峇里 11 個最佳購物體驗

峇里各大度假區通常都設有至少 1 間購物中心，而單喺庫塔 (Kuta) 就有 3 個知名購物商場，當中包括海灘步道購物中心 (Kuta Beachwalk)，同埋喺海灘對面嘅露天購物地帶。峇里係一個度假島嶼，島上比較少都會摩天大樓同奪目購物中心；之不過，我哋精選嘅心水購物商場規模都算大，亦有提供各種餐飲同娛樂選擇。身處峇里，如果你唔想再喺藝術市集講價「血拚」，咁不妨去幾間設有百貨公司同禮品店嘅購物商場行下，買啲唔同款式嘅手信。

自認係殺價高手？嚟到峇里嘅藝術市集，你就要施展渾身解數，用至抵價買勻當地頂級工匠製作嘅傳統藝術品同手工藝品喇！雖然大多數商品都會標示價格，但係你都仲可以試下「殺價」；如果大手掃貨，殺價成功嘅機會高啲。峇里大多數藝術市集都喺半露天建築裡面架設，由好多個小攤檔組成。其中，位於登巴薩市 (Denpasar) 嘅昆巴沙利 (Kumbasari) 市集格局整齊；而大名鼎鼎嘅烏布 (Ubud) 藝術市集就自設主樓，聯同後街一排排嘅戶外藝術小攤檔，向你呈獻豐富貨色。

庫塔 (Kuta)、雷吉安 (Legian)、水明漾 (Seminyak) 同烏布 (Ubud) 核心地帶等等嘅峇里熱門度假區一般都設有商店街，街上購物熱點同景點林立，你會搵到傳統藝術市集、時尚精品店、現代商場同藝術畫廊；有啲商店街仲會有多種多樣嘅餐飲選擇添！行到攰可以去餐廳、路邊 Cafe 同熱鬧酒吧抖下，試吓店家嘅地道以至國際菜式，之後再飲返杯，慶祝買齊「戰利品」，滿載而歸！

峇里有為數唔少嘅設計師精品店同展覽廳，大部分距離豪華度假村同酒店只係幾步之遙。好多時裝店都係喺胡士托音樂節 (Woodstock)「權力歸花 (flower power)」時代開立，所以望落全部都係賣鮮艷花卉圖案設計嘅波西米亞風長裙、連身衫褲、長袍、泳裝同裇衫。峇里最出名嘅國際設計師品牌有 Auguste The Label、Paulina Katarina 同 Mrs Sippy Bazaar，嚟到點都要掃返啲啦！

傢俬同家居用品都係峇里必買名物，滿腔熱誠嘅店主由島上嘅地道工藝村採購獨特裝飾，貨色包括手工製陶器、燭台、水療同浴室用品等等，多姿多彩！島上部分家居用品同傢俬店仲會售賣同展示採用特定材料製成嘅自家製陶瓷、室內裝飾同傢俱，設計既有鮮豔的嬉皮風格，亦有以自然為靈感的圖案，款式應有盡有。

夜市 (pasar senggol) 絕對係峇里必去勝地，你可以喺度物色心水地道小吃，同時了解傳統家居用品有咩用途。日落之後，就係參觀夜市嘅最好時機，仲可以食到小販烹製嘅正宗峇里菜餚，好似沙爹、炒飯同烤肉等等，見到都流哂口水！另一方面，同場有售價廉物美嘅峇里風格藝術品同手工藝品，嘆完平靚正嘅美食之後，不妨順道去睇下。

峇里設有幾十間珠寶店同銀器工作室，大多數屬於峇里銀匠家族，多個世紀以嚟一直生產儀式同家居用品。與此同時，國際設計師亦都有以當地藝術作為設計靈感，製作出飾有峇里風格圖案嘅時尚珠寶。大部分商舖同場加設工作坊，俾你親眼見證當地銀匠製作銀器嘅過程；如果你想親手整件銀器，仲可以參加 House of Alaia、Prapen Jewelry＆Artifacts 同 WS Art Studio 開辦嘅銀器工作坊添！

德哥拉朗 (Tegallalang) 位於烏布 (Ubud) 市中心以北大約 15 公里，可以沿 Jalan Raya Tegallalang 公路前往。呢度有好多「前舖後居」嘅陳列室同工作室，專門製作木雕、繪畫同面具。其中，帕庫對 (Pakudui) 係德哥拉朗嘅人氣村莊之一，以生產一比一尺寸嘅動物木雕同迦樓羅 (Garuda) 神話巨鳥像而聞名。如果你會去參觀德哥拉朗嘅水稻梯田地標，不妨留步一陣，嚟峇里最長嘅一條藝術地帶行下。

蘇魯克村 (Celuk Village) 係出產黃金同白銀嘅中樞，主要道路兩邊有畫廊、商舖同工作室林立，當中好幾間仲有展出刻住自然風格圖案嘅銀製廚具添！如果你想親手製作銀器，體驗造粒、焊接同拋光過程，咁就要參加當地工作室開辦嘅課程喇。而且呢啲體驗班學費相宜，好抵玩架！蘇魯克村位於蘇卡瓦第區 (Sukawati District) 西南大約 4 公里。

晨早流流，峇里居民就會去當地街市買餸煮飯，搜購家居用品。呢度嘅街市有賣島上農場同種植園收割嘅蔬菜，仲有本島飼養嘅豬，同埋由印度洋釣捕嘅海鮮。要去街市遊覽，梗係清晨時分最多嘢睇啦；另外，峇里好多人氣烹飪學校都會去市集，帶你買定新鮮食材先上堂。