峇里
出發前須知
要數印尼咁多群島裡面最出名嘅度假勝地，一定非峇里莫屬！峇里以熱情好客嘅傳統文化聞名，最引人入勝嘅地方，絕對唔少得受自然靚景環繞嘅寺廟同宮殿，異國情調十足。峇里亦都有唔同嘅餐飲選擇，為大家呈獻當地以至海外佳餚。日落之後，峇里嘅知名夜店旋即熱鬧起嚟，舞池人山人海，啱哂鍾意夜蒲嘅你。內陸地區嘅高聳火山同原始叢林有多姿多彩嘅觀光玩樂特色，等緊你嚟體驗；仲有時間的話，就一定要去埋海灘玩返餐！
庫塔 (Kuta)、水明漾 (Seminyak)、金巴蘭 (Jimbaran) 好多一流海灘度假村同豪華度假村都喺正海灘隔籬，附近仲有峇里最刺激嘅衝浪熱點架！想欣賞恬靜海景同日出晨光？小島東面嘅海灘度假村啱哂你，當中包括沙努 (Sanur)、努沙杜瓦 (Nusa Dua)，同埋偏遠海岸地區甘地達薩 (Candidasa)。嚟到峇里偏遠位置嘅東峇里同北部地區，遊客會少啲，而兩個地方嘅平靜海灣都坐擁世界級潛水熱點，仲有純淨嘅珊瑚園，同埋色彩繽紛嘅各式海洋生物。
峇里購物推介
峇里 11 個最佳購物體驗
峇里嘅購物勝地多不勝數，有國際品牌林立嘅現代化商場，亦有專售傳統藝術品嘅工匠村。好多國際頂級設計師品牌都進駐當地，有啲仲喺庫塔 (Kuta) 同雷吉安 (Legian) 等等嘅遊客區開設旗艦店添！ 市集上有藝術品、手工藝品、獨特家居用品、古董、手工製珠寶、木製雕塑同彩色布料，好適合買嚟做手信，送俾親朋好友。貨色琳瑯滿目，款款都咁吸引，唔知買邊樣好？咁你可以參考一下我哋嘅峇里購物攻略，然後先決定去邊行街、買乜做手信！
峇里夜生活推介
峇里 6 大最佳夜店
峇里夜店主要分佈喺南部地區，包括庫塔 (Kuta)、雷吉安 (Legian) 同水明漾 (Seminyak)。午夜時份，正正係峇里夜店最熱鬧嘅時間，本地以至國際 DJ 都施展混身解數，務求令大家狂舞不停，越夜越「High」！峇里一流嘅熱舞夜店大多數都附設餐廳同酒吧，等大家食飽先再盡情狂歡。無論你係工業音樂、重音樂定係 hip hop 樂迷，又或者係想參加飲酒加桌球比賽嘅挑戰者，都會非常享受峇里夜店嘅氣氛。