 到咗午夜時份最熱鬧，駐場 DJ 大玩 hip hop、dub、trap 音樂混音，將現場氣氛炒熱到高潮！冰鎮烈酒同馬天尼酒係呢度最暢銷嘅飲品；想一邊跳舞一邊飲酒？建議買用膠杯裝嘅「blaster 衝擊波」同「illusion 錯覺」雞尾酒，冚住杯蓋用飲管飲，就可以放心大跳特跳啦！

Boshe VVIP Club Bali 位於伍拉賴旁路 (Jalan Bypass Ngurah Rai)，距離庫塔 (Kuta) 主要海灘度假區只係一小段路程，裡面嘅卡拉 OK 中心設有 15 間私人 K 房，同埋 4 間直通俱樂部範圍嘅 VVIP 房。卡拉 OK 同俱樂部都點綴柔和燈光，仲有舒適豪華嘅梳化添！

樂隊同 DJ 會定期喺 Boshe VVIP Club 現場表演，主舞池配備 Funktion-One 重量級音響系統，以及高科技頻閃燈、動作感應同激光照明系統，大大增強音效燈光效果，聽歌跳舞就更加投入啦！

Red Ruby Club 係峇里水明漾 (Seminyak) 嘅夜店，有 Band 友大玩各類電子曲風，現場音樂冇得彈，種類非常多元化，由 Koh 嘅柏林地下風格低音結他、House 浩室音樂、電子音樂以至 Jazz 同 Blues 都有，Band 隊會喺夜店嘅戶外露台演出，而嗰度仲望到水明漾佩提天蓋特大街 (Jalan Petitenget) 添！

The Terrace 係 Red Ruby 旗下嘅獨立酒吧餐廳，入去主舞池玩之前，可以約朋友嚟呢度食啲小食、飲杯雞尾酒、吸支水煙 hea 下，等齊人先出發。喺 Party 蒲客未上門嗰陣，戶外露台成日都有樂隊演奏 Blues 同民謠樂曲，悠揚悅耳。